Чуклöм: Оланног да суд

Чуклöм: вежаинъяс, ловъя нимъяс.— Сыктывкар, 2001, 113 л.б.
(сиктлы 400 во тыригкежлö) П.И.Сельков

книгакнига


Оз вун некор сиктса олöм,
Век син водзын гажа Чуклöм — чужанiнöй...
Ичöт Иван (И.И.Сажин), 1927 во.

ОЛАННОГ ДА СУД

Эскыны кö сиктса сёрнияслы, Сельков да Сажин дзебсьылöмны Чуклöмö овмöдчöмöн мыж вöчöмысь. Государстволöн сэки абу на вöлöмны мыжаясöс корсьöм вылö вынъясыс, да и судъяс бура лöсьöдтöмöсь на. Йöз костса олöмыс кутчысьлöма медсясö öта–мöдысь вежавидзöмöн. Сэсся Енлы эскöмыд бара жö вöлi блöдысьöн. Вöр–ва паськыд да нинöмöн юксьыны эз ков, ставыслы тырмылiс, сöмын эiль уджöн паськöд видз–му да вöрав.

Сиктса общество лöсьöдöм бöрын йöз костса олöмсö кутicны нин нуöдны сы нимсянь скодъяс — чукöртчылöмъяс нуöдiгöн. Вöлöсьт лöсьöдöм бöрын ковмис нуöдны олöмсö власьт нимсянь, а тайö нин лоöма 19 нэмлöн мöд джынйын. Кутшöм вöвлi йöзлöн олан ладыс Чуклöмын, кодыр сiйö Межадоркöд пыравлiс Визин–Троицкöй вöлöсьтö, пасйыны нинöм он вермы. Архивыс тайö вöлöсьтыслöн абу. А Межадор вöлöсьт архивысь Чуклöмса йöз кост олöм да пöрадок йылысь позьö тöдмавны уна нин.

Судебнöй системаыс вöлöма сö кутшöм: уездын — мирöвöй судья, кодi öтнас видлавлöма уголовнöй да гражданскöй делöяс. Тайö суд вылас корлывлöмны и Чуклöмса мыжа йöзöс да свидетельясöс, кодъяслы öтарö–мöдарö ветлöм донсö ковмылöма мынтыны мыжаыслы. Таысь öтдор скод вылын жö быд куим во кежлö бöрйылöмны вöлöсьтса суд. Судьяясöн бöрйывлöмны ас пöвстысь пыдди пуктана йöзöс (грамота тöдысьясöс и грамöтатöмъясöс). Быд судьялöн вöлöма номера кöрт гöгрöс печать и сiйöс пуктöмыс вöлöма приговорсö кырымалöм пыдди. Чуклöмса крестьяна пöвстысь судьяясöн бöрйывлöмны: 1879 воын — Пиля Егорöс (Сельков), 1883 воын — Петр Пикитин Сажинöс, 1887 воын — Григорий Сергеев да Азарий Назаров Сажинъясöс, 1891 воын Чуклöмысь бöрйöмны нёль судьяöс, 1895 воын — 5 судьяöс. Тайö сы вöсна, мый судлöн уджыс век содö и содö. 1899 воöдз судьяяс уджавлöмны дон босьттöг. Сiйö вося кöч (сентябрь) тöлыссянь налы кутöмны мынтыны жалöванньö: председательлы вонас 50 шайт и нöшта куим судьялы — 36 шайтöн. И тайö бара жö пырас крестьяналы вотö. 1904 воын жалöванньöсö чинтыштöмны: председательлы кутöмны мынтыны 42 шайт вонас, а куим судьялы — 30 шайтöн. Чуклöм вöлöсьтын 1916 воö судьяясöн бöрйöмны 4 крестьянинöс: Иван Петров Сажинöс (председатель), Илья Афанасьев (Опонь Илля) да Василий Егоров (Егор Васька) Сельковъясöс и Прохор Кондратьев Сажинöс (Конö Прокор). Председательлы жалованньöсö лöсьöдöмны 9 шайт и судьяяслы — 6 шайт вонас.

Вöлöсьтса суд видлавлöма уголовнöй и гражданскöй делöяс. Приговоръяссö гижлöмны лöсьöдöм книгаö рочöн, грамотнöя да мыждысян уставлöн статьяяс вылö ыстысьöмöн. Колö пасйыны, мый приговоръясыс мыжъяс сертиыс лöсяланаöсь. Öнi тайö шензьöдана. Неграмотнöй да и рочöн сёрнитны кужтöм судьяяс сяммылöмны законъяс серти видлавны мыжъяс да лöсьöдны приговоръяс. Дерт, тайö вöчсис грамотаа гижысьöн. Но и судьяясыс вöвлöмны олöмсö бура тодысьясöн и вермылöмны мыжъяссö донъявны закон серти.

1880 вося йирым (октябрь) тöлысьö запасса матрос Вениамин Алексеев Сажин шыöдчöма судö батьыслысь овмöссö вокъясыскöд юкöм кузя. Служба вылысь локтöм бöрын овны некöн, вокъяс батьыслысь нинöм оз сетны. Суд вылö локылöмны куим вок: Егор, Терентий да Прокопии. Суд приговоритöма Вениаминлы сетны батьыслысь важ керкасö да выль керка вöчтöдз овны Прокопии вокыскöд öти посводзöн, а пöртйöн, чанöн да тöчилаöн вöдитчыны öтсöглаcöн. Батьыслысь овмöс юкöм кузя тайö жö вокъяс дiнö искöн 1891 воын судö шыöдчылöма Тюменьын олысь запасса салдат Полений, витöд вокыс. Судыс Поленийлы вокъяссянь шуöма сетны 7 шайт, а мöд судебнöй заседание вылын мöс джынйысь нöшта на мынтыны 2 шайт 50 ур. И татшöм приговоръяссö позьö вайöдны зэв унаöс.

19 нэм помын власьтъяс зэв чорыда босьтчылöмны тышкасьны самöкур пуöмкöд. Но бырöдны сiйöс абу жö вермылöмны. Кутомны вöчны гусьöн и горт дiнсянь ылын, а быд пу костö видзöдчысьöс он пукты. Самöкур вöчöмысь штрапуйтлöмаöсь 25–40 шайтöдз, а мынтысьны кö мыжаыс оз вермы, пуксьöдлöмны тюрьмаö 20 сутки кежлö, самöкур вöчан кöлуй жугöдлöмны, пöртъяс вузавлöмны штрап мынтан тшöтö да нöшта овмöсъясысь вузавлöмны и мöсъяс, куканьяс да ыжъяс. А 40 шайта штрап вылö вузавны ковмылöма кык мöскöн да нöшта кукань да ыжъяс (мöскыслöн доныс вöлöма сöмын 8 шайт).

1898 воö урасьöм (февраль) 20 лунся исполнительнöй лист серти чуклöмса Мирон Петырöс (Сельков) сöмын самöкур вöчан кöлуй видзöмысь штрапуйтлöмны 20 шайт. Татшöм жö штрап сетлöмны Зöтей Вöньöлы (Сельков). Тайö жö вонас моз (август) тöлысьын самöкур вöчöмысь 40 шайта штрап сетлöмны Александр Иванов Сельковлы, а Парпоней Миколайöс (Сельков жö) понятöявны öткажитчöмысь ассьыс да вина вöчысь нывбабалысь нимсö висьтавтöмысь пуксьöдлöмны арестнöй жырйö суткиöн джынйöн кежлö. 1888 вося тöв шöрын (январын) самöкур пуысьяскöд тыш тшöктöма жö нуöдны урядникöс, полицейскöй сотскöйясöс да десятскöйясöс. А 1899 вося тöв шöрын (январын) Межадор вöлöсьтса скод вылын самöкур йылысь шуöмны сö мый: "дешевизна и простота изготовления дают возможность частого и значительного его употребления. Последствия же — болезни, различныс пороки, нарушение семейного спокойствия, ссоры, буйства и даже преступления, оканчивающиеся судом, что приводит трате времени у крестьянина, развращает детей, которые, глядя на родителей, приучаются пить с малолетства. И, признавая больших штрафов, наносит трудно поправимый ущерб крестьянскому хозяйству, лишает крестьянина скота и другого имущества. Сход постановил: самокур не варить, в случае нарушения, кроме штрафов акцизного ведомства, нести ответственность перед обществом. Платить такой же штраф в пользу открытого в обществе благотворительного капитала, а кто знает об изготовлении и не заявит об этом — несет такое же наказание, чему должен подвергаться виновный, но не менее 10 рублей. Все самокурные принадлежности обязуемся уничтожить, а кто не сделает,— подлежат такому же наказанию. Исполнение обязательно для всех с 1 февраля 1899 года".

Таысь бурджыка самöкур вöчöмлöн да вина юöмлöн лёк вайöдöм йылысь висьтавны он вермы.

Роч вина, кöть и вöлi самöкур дорысь дона (6–7 шайт ведра), крестьяна ньöбöмöн юлöмны жö.

Вина юöмысь лёксö казялöмны 19 нэмся 80–öд воясын нин. Лоöма лöсьöдны "по питейным делам присутствие", медым пуктыны колана лад. Устьсысольск уездын татшöм "присутствиеыс" вöлöма жö. Том йöзöс рекрутö нуигъясöн вöлöсьтса правленньöясöс тшоктыломны бура видзодны, мед карö — призывнöй пунктö вина некод эз ну. Татшöмдырйиясö дутöдлöмны и винаöн вузасьöмсö.

1887 вося вöльгым (ноябрь) 29 лунö Межадор вöлöсьтын вöлöма скод, кöнi видлалöмны уездса присутствиелысь тшöктöм, медым дугöдны чорыд винаöн вузасьöм. Скод шуöма: 1888 восянь сиктын, нем вылö видзöдтöг, куим во чöж оз позь восьтыны роч винаöн вузасьöм. Шуöмас нöшта пасйöма: "силу данного приговора распространить и на будущие годы, если не будет принято другое решение. Кто допустит в черте усадьбы питейнöй торговли, с виновного взыскать 300 рублей в пользу непускающих".

Вина юöм паськалöмсö казялöм бöрын тадзи медводдзаысь кöсйылöмны падмöдны да чинтыны вина юöмсö. Сöмын тайö кöсйöм кежысь и кольöма. Волосьтса скодлöн тшöктöмыс лоöма олöмö пöртны вермытöмöн. 1888 воын Межадорын вöлöма винаöн вузасян öти лавка, и самöкур юöм абу чинöма.

Власьтъяскöд öтвылысь крестьянаöс вина юöмысь заводитлöмны дугöдны и вичкояс.

Чуклöмса вичко танi бöрö абу кольччылöма, ассяньыс на водзмöстчывлöма. 1890 вося öшым (декабрь) 1 лунö священник Александр Рогов первой округса благочиннöй Григорий Мысовлы юöртö: "к ослаблению гибельного порока изделия самокура и неумеренного употребления оного, желая расположить народ к религиозности, проводить праздники так, как подобает христианину, приняты были мною всевозможныя меры к постепенному уничтожению оного пьянства, но, к сожалению, привычка у крестьян до того крепко укоренилась, что трудно в скором времени сделать перелом, а для достижения означеннöй цели, на основании опр. св. синода от 5.VI–11.VII прошлого 1889 года, 21 октября открыто мною общество трезвости. После божественнöй литургии и общего молебствия святителю Василию великому, которого общество избрало своим покровителем, изъявило желание вступить в общество 9 человек, все эти девятеро записаны в особую книгу для поминовения о здравии при совершении проскомидии; обет воздержания ими пока дан на 1 год, а потому покорнейше прошу ваше высокоблагословение на вновь открытое общество трезвости испросить святительское благословение". Благöслöвенньöсö сетöма Велико–Устюжскöй епископ сiйö жö вося öшым (декабрь) 30 лунся аслас Указöн.

Сöмын Чуклöм сиктын самöкур, ёна гусьöн вöчöмöн, пыр юлöмны. Революция бöрын власьт пыр жö тышкасис вина юöмкöд да самöкур вöчöмкöд. А мый таысь артмис, аддзö быдöн ас синъяснас.

Вина юöм, дерт, некор на бурсö абу вайлöма. Мöдарö, та вöсна йöз костын пыр вöвлывлöмны нелючкияс. Том йöз празьникъяс дырйи тышкасьлöмны, жуглывлöмны öшиньяс, паськавлöма мисьтöм кывъяса сёрни. Вöлöсьтса суд эськö öдйö и чорыда судитлöма мыжаяссö, пуксьöдлöма арестнöй жырйö, штрапуйтлöма да тшöктылöма вештыны вöчöм убыткасö, накажитлöма и розгаöн. Татшöмторъясыс вöвлöма уезд пасьтала. Урадникъяс да и уездса начальство асланыс гижодъясын пасйывломны, мый лёкторъясыс локтiсны
нажöвитчанiнъяссянь — сэтысь, конi сöвмö промышленность.

Сöмын керка — картаö пырöмöн гусясьöмъяс водзтi абу вöвлöмны.

НÖШТА МЫЙСЮРÖ ЙЫЛЫСЬ

Лои пасйöма, мый чуклöмсалöн олöмыс нинöмöн эз торъяв Сыктыв пöлöнса мукöд сиктъясын серти. Дерт, йöзлы кутшомко выльтор ли, буртор ли Чуклöмо локывлiс
сёрöнджык — сиктлöн бокынджык сулалöм вöсна. Пасйöма лои вичко йылысь, челядьöс велöдöм йылысь, асшöр общество да вöлöсьт лöсьöдöм йылысь. Сиктса общество лöсьöдöм бöрын 1904 воö восьтылöмны библиотека. Содтöд колö пасйыны, мый сикт — деревняясын, кыдзи и мукöд коми оланiнъясын, йöз радейтлöмны кывзыны мойдъяс, багатыръяс да чуд йылысь сёрнияс. Эскылöмны омöльяслы, васаяслы. Повлöмны тшыкöдöмысь да вомдзалöмысь. Тöдлöмны мортлöн орт йылысь. Вöвлöмны синва петкöдны кужысь бöрдöдчысь нывбабаяс, кодъясос ковманiнö нарошнö корлывлöмны. Вöвлöма и аслыспöлöс корасян ног. Войпукигъясö да празьникъяс дырйи сьывлывлöмны коми да роч сьыланкывъяс, гажöдчывлöмны котырöн йöктöм — сьылöмöн, гудöкасьöмöн.

Бöръя ыджыд войнаöдз (комынöд воясö) ёна паськавлiс балалайкаöн ворсом. Пöшти быд керкаын вöлi ньöбом либö ас вöчöм балалайка, став челядь велöдчылiсны ворсны. Вöвлi и пöлянöн пöлясьöм. Но ворсан инструмент пыдди пöлян эз вöвлы.

Том нывъяс кывзысьлöмны да гадайтчывлöмны. Челядь и гырысьджык нин зонъяс ворслывлöмны мачасьöмöн, дзебсясьöмöн да войнаöн, каръясьöмöн да паличасьöмöн и с.в. Олöмö топыда пыравлiс сикт — деревняястi том йöзлöн покоддяöн да гудöкасьöмöн сьылiгтырйи ветлöм. Тадзи мöдöдлiсны и война вылö мунысьясöс. И война бöрын на татшöм гажöдчöмыс кутчысис. Радио да телевизор локтöм бöрын йöз йöршитчисны керкаясö, важся гажöдчöмъяс бырины.

Сикт — деревняясын ёна пасйылöмны престольнöй празьникъяс: Погостын да Грездын — Петыр лун, Керöсын — Вöзнесенньö, Важ Чуклöмын — Петыр лун аски, Ключын — Видзö пырöм, пöчинöкъясын — Трöича, Василей (важ выль во) да ыджыд лун. Ёна жö празьничайтлöмны и верба лун (валяй) и та йылысь серамбанöн бура пасйылöма чуклöмса гижысь ичöт Иван.

Празьникъяс дырйи ёна гöститöдчывлöмны, примитлывлöмны став йöзсö, кодi керкаö пыралас. Пырысь йöзыс киасьöм да копрасьöм бöрын пуксявлöмны лабичъяс вылö, а кöзяиныс быдöнлы туисысь гумовтöмöн сетö чöскыд сур либö яндоваöн (дарйöн) курыдтор. Нывöабаяс лöсьöдлöмны сэк дзик сё сикас сёян–юан. Тадзи празьникъяс дырйи гуляйтлöмны лун — мöд — коймöдöн.

Чуклöмса пиысь водзö велöдчöмöн петiсны учёнöйяс, школаясын велöдысьяс, врачъяс, инженеръяс, агрономъяс, журналистъяс и мукöд специалистъяс. Петiсны бур уджалысьяс, кодъяс нимодiсны эз сомын сиктöс, но и респуöликаöс. Васса Руфовна Сажиналы, медводдза велöдчöм врачлы, сетöма Коми республикаса да Россияса заслуженнöй врач нимъяс, Сельков Иван Ивановичлы — Коми Республикаса да Россияса заслуженнöй рационализаторлысь нимъяс, уналы сетöма республикаса заслуженнöй уджалысьлысь ним.

Кызьöд воясö Чуклöмысь петавлiс коми гижысь Ичöт Иван (Иван Иванович Сажин). Сiйö вöлöма керöс деревняысь Стахей Павел Митрей Иванлöн ичöтджык пион. Мамыс вöвлöма Межадорысь Сава Яков Ольга нима. Озыр батьлöн бура нин велöдчылöм ныв пиыслы водзысянь пыртöма лыддьысьны радейтöм, и сiйö томиникöн на заводитöма гижны серамбана висьтъяс, кывбуръяс, видлöма гижны пьесаяс. Гижлöма да печатайтчылöма сöмын нёль во, но абу этша. Архивын эмöсь сылöн и йöзöдлытöм гижöдъяс. Ичöт Иванöс Нёбдiнса Виттор бура да серамбанöн гижöмысь öткодявлöма роч писатель Михаил Зощенкокöд (Гижöд сям Ичöт Иванлöн). 1932 воö ичöт Иван мунлöма бурдöдчыны Крымö да бöрсö абу волöма и нинöм нин абу гижлöма.

Тайö коми гижысьыслысь туй помсö колö на корсьны да сылы 100 во тыригкежлö выльысь лэдзны гижöдъяссö.

КОДАРЛАНЬ КАТОВТАН, ЧУКЛÖМ?

Быд сиктлöн туйвизьыс (сöвмöмыс либö слабмöмыс) артмö сэнi олысь йöзöн. Комиын уна нэм чöж оланiнъясöн вöлiны сöмын сиктъяс, грездъяс, пöчинöкъяс, кодъясöс панысьясыс лöсьöдлöмны юяс бердса помтöм—дортöм вöрын. Чуклöм матö нёльсё во чöж, корсюрö падмышталöмъясöн, кык овмöса пöчинöксянь видз–му вöдитöмöн да вöралöмöн совмис и лои ыджыд мича да гажа сиктöн. Олысьыс век содiс, вежсис уна пöкöленньö. Урожайтöм вояс, лёк висьöмъяс да войнаяс сиктса олöмсö джöмдöдлiсны и сиктлысь сöвмöмсö надзмöдлiсны. Сöмын крестьяна век зiлисны—вöчисны ассьыныс велалöм уджсö — дасьтiнны сёян–юан да паськöм, быдтiсны челядьöс — олöмсö водзö нуöдысьясöс.

Лои пасйöма, мый 19 нэм помын да 20 нэм пуксигöн Чуклöмысь унаöн став семьяöн мунлöмны Cибырö, Rрымö да мукöдлаö. Найöс вöрзьöдлiсны олöмлöн сьöкыдлуныс да гудыртчöмыс. Йöз содö, а видз–му пай век чинö, олан сямыс вежсьö. Сэсся Ыджыд Öтечественнöй войнаöдз ылi выль олан места корсьöмöн ланьтöдчылiсны. Колхозъясын да вöрын уджалöм лоины важ олöм выльмöдысьясöн. Кутiсны паськавны сиктса челядьлöн техникумъясын да институтьясын велöдчöмъяс.

Война сиктса олöмсö дзугис, уна йöзöс воштöмöн да тшыг нисьö пöтöн Победа вылö уджалöмöн. Кокни олöм корсьöм йылысь сэк некод эз мöвпав.

Война бöрса урожайтöм вояс нöшта на олöмсö дзугисны. Лёк оломысь петан туй корсьöм могöн сиктса йозлысь олöмсö нöшта на водзö гартлiсны — дзугисны. Колхозъяс öтувтöм, сэсся на пыддi совхоз лöсьöдöм, посни грездъяс бырöдöм, олöмын мукöд кажитчытöмторъяс дзикöдз вежисны йöзыслысь удж дорö матыстчöмсö да олöм вылö видзöдлассö. Чайтсьö, та вöсна тшöтш уна йöз пондiсны пышйыны чужан сиктысь. И тадзи абу сöмын Чуклöмын.

Бöръя воясö районъясысь локтöм войтыр юркарын лöсьöдалiсны ассьыныс котыръяс. Лöсьöдöма котырсö и Сыктыв районысь петöм йöзлысь. Районса котыр тöдмалöм могысь гижысьлы ковмис тöдмавны Чуклöм котыр. Тыдовтчис, мый Чуклöм котыр карын зэв нин ыджыд: 300 гöгöр олысь, 94 мужичöй да 204 нывбаба. На пиысь Сажинъяс — 107, Сельковъяс — 79 и Лапшинъяс — 16 да нывбабаяс пиысь нöшта 96 мукöд оваяс.

Колö пасйыны, мый сиктса йöз овны мунiсны и мукöд каръясö, посёлокъясö, райцентрö. Визинын, районувса шöр сиктын, лои тöдмалöма 129 Чуклöмсаöс. И тайö абу на стöч лыдпасъяс. Унаöн на колины тöдмавтöмöн. Но и тайö лыдпасъясыс сетöны позянлун казявны олöмын мунысь вежсьöмъяссö.

Войнаöдз — кызьöд—комынöд воясö — карын Чуклöмса йöз пиысь овмöдчылiсны Ида Мишка, Домö Евлог, Прокö Василь (Сажинъяс), Опонь Öльöш, Педöр Микит (Сельковъяс), Микит Симён, Гриша Степан (Лапшинъяс). Тайö вöвлi бура тöдса сы восна, мый карö локывлысь Чуклöмсаяс на ордö пыр сувтлывлiсны узьöмöн. Война бöрын регыд овмöдчисны Секот Мишка гозъя, Дядёв Павел да Егор Миколай. Ветымынöд вояс заводитчигöн армияысь локтысьяс пöвстысь карö овмöдчисны бара жö бура тöдса том йöз: Кристопор Симён, Петыр Иван, Пашö Иван (Сажинъяс) да тайöс гижысь Сельков. Сэсся карö локтысьяс век содiсны и содiсны. Медся ёна сиктысь локтысьяслöн лыдыс мöдiс содны квайтымынöд вояс пансигöн.

1998 во помын, сиктса администрациялöн справка серти, кореннöй олысьяс пиысь Чуклöмын (Ёльбазатöг) кольöмны 579 морт — 207 мужичöй, 231 нывбаба да 141 тыр арлыдтöм на челядь. На пöвстын: Сажинъяс — 334 морт (119 мужичöй, 133 нывбаба да 82 челядь), Сельковъяс — 168 морт (64 мужичöй, 71 нывбаба да 33 челядь) и Лапшинъяс — 77 морт (24 мужичöй, 27 нывбаба да 26 челядь).

1939 воö кореннöй Чуклöмсалöн лыдыс вöлöма — 1717 морт. На лыдö пырöны и Зиновьевъяс, и Раевскийяс да Полькановъяс. И война пансьытöдз тайö лыдыс содыштлiс на.

Война вылысь бöрсö эз бергöдчыны 283 морт (15% став олысь пиысь). А мужичöйястöг йöз лыд оз сод. Сэсся унаöн кутicны сиктсö эновтны. Вайöдöм лыдпасъяс петкöдлöны, мый сиктса йöз пиысь мукöдлаын олöны нин матö сымда жö, мыйтаöн кольöмны сиктас. Со и артмö: нелямын воöн сиктын видз–му бердса уджъяс вылын кореннöй олысь пиысь кольöма сöмын коймöд пайыс. И татысь петö курыд кöртöд: война жутöдöма сиктлысь сюрсасö, а война бöрса кадъясö йöзлысь видзöдлассö вежöмöн орöдöма видз–му вылын уджалан cöнcö.

Водзтi лыддьысьны — гижны кужтöм крестьянин бура тöдлiс да вöчлiс ассьыс видз–му бердса уджсö. Öнi сиктса олысьяс ставыс велöдчöмаöсь, сяммöны вöчны уна удж (шофер, тракторист, токарь, слесарь, бухгалтер, экономист, велöдысь, врач да мукöд), мый колана и каръясын. Карса удж сиктса дорысь век кокниджык, кокыд оз куйöдöссьы, да и карса патераыд бурджык, пес ни ва понда оз ков майшасьны. Сэсся од öнi сиктыд мортöс нинö мöн оз кут, видз–мукöд йитöдыс вошöма. Со и артмö, мый каръяс деревняястö венiсны и йöзсö сэтысь кыскисны.

Чуклöм сикт боръя кадö сöвмöмлань оз нин мун. Важ грездъяс олысьясыс эновтöны, стрöйбаяс важмöны, видз–му эндö. Колхоз–совхозъяс бырины, выль кооператив кок йылö оз на сувт. Асшöр крестьянскöй овмосъяс донъяс восна оз артмыны, а пöльяс моз видз–му бердын йöзыс уджавны оз нин вермыны и оз кöсйыны. Тадзи и мунö чужан сиктын олöмыс, кыдзи шулывлiсны — шöйöвошöмöн. Сöмын сиктысь мунысь йöз таысь абу мыжаöсь. Олöмыс найöс вöрзьöдic да вайöдiс каръясö да мукöдлаö. Кымын выль кар да посёлок быдмис боръя кадö му пытшса да ворса озырлун босьтöм ради, и быдлаын эм Чуклöмса. И татшöмторйыс, он кö мытшав, вайöдö зэв шог помö — коми сёрни бырöдöмö. А коми кыв кö бырö — бырö и коми войтыр. Артмö, мый коми кыв да коми войтырöс видзысьöн öнöдз пыр на вöлiны сиктъяс. Сiдзкö, важ сиктъястö дзикöдз бырöдны некыдзи оз позь. Сэнi коми войтырлöн вужйыс да и аскиа луныс. Тайöс колö бура гöгöрвоны быдöнлы — сиктса и карса олысьяслы, юралысьяслы, и пуктыны став вын, мед коми войтырлöн аскиа луныс оз вош, а мед миян Чуклöм мичаммис да сулалiс нэм пом виччысьтöг.