Чуклöм: Паськöм да сёян-юан

Чуклöм: вежаинъяс, ловъя нимъяс.— Сыктывкар, 2001, 113 л.б.
(сиктлы 400 во тыригкежлö) П.И.Сельков

книгакнига


Оз вун некор сиктса олöм,
Век син водзын гажа Чуклöм — чужанiнöй...
Ичöт Иван (И.И.Сажин), 1927 во.

ПАСЬКÖМ ДА СЁЯН-ЮАН

Паськöм сиктса крестьяна вöчлöмны семьяясын асьныс. Асьныс вочлöмны кöмкот вылö да пасьяс вылö кучикъяс, кöдзлöмны кудель вылö шабдi да пыш, печкылöмны и кылöмны дöра. А печкöм вурунысь кылöмны сукманина. Бöрынджык, кор лои верманаöн, кутöмны ньöбны либö вежлавны прöмыс вылö ситеч, нöй да мукöд роч тöвар, кытысь лöсьöдлöмны вöччан паськöм.

Нывбабаяс новлöмны еджыд дöраысь улыс дöрöм, гачьяс найö абу новлывлöмны весиг зэв кöдзыдъяс дырйи. Вылiас налöн вöлöма сарапан либö шушун. Сарапан вылö пасьтавлöмны нöшта водз дöра (нагруник) да вöнясьлöмны мича кыöм вöньöн. Кужлöмны нывбабаяс ассьыныс паськöмсö быд ногыс мичмöдны. Тöвъясын новлöмны мича ыж ку пасьяс.

Мужичöйяс новлöмны кузь дöра дöрöм да дöра гач. Дöрöм вывтi вöнясьлöмны жö мича вöньöн. Вылыс паськöм лöсьöдлöмны сукманинаысь, бара жö дöраысь да ыж кучикысь. Мужичöйяслöн медся колана уджалан и кыйсян паськöмöн вöвлöма лаз, кодöс вурлöмны сукманинаысь, водзсö и пельпомсö чер öшöданiнöдз эжлöмны кучикöн. Водзас и мышкас дöра мешöкъяс (лаз зепъяс), кытчö позьö пуктыны сёян–юан, прöмыс да мукöдтор. Ставыс тасмаавсьö кос гöгöр. Лазйын öти помын чер и пурт, косiнын би перъянтор. Зэригöн лазъя морт коскöдз некор оз кöтасьлы.

Мужичöйяслöн и нывбабаяслöн вöлöма уджалан и вöччан вöсни пыдоса кучик кöтi, кодъясöс вурлöмны кок серти бара жö асьныс. Кöтасьöмысь кучиксö видзлöмны сир ва пытшкын. Кöтi кöмавлöмны уджалан либö вöччан чöрöс вылö. Кöтiыс кöртавсьылöма кок бердö кöвйöн. Мужичöй кöтi нöшта йитлöмны небыд кучик гöльöнöн, кодöс кок гöгöр топöдöмöн кöвйöн жö кöртавлöмны. Мужичöйяслöн вöлöмны и ас вурöм сапöгъяс — бакилöяс. Тöвнас новлöмны вурун гын сапöг (Чуклöмса ног — катаник). Уджалан кöмöн вöлöма гын пыдöс вылö сукманинаысь вурöм тюни либö гындöм валеги юр, кодöс гöльöнявлöмны бара жö сукманинаöн, кодi кöртавсьылöма кок бердö. Тадзи вöртi и лым пытштi ветлыны кокни, небыд и шоныд. Юр вылас мужичöйяс новлöмны гын шляпа, мукöд шапкаяс, а тöвнас — кузь пеля, öтарö–мöдарö гöна кукань ку шапка, кузь пельсö шарп моз гартыштлöмны голя гöгöрыс. Нывбабаяс новлöмны чышъянъяс да кокошник. Чуклöмса олысьяс паськöм мöдаöн абу торъявлöмны Сыктывса мукöд сиктъясын олысьясысь.

Сёян–юанöн абу жö торъявлöмны. Бура сёйöм пыр йитчылöма урожайкöд, тырмымöн скöт видзöмкöд, семьяын уджалысь лыдкöд, вöравны да чери кыйны вермöмъяскöд. Урожай кö оз артмы и амбар йöртöдъясыд тыртöмöсь, сёйöм–юöмысь, дерт жö, ковмывлöма дзескöдчыны, а ыджыд семьялы пуксьыны норма вылö. Яй ёнджыкасö солавлöмны да косьтылöмны (тöлöдлöмны), гожся уджъяс дырйи кос яйысь пулывлöмны шыд. Шыд Чуклöмсалöн, абу кö кослунъя видзалöм, пыр вöлöма медшöр сёянöн. Кослунъяс дырйи яя сёян вежлöмны чериöн, ид пызя рокöн, градвыв пуктасöн, тшак —вотöсöн. Кужлöмны вöчны мöс вый, рысь. Пызан вылö лэптывлöмны уна сёянтор, но этшаникöн, лишнöя абу сёйлöмны. Пöльяс шулiсны, мый пызан сайысь колö петны, кор кынöм сюмалöмыд эз на дзикöдз быр. Тадзи велöдлöмны челядьдырсянь.

Празьникъяс дырйи сёян–юан, дерт жö, торъявлiс пызан вылö пуктывсьылiс бур яя сёян, пöжöм вöрса пöтка да кöч яй, сола да йöв пытшкын пражитöм чери и, дерт жö, черинянь, уна сикас шаньгаяс (нöкъя, рыська, шыдöса, вотöса, тшака, вöсньыд и кыз коркаа). Зiль коми аньяс ичöтсянь велавлöмны сёян–юансö лöсьöдны. Юанторъясöн вöлöмны ырöш, чужва, сур и, дерт жö, аскур. Чужва да ырöш гöбöчысь абу быравлöма.

Капуста пулывлöмны гырысь пöртъясын да солавлöмны пельсаясö, тырмывлöма тулысöдз да и гожöмын на вöвлöма кöбрегса кöзöд вылын. Лук пуктывлöмны градъяс вылö тырмымöн жö. Чеснöк, морков, свеклö, öгуреч кызьöд нэмöдз абу вöдитлöмны. Тшак солавлöмны да пув кöтöдлöмны пельсаясö. Тшак да вотöс нöшта и косьтывлöмны. Вотöсысь вöчлывлöмны лязъяс (пувъя, чöдъя, льöмъя) да кисельяс. Уна сикас заптöм сёян–юан дырйи нинöмысь абу умлöмны, пызан вылын сiйö пыр вежласьлöма.

Колана кöлуй да дозмукъяс вöчсьылöма семьяын жö. Гырнич, кринчаг латка вöчлöмны нывбабаяс; пельса, ведра, пöдöнча, туис, лагун, пызь куд, пудовня, додь, телега, гöр да мукöдтор — мужичöйяс. Ньöбны ковмылöма сöмын кöрт дозъяс. Чуклöмса вöвлöмны киподаöсь и кужлöмны вöчны мича кöлуй.

ВИЧКО ДА ДОНА ГУЯС

Чуклöмсалöн олöмын вичколöн тöдчöмыс вöвлöма ыджыд. 260 во чöж найö пыравлöмны Межадорса приходö да ветлывлöмны сэтчö вичко службаяс вылö престольнöй праздникъяс дырйи и прöстöй лунъясö. Сэнi жö веньчайтчывлöмны, пыртлöмны кагаясöс, сьылöдчывлöмны и висьтасьлöмны. Межадорса священникъяслы пыр вöлöма тöдсаöн Чуклöмсалöн олöмыс. Та йылысь висьталöны архивын видзан исповедальнöй ведомостьяс да метрическöй книгаяс. Переписьяс дырйи вичко ёна отсасьлöма гижысьяслы. Öтсавлöма олöмö пöртны и государстволысь могъяс. Аслас службаöн да школаын челядьöс велöдiгöн дорйис, ошкис да нимöдiс сарлысь власьтсö да сылысь законъяссö. Межадорса вичко ёна отсалöма и Чуклöмö вичко стрöитöмын. Устьсысольскса духовнöй правленньö архивысь тыдовтчис, мый Чуклöмса вичко стрöитöмын водзмöстчысьясöн вöлöмны Петр, Матвей, Дмитрий, Тихон, Терентий, Филипп, Андрей, мöд Петр да Фадей Сельковъяс, Емельян, Евсей да Михаил Сажинъяс, Михаил Раевский да Осип Старцев. Ставныс грамота тöдтöмöсь.

Вöлöгдаса епархия 1859 вося вöльгым (ноябрь) 12 лунся указöн тшöктöма вынсьöдöм план серти Чуклöмын стрöитны пу вичко. Клирöвöй ведомость петкöдлö, мый сиктса Крестовоздвиженскöй öти судта, йылас кöлöкöльняа пу вичко стрöитлöмны 1863–66 воясö. Та бöрын нöшта на кык воысь дырджык вöчсьöмны пытшкöсса уджъяс. Уджавны вичко заводитöма 1868 вося кöч (сентябрь) тöлыссянь. Вичкосö вежöдöма Крестовоздвиженскöй нимöн сы вöсна, мый тайö тöлысьнас пасйыссьö Крестовоздвижение (комиöн — Звиженньö) празьник. Важ Чуклöмса часовня йылысь клирöвöй ведомостяс пасйöма, мый кодыр сiйöс лöсьöдöма, код тшöктöм серти да кутшöм вöвлöмторкöд вежöдöма — абу тöдса. Нöшта содтöма: часовнясö пö кутöны деревняса олысьяс, вичколы оз мешайт.

Вичкоса медводдза священникöн вöлöма Николай Викентьевич Попов, сы бöрын Константин Васильевич Попов, Василий Федорович Белов, Александр Алексеевич Рогов, Прокопий Николаевич Шаламов и медбöръяон — Василий Николаевич Вишерский. Вичко старостаяcöн бöрйылöмны Никита титов, Карп Сергеев, Михаил Спиридонов, Павел Дмитриев Сажинъясöс и Фёдор Тихонов Сельковöс. Мукöд йывсьыс тöдмавтöм.

Кулысь священникъясöс, налысь рöдвужсö да тöдчанаджык сиктса йöзöс дзеблывлöмны вичко йöрса шойна вылö. Татчö дзеблöмны и коми поэт Иван Алексеевич Куратовлысь мамсö, Екатерина Ивановнаöс, кувсьылöма 1874 вося сора (июль) 11 лунö Чуклöмын Антонина ныв ордас олiгöн. И.Куратовлöн рöднöй чойыс, Антонина, вöлöма священник Константин Васильевич Поповлöн гöтырöн. Иван Алексеевич Ауратов кувсьылiс Верный карын (öнi Алма–Ата) мам кувсьöм бöрын во мысти. Колö чайтны, сiйö тöдлiс мам кувсьöм йылысь, тöдлiс и дзебан — гуасянiнcö. Сэтчö жö дзеблöмны и поэтлысь 55 арöса зятьсö, священник К.В.Поповöс, кодi заразитчылöма сиктын вöвлöм ыджыд эпидемия дырйи да кувсьылöма 1881 воын. Заразитчылöма да кувсьылöма регыдöн та бöрын и попаддяыс — Антонина Алексеевна. Сiдзкö, вичко (öнi культура керка) бердса вöвлöм шойна вылö дзебома поэт И.Куратовлысь медматысса рöдняöс — мамсö, чойсö да зятьсö.

Революция бöрын выль власьтлöн закон серти вичкоöс лои торйöдöма государствоысь. Тасянь и заводитчö сылöн кусöм. 1919 вося рака (март) 9 лунö лöсьöдöмны енлы эскысьяс да вöлöсьтса власьт костын сöглас, код серти вичко став эмбурнас сетсьö эскысь котырлы. Сöглассö кырымалöмны енлы эскысь кызь крестьянин. Священник А.Рогов кырымалöма сiйöс во да нёль тöлысь бöрын — 1920 вося моз (август) 21 лунö. Вичкоса да часовняса эмбур гижавлöмаöсь. Но вичко службасö тупкылöмны 1930 воöдз на, кöть закон серти тупкöмыс лои ёна сёрöнджык. Та бöрын Чуклöмсаяс ветлывлöмны на вичкоö Межадорö, а сэсся и сэнi тупкöмны.

Дерт, вичко кисьтöмъяс эз ковны. Но мöд ногöн выль власьт эз эськö вермы пöртны олöмö ассьыс могьяссö. Вичко бердын век котыртчылiсны енлы эскысь йöз, кодъяс вöлiны паныд олöмын выль вежсьöмъясыслы. 1937 вося моз (август) тöлысьын Чуклöмса сиктсовет юöртö районö, мый вичкоын лоö клуб. Часовняöн "Роз" колхоз вöдитчö склад пыдди. Но сöмын 1939 воын Коми АССР–са Верховнöй Сöветлöн Президиум ода кора (май) 17 лунся указöн Чуклöмса вичко тупкöма. Öнi сэнi сиктса культура керка. Киссис вичко бердса важ школа, эз лоны вичко гöгöр сулалысь кыдзъяс. Разьöма важ Чуклöмса часовня.

Чуклöмса енлы эскысьяс важöн ветлывлöмны Сöлöвкиöдз. Матвей Павел (Сельков) овмöссö эновтöмöн мунлöма Ульянаса манастырö да сэнi и кувсьылöма. Чуклöмса нёль семьяысь челядьсö мöдöдлöмны манастыръясö. Революция бöрын вöвлöм манашкаяс бöр волöмны сиктö, но 1937 воын найöс мыжтöг судитлöмны.

Енлы эскöм да вичкоö ветлöм, сэнi служба кывзöм пöрысь йöзлы вöвлöма лов лöньöдысьöн да и празьникöн, кор позьö аддзысьлыны уна тöдсакöд. Мичаа пасьтасьöмöн вичкоö ветлöмыс вежыштлöма олöмсö, шойччöдыштлöма. Сiдзкö, вичко вöлi эз сöмын мича храмöн, но и йöз костын лöнь да кывйö воана олöм видзысьöн. Но вичкояс тупкöм бöрын енлы эскöмыс эз дыр кутчысь. Öткымынон эськö ылi вöр пытшкö лöсьöдлöмны жö часовня пыдди кевмысянiнъяс, но йöз костын тайö абу паськалöма. Эм некымын нывбаба, кодъясöс корлывлöны кулöмъясöс дзебигöн молитваяс лыддьыны да сьылыштны. Но вичко бöр восьтöм йылысь сёрни оз кывсьы.

ВИСЬÖМЪЯС ДА БУРДÖДЧÖМ

19 нэм мöд джынйöдз врачьяс ни пельшаръяс эз вöвны. Йöз бурдöдчывлiсны асьныс, кыдзи кужисны, ёнджыкасö турунъясöн. Вöвлöмны висьöмъяс йылысь тöдысьяс, чужтысигöн бабитчысьяс да кöнöвалъяс.

Висьöмъяс йöз костын пыр вöвлöмны, медся лёкъясыс — вуджöмöн паськалысь висьöмъяс. 1723 вося гижасьöм дырйи Чуклöмын вöлöма 45 ай лов, но 25 бöрын олысь лыдыс чинöма матö кык пöв: ай ловыс кольöма 27 морт. Кытчö найö вошины? Колö чайтны, мый тайö кадколастнас деревнятi мунiс вуджысь висьöм, йöзлöн лыдыс чинi кулалöмöн. Бöрынджыкся на кадъясö татшöм висьöмъясыс вöвлöмны тшöкыда.

Видз —му лöсьöдöм–паськöдöм вöсна крестьяналы ковмылöма овны гырысь семьяясöн. Тадзи уджавны кокниджык. Ревизскöй сказкаясысь и вичко книгаясысь тыдалö, мый öти семьяöн овлöмны батьлöн пиян асланыс нин семьяясöн, племянникъяс семьяясöн жö, дöваöн кольöм моньяс челядьöн и сiдз водзö. Позьö лыддьöдлыны 20–30 морта семьяяс. Вуджысь висьöмъяс дырйи татшöм семьяад некодöс он дзеб. Сэсся му вынсьöдöм вöсна ковмылöма видзны уна скöтöс, а конi скöт, сэнi и быдсикас öвадыс. Пöрысь йöз висьталöм серти, скöт картаын, кодi вöвлi олан керкакöд öти вевт улын, рöдмылöма вывтi уна гут. Дерт, веськавлiсны и челядь оланiнö, став сёян–юан наысь он вермы дзебны. Мыт да мукöд висьöмъяс вермылсны лоны та вöсна. Вичко гижöдъясысь татшöм лоöмторъясыс бура тыдалöны. ёнджыкасö кулавлöмны челядь. Сiдз, 1870 воын кулöмны 17 морт, 16— ыс на пиысь челядь, 14—ыс дас арöсöдз. Кулалöмлысь помкасö пуктöма: "сыпь". 1874 воын 17 кулом пиысь 12—ыс челядь, 1875 воын 20 пиысь 17—ыс челядь и с.в.

Медводаза пельшар локылöма сиктö 1878 воын. Сiйöн вöлöма Вöлöгдаысь пельшар школа помалысь Александр Акиндинов Рычков. Дыр—ö сiйö олiс да бурдöдалiс Чуклöмсаöс, архивысь эз тыдовтчы, сöмын и сылöн квайт арöса пи тшöтш жö кувсьылöма эпидемия дырйи. 1881 воын сиктын чужöма 33 кага, а кулöма 96 морт, 53 —ыс на пиысь 20 арöсöдз. Помкаыс — мыт. Тайö висьöмыс мукöд семьяысь "ытшкöма" 2—3 челядьöн лун — мöд костöн. Вичкоса гижöдъяс висьталöны, мый челядь висьлöмны нöшта скарлатинаöн, лятиöн (корь) да пистиöн. Верстьö йöз кулавлöмны и чахоткаысь. Челядь кулалöм вöсна уна ордпулöн вожъяс водзö абу паськалöмны да помасьлöмны.

Межадорса обществолöн 1867 вося скод серти тыдалö, мый Визинын тайö вонас вöлöмны нин приёмнöй покöй да больнича, кодъясöс видзöм вылö крестьяналы пуктылöмны вот. Но тайö бурдöдчанiнъясыс вуджысь висьöмъяс дырйи тöдчана отсöг абу на сетлöмны. 1884 вося урасьöм (февраль) 1 лунö уездсянь юöртöны, мый писти висьöмысь прививка вöчны Межадор вöлöсьтö локтас пельшар Александр Кудрявцевлöн нылыс. Межадорса школаö письтиавтöм челядьöс абу кутöмны босьтны. 1888 вося рака (март) тöлысьö Визинса пельшар Куратов юöртö правленньоö, мый ыджыдшöр деревняса куим керкаын казялöма сыпнöй тифöн висьысьясöс. Тшöктöма котыртны сэнi дежуритöм, мед некöд сэтчö эз лок и эз мун. 1888 воын Чуклöмын сё куим челядь висьöмны пистиöн, кызь кöкъямыс кулöма. Та йылысь правленньö юöртö крестьянскöй делöяс кузя чиновниклы, исправниклы, Визинса пелынарлы да земскöй управаö.

1894 вося моз (август) 24 лунö священник А.Рогов вöлöсьтса правленньоö юöртö, мый Чуклöмын дас нёль челядь висьöны вирöн мытитöмöн, корö юöртны кытчö колö. 1898 воö Чуклöмын да Межадорын челядь висьöмны скарлатинаöн. Öткымынöн кувсьöмны. 1900 вося тöв шöрын (январын) вöлöсьтса правленньö квайтлаö юöртö, мый деревняясын лятиöн висьöны 40 мортöдз. Пельшар котыртöма дежуритöм. 1901 вося ода кора (май) тöлысьын Чуклöмын бара нин висьöны пистиöн, кыкöн кувсьöмны. Тайö жö вонас сиктын вöлöмны и тифöн висьысьяс.

Больничаын бурдöдчöм Россияын быдлаын вöлöма дон вештанаöн. Визинса больничаын сiдз жö босьтлöмны дон, а бурдöдчысьлöн сьöмыс кö абу, корлöмны вöлöсьтса правленньö пыр рöдняыслысь либö сиктса йöзлысь порука вылö босьтöмöн. 1894 воö Fрхангельскса больничаын лечитчöма Капитон чурка Сажин 15 шайт дон. Правленньööс корöны мынтысьны мирскöй капиталса сьöмысь. Челябинскса больничаын бурдöдчылöма Семен Сажин 25 шайт 88 ур дон. Бара жö правленньö пыр корöны вештысьны.

Пельшар Чуклöмын лоöма тайö нэмö 30–од воясын. Больнича лöсьöдломны война бöрын, но ветымынöд воясö сiйöс бöр тупкöмны. Сиктö асфальта туй лöсьöдöм бöрын Визинса районнöй больнича ёна матысмис йöзлы, бурдöдчöм понда майшасьöм чинiс.

ЮГЫД ОЛÖМÖ НУÖДÖ ШКОЛА

Чуклöмса Крестовоздвиженскöй приходын церковно-приходскöй школа епархиясянь тшöктöм серти пондöма уджавны вичко воссьöмсянь — 1868 вося йирым (октябрь) тöлысьын. 1870 воын дьячок Александр Иконников школаса ведомостьын пасйöма, мый школалöн аслас вежöс абу, детинкаяс велöдчöны крестьянскöй керкаын. Пес вылö, би вылö, стöрöжлы вештысьны сьöм абу. Велöдчан книгаяс локылöмны, но вывтi этша. Ведомостяс нöшта пасйöма, мый жалöванньö велöдысьлы оз мынтыны. Велöдлöмны священник Николай Константинович Попов да дьячок Александр Иконников. 1868—69 воясö велöдчöмны: 19 арöса Прокопий Алексеев Сажин, 16 арöса Георгий Емельянов, Иван Михайлов, Ермолай Трофимов да Афанасий Тихонов Сажинъяс, 14 арöса Капитон чурка Сажин да Дмитрий Саватиев Сажин, 13 арöса Василий Акакиев Сажин, 10 арöса Илья Авдиев да Петр Карпов Сажинъяс. Нывъяс школаын абу велöдчызлöмны. Öтметка велöдчöмысь пуктылöмны: бур, зэв бур, шогмана, абу омöль да омöль. Велöдан предметъясöн вöлöмны: рочöн да важ славьян ног лыддьысьöм, чистописание, колана молитваяс велöдöм да кылöм серти сьылöм. Мукöд предметъяс сьöм да велöдчан книгаяс абутöмла абу велöдöмны.

Та бöрын школа йылысь архивын гижöдъяс дыр абуöсь. Вичко архивысь сюри 1876 вося сö кутшöм гижöд — ведомость: "Чуклöмын став олысь лыдыс 677 морт, 305 мужичöй да 372 нывбаба. На пиысь челядь: 7 арöссянь 10 арöсöдз — 56 (23 зонка да 33 нывка), 11 арöссянь 13 арöсöдз — 43 (16 зонка да 27 нывка). Став велöдчысьыс Чуклöмын 37 зонка да öти ныв. Велöдöны священник Константин Попов да дякöн Александр Агентов".

Священник Константин Копов некысянь отсöгтöг челядьöс велöдöма аслас кувтöдз. Та бöрын школаын велöдысь эз ло. Выль священник сиктын дыр абу вöлöма. И школа некымын во кежлö тупкысьлöма. Но священник Поповöн Чуклöмса челядьöс грамöтаö велöдöмыс зэв тöдчана.

1886 вося кöч (сентябрь) 10 лунö выль священник А.Рогов гижö корöм уездса церковно–приходскöй школаяс юкöнö, кöнi гаралöма став тырмытöмторъяссö: "к начатию учения в школе предстоит во всем материальная нужда. Не имеется ни одного ученического стола и прочих классных принадлежностей..., равно такая же нужда предстоит в учебных пособиях, не говоря уже о вознаграждении за труды. В продолжение двух месяцев служения священником в с. Чухлом по усиленным стараниям я не мог от крестьян получить готовность на спомоществование и на поправку малого школьного здания и починку печки, в чем я предвижу необходимую нужду. В следствии всего этого вынужден заблаговременно довести до сведения оного братства и всепокорнейше прошу ввиду приближающегося срока к начатию учения обратить внимание на все это и не найдет ли братство возможность снабдить чухломскую школу нужными учебниками и классными принадлежностями, так равно и покорнейше прошу не оставить своим распоряжением о назначении мне вознаграждения за труды".

1886 вося вöльгым (ноябрь) 16 лунö Рогов юöртö, мый мöдöдöм книгаяс да класснöй принадлежностьяс воисны, пыртöма найöс каталогö. Лыддьöдлöмсьыс тыдалö, мый кызь книгаысь, öтиысь öтдор, ставыс вичко книгаяс.

1887 вося кос му (апрель) 3 лунö вöлöсьтса скод вылын шуöма Межадорса училищеын челядьöс велöдöм заводитны кöч (сентябрь) 15 лунсянь и йирым (октябрь) 1 лунсянь велöдчысьясöс оз нин позь примитны. Велöдчан во помавны сора (июль) 20 лунö. Ода кора (май) 1 лунсянь 12 лун кежлö челядьöс лэдзлыны тувсов гöра—кöдза кежлö, а йирымын (октябрын) 10 лун кежлö муяс вылö куйöд кыскавны. Татысь тыдалö, мый велöдчан кад вöлi топыда йитчöма видз–му уджкöд да меставывса власьт шуöм серти. Визинын да Межадорын школаяс воссьылöмны водзджык нин, шусьылöмны народнöй да земскöй училищеясöн. Чуклöмса челядь, дерт, сэнi унаöн эз велöдчывны.

Народнöй училищеясын коми челядьöс велöдöм кузя 1891 вося отчётын пасйöма сö мый: "посещение учащимися уроков год от году улучшается. Главная причина манкировок детьми школьными занятиями коренится, главным образом, в бедности туземного зырянского населения и в более или менее неблагоприятных климатических и топографических условиях обширного зырянского края при разбросанности и дальности места жительства учащихся от центральных школ".

1892 вося вöльгым (ноябрь) 17 лунö Чуклöмса крестьяналöн скод вылын, кодöс нуöдöмны вöлöсьтса старшина Давыдов да сылöн отсасьысь Дмитрий Раевский (Ерö Митрей), мунöма сёрни сиктын школа стрöйтöм йылысь. Но школа кыпöдöм сэки абу артмöма. И сöмын 9 во мысти сиктса скод вылын выльысь мунö школа стрöйтöм йылысь сёрни. Шуöма выль церковно–приходскöй школа кыпöдны план серти ыджыдджыкöс, та могысь 1902 восянь чукöртны сьöм 20 урöн быд вот мынтысь ловсянь да корны казнаысь школа вылö дон вештытöг вöр Веслянскöй казеннöй дачаысь — "Сава пашня ягысь" да "Яль — ягысь".

1903/04 велöдчан воын первой отделениеын (классын) вöлöмны 34 велöдчысь, на пиын 7 нывка. Тöдöмлунъяссö донъявлöмны нин 5 балла системаöн 7 предметысь: закон Божий, роч кыв, сьылöм, церковнöй грамота, арифметика (счисление), бара роч кыв и чистописание. Нывкаяс зонкаяс дорысь велöдчылöмны бурджыка. Сiйö жö вонас 3 класса церковно–приходскöй школасö помавлöмны дасöн, на пиын 3 нывка.

Революция бöрса 1919 и 1920 воясын школаын велöдысьясöн волöмны Лидия Григорьевна Бронникова, Анна Михайловна Оверина (Лапшина) да Выльгортысь волöм олöма нин Никон Старовский (академик Владимир Никонович Старовскийлöн батьыс).

Сиктса церковно–приходскöй школалöн, кыдзи и тыдалö нимсьыс, могыс вöлöма сетны челядьлы начальнöй образование и став велöдöмсö лöсьöдлöмны енлы эскана программа серти. Сы серти жö чукöртлöмны школаса библиотека. 1893 воö сэнi вöлöма нин 424 книга, джынсьыс унджыкыс — православнöй. Сöмын öти книгаöн волöмны сö татшöмъяс: Отечественная история, Северный край, География Российскöй империи, Покорение царства Казанского, Рассказы о Петре Первом. Öти книгаöн жö волöмны крестьянскöй удж йылысь: Сельское огородничество, Пахарь, Чем и как пахать.

Революция бöрын, 1918 вося закон серти, выль власьт шуöма школаын дугöдны вичко урокъяс. Чуклöмса школа лоöма первой ступеняöн, конi челядь кутiсны велодчыны 5 во. Межадорса училище лоöма мöд ступеня школаöн, бöрынджык НСШ–он (неполнöй средньöй школаöн), кытчö примитлöмны первой ступеня школа помалöм бöрын. Чуклöм вöлöсьтса исполкомын вöлöма народнöй образование юкöн, кодöн юравлöма М.Сажин, секретарнас уджалöма Н.Сельков.

Нёль класса школаяс вöлi лосьöдома Важ Чуклöмö, кытчö велодчыны челядь локывлöмны Важ Чуклöмсьыс, Понöльмылькйысь, Важпушупысь, Жуöдысь, Жуöдбокысь и сёрöнджык Старечьягысь да Подöдзшорысь. Погостын велöдчисны мукöд деревняясысь да пöчинöкъясысь. Витöд классö челядь помавлiсны сiдз жö Погостын. Первой ступеня школа помалöм бöрын öткымынöн велодчыны пыравлiсны Межадорса мöд ступеня школаö.

1937 воö Чуклöмын восьтöма 7 класса НСШ, мöд ногöн ШКМ (школа колхознöй молодежи). Межадорö велодчыны мунны эз кут ковны. НСШ помалысьяслы воссис туй велодчыны нöшта водзö.

Ылi грездъясса да пöчинöкъясса челядьлы семьяысь торйöн олöмöн велодчыны вöлi сьöкыд: колi овны йöзын да и пыр новлöдлыны сёян–юан. Та вöсна начальнöй школаяс восьтылiсны ужбурысьын, бöрынджык и Ёльбазаын. Сэсся Чуклöмын лои лосьöдома первой 8 класса, а бöрынджык — шöр школа. Тайö нин дзикöдз паськöдiс челядьлысь водзö велöдчан туйсö.

Революция бöрын нöшта вöлi пуктöма мог бырöдны верстьö йöз пöвстын велöдчытöмъясöс. Найöс рытъясын велöдiсны школаса учительяс да мукöд велöдчöм йöз: Педöр Василь, Титö Марпа да мукöдъяс. Борынджык верстьö йöзöс велöдысьясöн лоины нин мöд ступеня, либö НСШ помалысь Чуклöмса том йöз. Найö ветлiсны сиктъястi, деревняястi и пöчинöкъястi, чукöртлiсны велöдчывтöм йöзöс и накöд нуöдлiсны урокъяс. Дерт, тадзи ыджыд грамота йöзлы он сет, но унджыкыс лыддьыны гижöд, кырымасьны и весиг письмö гижны велавлiсны.