Чуклöм: Сиктса стрöйбаяс

Чуклöм: вежаинъяс, ловъя нимъяс.— Сыктывкар, 2001, 113 л.б.
(сиктлы 400 во тыригкежлö) П.И.Сельков

книгакнига


Оз вун некор сиктса олöм,
Век син водзын гажа Чуклöм — чужанiнöй...
Ичöт Иван (И.И.Сажин), 1927 во.

СИКТСА СТРÖЙБАЯС

19-öд нэм помöдз Чуклöмын стрöитчывлöмны кыдзсюрö. Абу вöвлöма некутшöм план. Керкаяссö пуктывлöмны дзескыда, 10–20 метр да ичöтджык на костъясöн. Тадзи стрöитчывлöмны, гашкö, сы вöсна, мый гырысь, юксьытöм на семьяясысь пияныс выль оланiнъяссö вöчлiсны матö бать овмöс дорас. Батьяс öд семьяын вöлiны овмöс кутысьясöн да сы овмöс улö пыравлiсны и семьяа нин пияныс. Öти вевт улын, дерт, вывтi ыджыд семья эз вермы овны и стрöйбаясöн колö вöлi паськöдчыны. А матын олысь пиянкöд кöзяинлы вöлi кокниджык. Мöд помкаöн вермис лоны сиктгöгöрса гöрöм му видзтöм. Гортгöгöрса мутö век бурджыка вынсьöдöма, и воö бурджык урожай.

Керкаяс век сувтöдлöмны лунвыв банöн, шочиника асыввывлань. Олан вежöсъяс да скöтöс видзанiнъяс йитлöмны öти вевт улö, мед тöвнас ывла вылö петавтöг дöзьöритны скöтöс. Сёян–юан видзны — гöбöч, стынын — карта да кöрым видзан сарай. Ёна важöн керка вевтъяс, дерт, вöвлiны öтарвыв пола вевтаöсь (öти ската вевт). Татшöм стрöйбаяс сиктын вöлiны на 20 нэм заводитчигöн. Важ Чуклöмын востоклöн да Подöдзшорын Семан Сандралöн керка вевтъясыс вöлiны буретш татшöмöсь.

Чуклöмын стрöйбаяс лэптывлöмны мича пожöм керйысь. Пöтшва керъяс вылö бöрйылöмны сира пожöмъяс, кодъяс дырджык абу сiсьмывлöмны. Керка вöр важ йöз кужлöмны бöрйыны. Мича пожöма ягын пусö чер тышкöн кучкывлöмны да шы сертиыс тöдмавлöмны туянлунсö. Керка вöр пöрöдлöмны арын либö тулысъявыв, сэсся вольлöмны да кокняммöм нин да потласьтöм на керъясысь тшуплöмны сруб. Нитш вылö лэптывлöмны помечöн и вевт улö вайöдлöмны öти лунöн.

Керка вевт вöвлöма тьöскысь, кодöс черöн лöсйöмöн вöчлöмны шöри поткöдöм пожöм керйысь. Поткöдöм кер джынйыслысь гöрöсö леканалöмöн уськöдломны да черöн бура лöсйылöмны, а шöрладор поткöдöминсö лöсйылöмны ва лэччан воргаöн. Татшöм вевт сулавлöма дыр и абу виявлöма сы вöсна, мый тьöссö тэчлöмны öтарö–мöдарö воргаöн: вылыс тьöскыс — вывлань гöрбöн, а увдорсаыс — мöдарö. Керка вевтлöн увдор помыс сюйсьылöма ва лэччан жöлöбö, кодi кутчысьлöма вужъя пуысь вöчöм крукъяс вылын. Вевдор помсö личкывлöмны керка сигöрöн (öклупеньöн).

Керка джодж вöчлöмны гырысь керъяс поткöдöмöн жö, плака вылö лöсйöмöн. Джодж плакаяс вöвлöмны 30–50 сантиметр пасьтаöсь. Керка йирксö унджыкыс вöчлöмны керйысь, öта-мöд дiнас пазйöн ляскöмöн. Вöчлöмны и керсö шöри поткöдöмöн да лöсйöмöн.

Чуклöмсалöн медводдза оланiнъяс вöлiны, дерт, зэв посни öшиняöсь. Стеклö пыдди зэвтлöмны öшпи гадь либö пемöсъяслысь рушку кучик. Стеклö воöма 19 нэм шöрын нин. Тайö тыдалö крестьяналы вот пуктöмъяс серти. 1867 воын крестьяналысь чукöртлöмны сьöм стеклö пукталысьлы.

Олан керкаяс ломтывлöмны керка пытшкö тшын лэдзöмöн. Тшын петан розьсö лöсьöдлöмны стенас, йирк бердö пуысь вöчöм струбаöн. Тадзи кодсюрö овлöмны весиг 19 нэм помын на. Кирпич абу вöчлöмны, а куш талялöм сёйысь струбаыд, дерт, оз артмы. Пачсö вöчлöмны талялöм сёйысь, нö шкалöмöн, жар вылö подъяс тэчлöмны изъяс.

Кирпич вöчны заводитöмсянь и пачсö кутасны вöчны кирпичысь, и лэптыны йирк пыр струба. Вöвлöма и сiдз, мый пачсö вöчлöмны сёйысь, а струбасö лэптылöмны кирпичысь. Ас вöчöм кирпич вöвлöма öнiя дорысь кузьджык да векньыдджык.

Пусян — пöжасян пач рочьясысь оз торъяв, сы вöсна и шусьö роч пачöн. Паччöрын косьтывлiсны изöм вылö нянь, гожöм —арын — вотöс да тшак. Гöбöч вылын да пöлатьын вöлiны шоныд узьланiнъяс.

Öдзöссянь шуйгавывса пельöс шусьывлöма енчом (енув) пельöсöн, сэнi — сёян–юан пызан. Öшиньяс увтi пельöссянь пельöсöдз и пельöссянь öдзöсöдз лöсьöдлöмны лабичьяс. Вöвлöмны и ас вöчöм джекъяс.

Джодж абу, дерт, краситлывлöмны, но 19 нэмын öткымынöн краситлывлöмны нин. Сикт гöгöрса шоръясын вöвлöмны "местаяс, кытысь позьлöма босьтны сёй да вöчны джодж краска. Нимавлöма сiдз шусяна Лобöс краска, кодöс босьтлöмны Лобöс ю дорысь да бура мыськöмöн сорлöмны ас вöчöм шабдi выйöн. Краскаыс бура кутчысьлома джоджö и вöлöма мича. Пöльзуйтчывлöмны сiйöн 20 нэмын нин магазинъясын краска вузавтöдз.

Тöвъян да гожъян керкаяс юксьылöмны посводзöн, кытчö пыравлiсны вевта кильчö вывсянь. Кык олан керкаясыс первой вöвлöмны öтарног пöката вевт улын, а стыныс — мöдарö. Сигöрсö пуктылöмны шöртiыс. Бöрынджык, 20 нэмын, керка вевт вежсьöма. Сигöрсö бергöдöмны. Тöвъян да гожъян керкаяс и стын лоöмны öтувъя кык ската вевт улын. Керкаяс ортсысянь мичаммöмны. Сэсся стрöитчöмсö нöшта на бурмöдöмны. Кутöмны стрöитны квайт да кöкъямыс пельöса керкаяс. Тöвъян да гожъян керкаяс костö лöсьöдавлöмны нöшта вежöс, паськыд öшиньöн. Öшиньяссö кутiны вöчны воддза дорысь гырысьöс, керкаяс нöшта лоины мичаджыкöсь. Со öнi и орччöд важcя да öнiя керкатö. 1720 вося гижöдын Чуклöмса оланiн йылыс паcйöма: "в избенке нищей не податнöй Родион Лукиянов..." оланiнсö шуöма абу керкаöн, а керка нога "избенкаöн".

Чуклöмса и Межадорса тöвъясын овлöмаöсь пеша биöн. Öткымынöн сiйöн вöдитчьшены весиг бöръя война дырйи. Пешаыс — кузнечаын вожöдöм кöрт, на костö и топöдсьö ломалысь сартас. Сартас вылö косьтывсис аршын кузя вольöм да поткöдöм кыдз пу. Сартас пессö Чуклöмын шулiсны öщöпекöн.

Кык судта керкаяс Чуклöмын водзтi эз вöвлыны. Татшöмыс лоöма cöмын Погостын Руб Öньöлöн да Кудрасовлöн. Руб Öньöсö кулакалöм бöрын керкаас вöвлi лесопунктлöн контора. Кудрасов керкаын нэмсö некод прамöя эз и овлы. А öнi киссьöма нин.

Чуклöмсалöн овмöсъясö пыравлiсны тшöтш амбаръяс, кöбрегъяс, рынышъяс. Пывсянъяс пöжаръясысь лöсьöдлöмны сиктысь бокö. Важ Чуклöмын — нюрö либö Вадоршор бокö. Кырулын — лог бокö либö ю дорö, Гадь деревняын — Гадьшор бокö и св. Рынышъяс сiдз жö вöвлiны бокынöсь. Пывсян и рыныш ломтывлiсны горъя пачöн. Пывсян пытшкыс вöвлi ляпкыд — шоныдджык вылö, горйыс да увса джоджыс му вылас, вевдор джодж вылас — лабич, кытчö пуксьöм бöрын юрыд муртса оз инмы саöсь йиркас. Бур пескöн пывсян шонавлöма öдйö. Горсö да ва шонтан изъяссö ковмылöма донöдны. Пöсь васö вочлöмны пу дозйын кöдзыд ваö доналöм изъяс лэдзалöмöн. Бöрынджык горъясö лöсьöдлöмны ва шонтан ыджыд чугун либö пöрт. Бура уджалöм бöрын чуклöмса радейтлöмны пывсьыны да небзьöдчывны, а кор ковмас — и пывсьöмöн бурдöдчыны. Пывсьывлiсны семьяöн ставыс öтлаын. Тöвся рытъясö пывсянын вöвлi пемыд, югыдыс тыдыштлiс сöмын öгыралысь на горсянь. Бöрын ставыс вежсис. Кутiны вöчны кöрт пача еджыд пывсянъяс, йиркъяс лоины вылынöсь. Пывсян онi вöчöны олан керкаяс бокö, пöжарысь повны оз ков.

1870 воö губернясянь волöма тшöктöм — сиктъяс да мукöд оланiнъяс стрöитны Устав да лöсьöдöм план серти, а вöлöсьтса правленньöяслы бура видзöдны стрöитчöм борся. Чуклöмын эськö та серти абу, буракö, стрöитчывлöмны. Но выль грездъясын керкаяс кутöмны стрöитны ыджыд коластъясöн да улича лöсьöдöмöн, сöмын öтарвыв банöн. Грезд, Погост да Керöс лоöмны уличааöсь жö, а керкаяс пуктылöмны улича öтар–мöдар пöлöныс. Сэсся öд Чуклöм места аслыспöлöс: кыдзи гöра йывса местаыс корö, сiдзи и пуксьылöмны керкаясöн.

1894 воын скод вылын мунöма сёрни сиктъясын москияс да канаваяс лöсьöдöм йылысь. Шуöма тайöс вöчны да сикт—грездъяссö пелькöдны.

1897 воын скод шуöма сетны вöлöсьтса мирскöй казнаысь 82 шайт Чуклöмö выль керка кыпöдöм вылö. Чайтсьö, мый тайö керкаыс сиктса обществолöн правленньö улö. Кызьöд нэм заводитчигöн сиктын стрöитлöмны сiйö кад серти ыджыд магазин да тöвар видзан складъяс. Магазиныс, унаысь нин пытшсö выль ног вöчöмöн, век на сулалö, сэнi вузасьö сельпо. Вöлöсьтса правленньö керкаын дыр вöвлi школа. Нянь видзан магазея места дорын öнi сулалö шöр школа. Поплöн важ керкаын — сиктса библиблиотека. Шöр сиктын нöшта эмöсь администрациялöн да вöвлöм совхозлöн контораувса керкаяс.

Сикт–деревняяслöн пельклун да пöрадок йылысь колö пасйыны сö мый: важ серти öнi пöрадокыс этшаджык, кöть шöр уличаяссö вевттьöма асфальтöн. Сулалö уна овтöм, пöлыньтчöм да киссьöм керка. Москияс абуöсь, лоö ветлыны шортi. Зэригъясö уналатi сапöгтöг он прöйдит. Да и быдсикас шыблöгыс быдлаын тыр. Важся пельклунысь этша мый кольöма.

BÖРСА ОРДЫМСЯНЬ МОЛЬЫД ШÖР ТУЙÖДЗ

Туй вöчöм да быд во сiйöс лöсьöдöм важысянь вöлöма быть вöчана öтувъя уджöн. Быд сиктлöн вöлöма мир туй лöсьöдан юкöн, а кутшöм сикттi сiйö оз мун, налы ковмылöма мир туйöдз петан туйсö лöсьöдавны, бурмöдны, быд во, турун пуктыны петтöдз, став вермысь йöзыс петавлöмны асланыс уджалан кöлуйöн, ковмывлöма кö — и вöлöн, лöсьöдны туйяс. Посъяс вöчны лесничество дон вылö сетлöма вöр.

1870 вося моз (август) тöлысьын Межадор вöлöсьтса правленньö юöртö уездса туй департаментö, мый вöлöсьтын такторысь öтдор эм нöшта 15 верст кузя туй Чуклöм деревняö, кöд бöрся видзöдöны сэтчöс приходса йöз. Мир туй вылö петан тайö туйыс мунлiс Визин ю пöлöн видзъяс вывтi, конi бурджык местаяс. Шоръяс вомöн лöсьöдлöмны квайт струба либö сюръяяса пос да нöшта муöн лэптöм квайт пос. Дерт, тайö посъяссö быд тулыс ваыс жугöдлiс, ковмылi найöс лöсьöдавны. Жугавлiс и Межадор пыр мунысь мир туй. Быд во сiйöс дзоньтавлöмны межадорса крестьяна. Вöлöсьтса правленньöлöн 1891 вося юорысь тыдалö, мый туй дзоньталан уджъяс вылö тайö вонас петавлöмны сюрс морт да сё вöв. Уджъяссö вöчöма 572 шайт дон. Чуклöмö мунан мудйытöм туй вылын уджалöмны 250 морт да 75 вöв, 165 шайт дон.

Сэсся 1899 воö тайö туй дöзьöритан уджсö Межадорса кык крестьянин кöсйысьöмны вöчны вонас 363 шайтысь. Вöлöсьтса скод сетöма сöглас да тшöктöма та могысь чукöртны сьöм. Чуклöмын туй дöзьöритан уджö босьтчöма Алексей Андреев Сельков, 80 шайтысь вонас. 1904 воö лöсьöдöмны и Визин пос дöзьöритöм — видзöм, вонас 24 шайт мынтысьöмöн.

Пöрысь йöз öнi на висьталöны, мый важöн Чуклöмсянь Межадорö вöр пытштiыс вöлöма веськыд пода туй, кодi мунлöма сиктсянь Кöбыла кöджö, Визин ю вомöн лöсьöдлöмны подöн жö вуджан пос, сэсся Рака шорсянь пода туйыс веськыда мунлöма Межадорö. Пода туйяс вöвлöмны и матiгöгöрса мукöд гырысь сиктъясö. Визинö ветлывлiсны веськыд туйй жö, сылöн кузьтаыс 18 верст. Тöвся туйöн сэтi нулдсны Визинö колхоз поставкаяс, кыдз пу кражъяс, кытысь промкомбинатын вöчлiсны фронт вылö паськыд бур лызьяс, мукöд грузъяс. Веськыд туйяс водзтi вöвлöмны Ыбö, Паджгаö. Первой мирöвöй войнаöдз Чуклöмсянь лöсьöдлöмны выль, паськыдджык туй визь Паджгаö, медым дженьдöдны карö мунан туйсö. Тайö туйöдыс позьлöма нин верзьöма вöлöн лэччыны карöдз öти лунöн. Татi жö уна том войтырöс нулöмны первой мирöвöй да гражданскöй войнаяс вылö.

Нöшта вöлi Чуклöмсянь мунысь сiдз шусяна Кен туй. Тайö веськыд туй Вилядь пыр Котласлань да Устюглань. Ветлöмысла тайö пода туйыс вöлi бöрöздаасьöма. Татi жö чуклöмса ветлöмны тыла да видзъяс вöчны лобöсö да Визин йылö. Нöшта колö пасйыны, мый чуклöмса видзъяслöн кузьтаыс вöвлöма 100 верст, быдлаö ковмылöма лöсьöдны турун ваялан туйяс. И быд посни деревняö да пöчинöкö лöсьöдлöмны телегаöн ветлан туйяс, шоръяс вомöн посъясöн да васöдiнъяс кер–кражйöн вольсалöмöн. Став тайö туйяссö сиктса олысьяслы век ковмылiс дзоньтавны да выльмöдавны.

Чуклöмсалысь туйясöн майшасьöмсö косйыломны бырöдны 1930 воясö, кор мунö мны Пинюгсянь Сыктывкарö кöрт туй писькöдан уджъяс. Мöвпъясыс (планъясыс) вöлöмны со кутшöмöсь. Сыктыв ю тулысын и арын вöвлi паракодъясöн ветланаöн, а Пустöш — районлы зэв колана пристаньöн. Шулöмны йитны пристаньсö кöрт туй станциякöд туйöн. 1930 воö тайö туйыслы ордымсö кералöмны Чуклöмсянь 8 километр, а мöд вонас Пустöшöдз нин. Райцентр Визинысь вуджöдлöмны Пустöшö жö (öнiя Первомайскöй посёлок местаö), конi мунлöмны нин гырысь уджъяс. Сэнi уджавлöмны и Чуклöмсаяс. Пристань вöсна Сыктыв юсö косйылöмны джудждöдны. Выль райцентрсянь босьтчылöмны писькöдны веськыдажык туй Кажымö да Койгортö. Тайö туйыс, кыдзи и Чуклöмö, вöчсьылiс ылi муясысь вайöдöм "кулакъясöс" уджöдöмöн. И наöн вöчöм туйясыс дыр могмöдлiсны йöзсö кöрт туй вöчöмсö дугöдöм бöрын.

Чуклöмö выль туй лосьöдöм бöрын видзъяс вывтi Межадорö ветлыны эз кут ковны. Выль туй кузя нулiсны нянь поставкаяс, няръявтöм шабдi, кракмал заводö картупель, кыскалiсны мукöд грузъяс. Татi жö Чуклöмсаяс мунiсны ыджыд война вылö.

Сэсся ковмис лöсьöдны вöр пытштi Межадорö веськыдджык да дженьыдджык туй. Войнаöдз на писькöдлöмны сылысь ордымсö, война воясö колхозъяс ас вынъясöн шыльöдiсны туйсö, гöпъяс тырталöмöн да мыръяс перъялöмон. Быд колхозлы йöз да вöв лыд серти вöлi юклöма туйсö. Ставыс вöчсьылiс ки помысь, зырйöн да нöсилкаясöн. Война бöрын тайö туйыс лои медшöрöн, пустошö нуöдысь туй лои эновтöма. Сэсся выль туйсö нöшта бурмöдiсны мудйöмöн да асфальтöн вевттьöмöн. Визин ю вомöн лöсьöдiсны зумыд пос, а Кольшортi — струбаа джуджыд мудöд. Öнi шыльыд туй кузя ветлöны сиктö карсянь и Визинсянь автобусъяс, грузъяс нуöм–вайöм и йöзлöн ветлöм–мунöм понда майшасьöм быри.

ВОТЪЯС ЙЫЛЫСЬ

Коми учёнöй П.Г.Доронинлöн гижöдъяс серти, 16 нэмын коми йöз вотъяс мынтывлöмны лук (охотник) лыд серти прöмыс кучикъясöн, а мераöн вöлöма ур. Сэсся вотсö сьöм вылö вуджöдiгöн лыддьылöмны бара жö ур серти. Öти ур лоöма öти кöпейкаöн, грöша кык деньгаöн. Та бöрын вотъяс кутöмны артавсьыны "соха" (гöр) мера серти. 1586 воын писец Иван Огарев ревизскöй ловлысь да вöдитан муяслысь мера лыдсö вуджöдöма нин "соха" вылö, сы серти артавлöмны вотъяс. Межадор сюрöма нин Огарев гижöдö. Сэсся "соха" лыдсö вуджöдöмны сьöм вылö.

Межадорса да Чуклöмса крестьяналöн вотъяс архивъясысь тыдовтчисны 1867 восянь. Тайö вонас урасьöм (февраль) 6 лунö Межадор сиктса обществолöн скод вылын видлалöма крестьяналысь вот чукöртан окладнöй листъяс, кодъяс серти колö чукöртны:
1. Общественнöй сбор — 300 шайт 49 ур.
2. Сёян–юан вылö — 40 шайт 68 ур.
3. Государственнöй повинность: 1866 вося уджйöз — 54 шайт 24 ур и 1867 вося — 323 шайт 74 ур.
4. Государственнöй податьяс: а) подушнöй — 678 шайт и содтöд 81 шайт 36 ург б) оброчнöй подать — 1834 шайт 36 ур, содтöд 34 шайт 60 ур. Поземельнöй устройство вылö содтöд — 152 шайт 55 ур.
5. Губернскöй повинность — 92 шайт 18,5 ур.
6. Мирскöй учреждениеясö — 83 шайт 5г5 ур.
7. Вöр кузя вот — 192 шайт 69 ур.

Ставыс: 3798 шайт 97,5 ур, кодi воö 5 шайт да 16,5 урон быд ревизскöй лов вылö. Сiйö жö скод вылас нöшта на шуöма чукöртны сьöм:
1. Гöль йöзöс видзöм вылö — 459 шайт 34 ур.
2. Вöлöсьт правленньöса уджалысьяслы удждон — 88 шайт 14 ур.
3. Визинса училищеö (жалöванньö, отсöгъяс, книга — тетрадь да мукöдтор вылö) — 23 шайт 73 ур.
4. Жалöванньö пельшарлы (Визин) — 6 шайт 78 ур.
5. Приёмнöй покöй видзöм вылö (Визин) — 3 шайт 39 ур–
6. Мирскöй сбор рекрутъясöс мöдöдöм вылö — 18 шайт 69 ур.
7. Сирöтаясöс видзöм вылö — 6 шайт 78 ур.
8. Лесниклы патераысь — 6 шайт 78 ур.
9. Объездчикъяслы патераысь — 3 шайт 39 ур.
10. Стöрöжлы вештысьöм — 3 шайт 60 ур.
11. Перевоз видзöм — 16 шайт 95 ур.
12. Общественнöй стрöйбаясысь страхöвöй — 2 шайт 10 ур.
13. Палаузса зимовье видзöм — 1 шайт 69 ур.
14. Жеребьёвöй бланкъяс вылö — 1 шайт 69 ур.
15. Порубочнöй бланкъяс вылö — 30 ур.
16. Жалöванньö сиктса старöсталы — 20 шайт.
17. Жалöванньö писарлы — 40 шайт.
18. Канцелярскöй рöскодъяс — 13 шайт.
19. Вöлöсьтса правленньö видзöм вылö (ломтöм, стöрöжлы, биысь) — 15 шайт.
20. Сиктса приходскöй школаö — 39 шайт 14 ур.
21. Жалöванньö öшиньяс лöсьöдалысьлы — 7 шайт 56 ур–

Ставсö 730 шайт 38 ур, мый воö 1 шайт 6 урон ревизскöй ловысь.

1868 воын, скод вылын жö, вотъяс лöсьöдöма 5 шайт 65 урöн быд ревизскöй лов вылö.

Вотъяслöн ыдждаыс быд во абу вöлöма öткöдь. 1904 вося вотъяс пиö чуклöмса крестьяналы тшöтш пырöмны: школа стрöитöм вылö — 69 шайт 75 ур, Визин пос видзöмысь — 24 шайт 50 ур, вичко стöрöжлы удждон — 24 шайт.

Вöлöсьтса правленньö нуöдлöма вотъяс чукöртан сiдз шусяна податнöй тетрадь, а бöрынджык — окладнöй сборъяслысь книга (пытшкöсъясыс öткодьöсь). Вотъяс чукöртан тайö медшöр документыс дасьтывсьöма типографияын. Вöлöсьтса быд овмöс кутысьöс гижавлöмны овöн, нимöн и вичöн, кымын лов вылö сылöн вотчинаыс и уна–ö колö мынтыны вотъяссö, эм –ö важ воясся уджйöз. Вотъяс мынтылöмны вонас кыкысь. Шензьöдö сö мый; грамотатöм вот чукöртысьяс вермывлöмны ставсö бура вöчны и быд мынтысьöм податнöй тетрадьö (книгаö) писарöс правильнöя гижöдны, сдайтны чукöртöм сьöмсö да дзугсьытöг и тырмытöмъястöг скод вылын висьтасьны во гöгöрся удж йылысь. 1878 воын вот чукöртысьöн вöлöма Чуклöмса Харитон Лука (Сельков), 1882 воын — Евсей Öньö (Сажин), 1885 воын — Васька Олдöк (Сельков). Вот чукöртысьяс, кыдзи и мукöд бöрйöм йöз, ен водзын примитлöмны присяга. И став уджсö найö вöчлöмны некутшöм дон босьттöг.

1887 восянь подушнöй вот вежöма поземельнö йöн, а 1897 воын видз–му вöдитöмысь оброк (аренда) пыдди лöсьöдöма "выкупной" вот, кодi лоöма оброксьыс ыджыдджыкöн.

МЕЛЬНИЧАЯС ДА КУЗЬНЕЧАЯС

Кык изкиа Воль мельнича йöз лöсьöдлöмны 1859 воын, и сiйö излöма тöвъясын нёль тöлысьöдз. Излöма 20 пудйöн сутки. Изöмсьыс мынтысьлöмны 8 урöн четверик пызьысь. Вöчöмсяньыс сэнi мельникавлöма Иван Зиновьев быд во мирскöй капиталö 1 шайт 14,5 ур мынтомöн. 1886 вося рака (март) 30 лунö чуклöмса крестьяналöн скод мельничасö шуöма сетны кöртымö Григорий Сажинлы 12 во кежлö 1 шайт 20 ур быд во мирскöй казнаö мынтомöн. А мельничаыс кö жугалö, лöсьодны сiйöс аслас тшöт вылö.

1890 воö тайö мельничасö чуклöмса прихожана жертвуйтöмны вичколы да шуöмны стрöитны выль мельнича. Та вылö ковмас 200 кер да 600 лунся удж (3 лунöн быд мынтысян лов вылö). Крестьяналöн скод вылын Рогов поп мельнича лöсьöдöмсö корöма сетны Дмитрий Федосеев Мельниковлы — делöсö тöдысьлы. Вичко старöсталы тшöктöма лöсьодны сыкöд договöр. Аскинас тайö договорсö лöсьöдöмны староста Павел Дмитриев Сажин да Мельников. Мöдыс кöсйысьöма мельничасö помöдз вöчны быд тöлысь сылы 40 шайт удждон мынтомöн. Уджыс заводитчас тулыснас, ва усьöм бöрын. Лоö ёнмöдöма пруд и берегъяс, разьöма да выльысь лэптöма мельнича керкасö.

1894 воö Павел Осипов Сажин да Василий Митрофанов Лапшин кöсйысьлöмны вöчны мельнича Гадь шöр вылын. Сöмын мельничаыс абу артмылöма. 1906 вося тöв шöр (январь) 8 лунö 177 пиысь 128 овмöс кутысь шуöмны вöчны Ёгул мельнича. Воль мельнича пö оз могмöд, изöдчыны лоö ветлыны боки мельничаясö. Корöмны та вылö устьсысольскса лесничöйлысь тшöктöм. Кор тайö мельничасö панö мны да кор помалöмны, эз тыдовтчы.

1919 воö мельничаяс сетöмны потребительскöй обществолы. 1920 вося гожöмын Ёгул мельнича сиктса йöз дзоньталöмны да выльмöдöмны. Сэсся воль да Ёгул мельничаяс уджалiсны война бöрöдз, кор изан уджыс вуджис электричество вылö. А нöшта бöрынджык мельничаяс эз кутны ковны — пондiсны вузавны пöжалöм нянь да гортын пöжасьöмъяс вылö пызь.

1871 воын Межадор вöлöсьтса правленньö юöртö уездса мирöвöй посредниклы, мый Чуклöмын кузьнечаяс кутöны Емельян Иванов Сажин да Петр Сажин. Найö уджавлöмны öткöн крестьяна корöмъяс серти. Емельян Сажин доран уджöн ёна отсасьлöма вичко стрöитiгöн. Кöртсö вайлöмны кажимысь да нювчимысь. Мукöд кадся кузьнечаяс йылысь гижöдъяс эз паныдасьлыны.