Чуклöм: Пармаын коми эз няргыв

Чуклöм: вежаинъяс, ловъя нимъяс.— Сыктывкар, 2001, 113 л.б.
(сиктлы 400 во тыригкежлö) П.И.Сельков

книгакнига


Оз вун некор сиктса олöм,
Век син водзын гажа Чуклöм — чужанiнöй...
Ичöт Иван (И.И.Сажин), 1927 во.

Вöралöм Межадорса да Чуклöмса крестьяналы вöлöма сöмын нин видз–му вöдитöм дiнö содтöд пыдди. Кöть вöрыс 17—18 нэмъясö вöлi ёна вöрзьöдтöм на, звер–пöтка кутöма нин чинны. Сöмын Сыктыв бердса йöзöс воралöм век жö кыскылöма. Воралöм сеттис позянлун нажöвитчыштны, вежлавны прöмыссö колана кöлуй вылö. Купечьяс пыр корсьлöмны дона куяс да мукöд прöмыс. Дерт, 17—18 нэмъясö вöралöм Чуклöмсалöн олöмын босьтлöма тöдчана места на.

19 нэмын вöралöмлöн тöдчанлуныс чинö ма. Крестьяна кутöмны нин вöдитны унджык му–видз да босьтны бурджык урожайяс, видзны унджык скöтöс. Межадор вöлöсьтса правленньöлöн отчётъясысь тыдовтчö, мый 1891 воын 150 гöгöр вöралысь кыйöмны да вузалöмны 1000 ур ку 130 шайт дон, мукöд звер куяс — 300 шайт дон, 1200 гоз сьöла 300 шайт дон, мукöд пöтка — 40 шайт дон. 1893 воын кыйсьöмны 158 морт. Ур ку вузалöмны 150 шайт дон, мукöд куяс — 110 шайт дон, ворса пöтка — 182 шайт дон, чери кыйöмны 100 пуд 150 шайт дон. Прöмыс вузавсьö сиктъясö волысь купечьяслы: сьöла — 30 урон гоз, 10 ур ку — 80 урысь, кöч ку — 3 — 5 урон, ош ку (ульнас) 45 — 80 шайтысь. Прöмыс вежлавсьö дрöб да порок вылö, вöччан паськöм да юмовтор вылö.

Гижöдъясас содтöма, мый звер–пöтка чинö. Талы помкаыс — пöжаръяс, гырысь да бур вöр сортовка вылö пöрöдöм, тыла весалöм.

Кызьöд нэм заводитчигöн, и комынöд воясö на, öткымын Чуклöмса тöвнас кöч кышисны капканъясöн да кынтöм кöчсö нулiсны вузавны додь тырöн. Сэсся том йöз кутiсны лыйлыны кöчьяссö тулысын и арын вöтлысьысь понъясöн. Та бöрын и кöч кутiс чинны. А ош кутшöмкö висьöмысь кулалöм бöрын вöрас сiйö зэв этша коли.

Чуклöмын вöлi вöралысь–промысловик — сандыр Васька Мишка, кодi пыр олiс кыйсьöм помысь. Сылöн вöвлi уна вöр керка, чöс туйясыс нуöдлiсны Вилядь йывса вадйöдз, а тайö нин Архангельскöй областьын.

Сьöла, тар и дозмöр вöрысь бырины жö, медсясö вöръяс куштом вöсна. Öнi Чуклöм гогöрын шоча нин кывлан налысь борд шыяссö.

Чуклöмса важcя олöмын, йöз костса сёрнияс серти, вöралiгöн вöвлöма сö кутшöмтор. Öнi кыйны сэки ветлывлöмны ас вöчöм шыöн на. Öти том вöралысь ош гу дорö кыйсьыны мунтöдз вöчас выль шы. Вöчигас вывтi ошйысьöма: ме пö выль шыöн оштö пырысь –пыр виа. Кайöмны лызьясöн ош гу дорö, микайлööс вöрзьöдöмны—петкöдöмны. Сöмын винысö абу удитöмны. Ошкыд баквалитчысь вылад уськöдчас, оти коксö сылысь орöдас. Ёртъясыс пышйöмны да локтасны сöмын аскинас. Адазасны кок пöла ёртсö да муртса ловйöн лэччöдасны гортас. Дыр висяс да кык во бöрын кувсяс. Орöдöм коксö косьтылöмны амбар сёръяс да кулöм бöрас пуктасны гортъяс. Вöравны велöдчысь том йöзлы висьтавлiсны: "Эн баквалитчы, эн ошйысь, вермас и тэкöд лёктор лоны". Татшöм важ сёрниыслöн могыс.

Сыктыв пöлöнса вöрыс пыралöма Веслянскöй государственнöй вöр дачаö. Татчö жö пыравлöма и Эжва катыдса да Кама йывса вöр. И вöр дачаыслы нимсö, чайтсьö, сетлöмны Камаö усьысь Весляна ю нимсянь. Коми йöз вöр — ватö видзисны асьныс. Сiйö од налы вöлi вердысьöн и оланiнöн. Уездын вöвлöма лесничество. Вöрыс юксьылöма объездъяс да обходъяс вылö. Лесничествоын уджалысьясöн вöвлöмны лесничöй, кондуктор, объездчикъяс да обходчикъяс. Сиктса да вöлöсьтса скодъяс вылын бöрйывлöмны нöшта сiдз шусяна полесовщикöс, вöр видзысь старöстаöс да ворса пöжаръяс кусöдысь пöжарникъясöс. Архивса документъяс та йылысь кутiсны сюравны 19 нэмса 70–öд вояссянь.

Дон мынтытöг керка стрöитöм вылö вöр билет лесничöй сетлöма сöмын запасса салдатъяслы да матросъяслы. 1884 воын 3–4 сыв кузьта да 4–5 вершок кызта 150 кер вылö дон мынтытöг билет босьтöмны Чуклöмсаяс: запасса матрос Егор Созонтов Сажин, запасса унтер —офицер Азарий Назаров да барабанщик Василий Кондратов Сажинъяс, кочегар Николай Иванов Зиновьев, матрос Андрей Савватиев Сажин да матрос Канидий Сельков, а 1887 воын — отставкаса радöвöй Евдоким Миронов Сельков, отставкаса унтер–офицер Анисим Титов Лапшин да матрос Афанасий Артемьев Сажин. Вöлöсьтса правленньöлы тшöктöмны видзодны керка стрöитöм вылö вöрсö видзом бöрся.

Лесничество быд во вöлöсьтъясса правленньöяс пыр юöртлöма казеннöй дачаысь вöрöн вузасьöм йылысь. Крестьяна, кодлы колö ньöбны колана вöр, вермылöмны шыöдчыны лесничествоö. 1884 воын госимуществоöн губерняса управленньö юöртö, мый Межадорса вöр дачаысь стрöитчан вöрыс бырöма, вöрсö колö корны казеннöй вöр дачаысь. 1885 во кежлö тайö жö управленньöыс корö лöсьöдны колана вöр вылö шыöдчöм. Быд крестьянинлы пö позьö сетны 7 кер, 20 потш, 30 маег да 4 сыв пес. 1887 воын госимущество Межадор вöлöсьтлы во кежлö джын донысь сетö 679 кер, 1600 коз пу потш, 400 маег, кызь сыв кыдз пу пес, 200 сыв лыска пес вöр да 10 сыв кос пу пес 158 шайт дон, мый колö чукöртны крестьяналысь лов лыд серти.

Тайö да мукöдтор висьталöны, мый государство сюся видзöдöма вöр кералöм бöрся, нормаöн сетлöма вöрсö. Сöмын чайтсьö, мый потштö да маегтö эз лыддьывны. Но вöр видзöм водзтi вöлöма тöдчымöн бурджыкöн öнiя серти. Вöр устав торкалöмысь чорыда мыждывлöмны. Тайö тыдалö и Чуклöмын вöвлöмторъясысь. 1911 вося ода кора (май) 11 лунö лесникъяс (обходчикъяс) гижлöмны вöр устав торкалöм йылысь протокол. Обходчик митюшов Дi— дiн — ягысь казялöма билеттöг вöр пöрöдöм. 60 кер сюрöма Кырулысь. Сiйöс пöрöдöма да кылöдöма Степан Егоров Сажин. Мöд участокса земскöй начальник лиманский сiйöс штрапуитома 20 шайт вылö да нöшта казнаö перйöмны кык пöвста убытка — 83 шайт.

1912 вося тöв шöр (январь) 27 лунö сiйö жö земскöй начальникыс вöр устав торкалöмысь Сажин Михаил Степановичöс тшöктöма мынтыны казнаö кык пöвста убытка — 71 шайт 20 ур, а оз кö вермы мынтынысö — пукöдны вежон земствöлöн арестнöй керкаын. Орйöдлöм вöрсö сетны лесничествоö. Гижавлöмаöсь овмöссьыс ставсö, мый серти мыжаыс вештысьнысö оз вермы: аслас эмбур абу, олö дöва мам овмöсас куим челядьöн да гöтырöн. Мöсъяс, вöв да кöлуй мамыслöн жö. Вузавны нинöм оз позь. И сöмын 1917 вося кöч (сентябрь) 7 лунö временнöй правительстволöн индöд серти штрапсö мынтöмысь сiйöс мездöмны. Тайö петкöдлö, мый билеттöг вöр пöрöдöмысь сьöмöн накажитомыс вöвлöма медсьöкыдöн.

Революция да гражданскöй война бöрын вöр видзан пöрадокыс кольöма важыс. Но выльлаö овмöдчöмын, видз–му паськöдöмын, крестьяналы вöр вузалöмын лоöмны кокньöдöмъяс.

Сортöвöй вöр Межадорса да Чуклöмса крестьяна лэдзлöмны важысянь нин. Сьöм нажöвитан мукöд уджъяс матiгöгöрын сэсся абу вöвлöма.

1878 вося йирым (октябрь) 25 лунö вöлöсьтса правленньöын Архангельскса купеч фирма "Я.Г.Брехт и К" лöсьöдлöма 113 крестьянинкöд договор, код серти крестьяна котыртöны артельяс. Быд артель заптö саридз сайö нуны туяна 1500–2000 кер. Керъяссö кыресьöны да кыскöны катище вылö, сэсся йи вылын пуръялöны и кылöдöны Совдорöдз (Сольвычегодск). Шогмытöм керйысь (чукля, тшака да с.в.) фирма оз мынтысь. Пурйыс кö кывтiгас киcсьö — уджалысьяс сiйöс чукöртöны ас тшöт выланыс и быд вошöм керйысь вештöны 1 шайт 80 ур. Керъяслöн кузьтаыс 11 аршын, кызтаыс 7½–7¾ вершöк. Быд татшöм керйысь фирма мынтö 42–60 урöн, а 8–8¾ вершöк кызтаысь — 72–75 урон. Договорсö вöчигöн фирма мынтöма эзысьöн задатки 15 урöн керйысь, катище вылö кыскöм–петкöдöм бöрын — нöшта 15 урöн и Cовдорö кылöдöм бöрын — 5 урöн, а коляссö вештö вöрсö баржаяс вылö грузитöм да сдайтöм–примитöм бöрын. Вöрсö катище вылö кыскан срокыс рака (март) 10 лунöдз. Артельясö пыралöмны и Чуклöмса крестьяна: Мирон Петыр, Петыр Öльöш, Васька Кöсьта, Парпоней Опонь (Сельковъяс) да Егор Гриша (Сажин). Договорсö лöсьöдöмысь быд крестьянин мынтöма вöлöсьтса правленньöлы 5 ур.

1894 воын вöлöсьтса куимсё крестьянин заптöмны да кылöдöмны 7000 кер 3425 шайт дон. 1895 воын 200 морт заптöмны и кылöдöмны 8000 сортöвöй кер 4000 шайт дон. Тайö вонас Визин ю кузя кылöдöма 23, а Сыктыв кузя 150 пур.

Дерт, саридз сайö нуöм вылö пöрöдлöмны медбур вöрсö да нöшта бöрйöмöн. Сы вöсна и нимтылöмны "сортöвöйöн" (сорт серти бöрйöмöн). Став уджыс вöчсьылöма крестьяналöн асланыс уджалан кöлуйöн, вöвъясöн да сёян–юанöн. Некутшöм оланiнъяс пöрöдчанiнъясын, дерт, сэки эз на вöвны.

Революция да гражданскöй война бöрса 1922–23 воясö крестьяна ропкылöмны, мый сьöм нажöвитны некысь. Сэсся странаын промышленность ловзьöдöм да сöвмöдöм вылö ковмис уна вöр. 1924 воын уездын бура нин нуöдöмны вöр заптöмсö да кылöдöмсö. Нажöтка вылö йöз абу элясьöмны. 1926 воын вöр удж вылын Чуклöмысь вöлöмны 215 морт и 209 вöв, нажöвитчöмын тайö уджыс лоöма нин медшöрöн.

1930 воын Визинса мöдöд райпартконференция шуöма: "взять курс на решительное и полное соподчинение в целом сельского хозяйства и в особенности колхозное строительство к основнöй ведущей отрасли — леснöй промышленности, практически увязывая взаимопомощь как средствами производства, так и труда". Татшöм туйвизьыс нуöдсис войнаöдз и война бöрын. Öнi сиктса йöзлы да водзö вылö олысьяслы кольöма сiйö, мый кольöма. Сиктгöгöрса бур вöрыс бырöма, а видз–му вöдитöмыс кутöма вошны.