Чуклöм: Выль олöмлань

Чуклöм: вежаинъяс, ловъя нимъяс.— Сыктывкар, 2001, 113 л.б.
(сиктлы 400 во тыригкежлö) П.И.Сельков

книгакнига


Оз вун некор сиктса олöм,
Век син водзын гажа Чуклöм — чужанiнöй...
Ичöт Иван (И.И.Сажин), 1927 во.

Сиктса олöмын быд гырысь вöвлöмторъяс чужтöны вежсьöмъяс, кольöны аслыспöлöс пасъяс. Быд ыджыд война кольö ассьыс некор дзикöдз шыльöдны позьтöм сер. Первой мирöвöй войнаöдз чуклöмын ёна гöль олысьяс (öтка нывбаба семьяясысь öтар) абу вöвлöмны. Сэсся страна воюйтiс сизим во (империалистическöй да гражданскöй войнаяс), сiйö жö каднас вöлi кык революция. Медся ён йöзыс нелямын арöсöдз (кызь öкмыс арлыд) вöлiны войнаяс вылын. Унаöн усины, лоины калекаясöн, вöлiны пленын. Салдатъяс кывлiсны бур олöм лöсьöдöм йылысь сёрнияс да и асьныс тышкасисны та вöсна. Тайö йöзсö видз–му уджысь вöлi петкöдöма, найö эз вермыны лöсьöдны асланыс лоан семьяяслы видзьяс ни муяс. Сиктын лоины гöльмöм йöз.

Революция бöрын сиктса крестьяналöн олöм вöлöма дзуга. Крестьяналысь мырдöн босьтлöмны став лишнöй нянь и кöрым. Кольлöмны сöмын муртса сёйны тырмымöн да кöйдыс вылö. Уна нулöмны и чуклöмысь: кодлысь кö додь нянь, кодлысь кö кыкöс и куимöс, а кодлысь кö и дзонь амбаръясöн. Крестьяналы тайö ёна абу кажитчылöма.

1921 воын продразверстка вежисны продналогöн. Крестьяна кутасны мынтыны вотсö урожайысь, а мый та бöрын кольö, вермылöмны видзны водзö вылö либö вузавны.

1923 воын натуральнöй вотъяс вежöма сьöмöн мынтанаöн, лöсьöдöма выль, öти сяма сельхозналог. Дерт, тайö сиктса гöльмöм йöзлысь олöмсö эз на веж, но уна овмöсъяс бурмöмны нин. Уезднöй витöд партконференция вылын (1924 во) вöлi шуама: "в большинстве волостей население зажиточно и царит мелкобуржуазная идеология. население консервативно и пропитано кулацкой тенденцией на 40-50%".

Йöз оз кöсйыны воштыны олöм бурмыштöмсö. Унаöн вöрзьöдчылöмны мунны выль оланiнъясö, конi первой кадсö олiгöн вöвлiны личöдöмъяс. Тадзи чужисны Подöдзшор, Пильнöй яг, Ужбурысь, Лёккосьт, Обросов да мукöд öти–кык овмöса оланiнъяс. Татшöмторйыс помасьöма сöмын комынöд вояс пуксигöн, кодыр колхозъяс кутöмны сувтны кок йылö, выль оланiнъяс лоины бригадаясöн либö ичöтик колхозъясöн.

Öдйö да став овмöсъяссö колхозö пыртöм могысь районсянь сетлöмны тшöктöмъяс: 1929 воын колхозö пыртöдны 15% крестьянскöй овмöс, 1931 воын первой 20%, и неуна сёрöнджык — став овмöсъяссö. Шуöма: колхозö пырны мешайтысьясöс сетны судö. Та могысь жö лöсьöдлöмны вотъяс: öтка овмöсъяслы ыджыд вот, колхозникъяслы ичöтджык.

Колхозъяс котыртöм мунлöма сьöкыда, кöть тайö и эз вöв ёна лёкторйöн. Крестьяна од пыр уджавлöмны ыджыд семьяясöн — ичöтик колхозöн. Тадзи вöвлöма бурджык миян войвылад. Колхозъясö ёнджыкасö абу кыскöма нывбабаясöс, и та вылö вöлöма аслыспöлöс помка. Сиктын лöсьöдлöмны "Переселенец" нима коммуна, кытчö нулöмны кулакъяслысь мырддьöм скöтöс. Танi öти ыджыд керкаын олöмны 60 сайö пöрысь, челядь и том йöз, сёйлöмны ставныс öти кадö жыннян серти. Cэсся олысьясыс абу кутöмны лöсявны, висьöмъяс паськалöмаöсь. Недыр мысти налы лоöма öтувтчыны "Ударник" колхозкöд. Нöшта сиктö вайисны рочъясын да мукöдлаын кулачитöм йöзöс, уджöдны туйяс вöчанiнын. Ставыс тайö падмöдлiс колхозъясö пырöмысь, йöзсö шызьодлiс.

1930 воын кулакъяс лыдö Чуклöмын сюйлöмны öкмыс мортöс. Сэсся комбедöн выльысь видлалöм бöрын кольöмны сизимöс. Таöдз вöлöмны нин кулакалöмаöн: Сажин Степан Никитьевич, торъя овмöсöн олысь сылöн Коктöм Митрей пиыс, Селькова Слия Максимовна, Сельков Никита Федорович да сылöн Василий вокыс, Сажин Алексей Васильевич. Сöмын тайö абу на ставыс. Кулакалöмъяс мунöмны и водзö. Йöзöс кулакалöмын тыдовтчö медводз тыр овмöсъяс вылö вежалöм. Педöр Микит — овмöс кутысь, вичкоса дьякон, челядьöс велöдысь да исполкомса делопроизводитель — Погостö стрöитöма выль мича керка. Тайö уджас сылы отсасьлöма Гриша Лука, шуриныс, и тайöс лыддьöмны йöзöс нартитöмöн. Овмöссö сылысь вузавлöмны, ачыс мунлöма карö и нэмсö сэсся учителявлöма. Öти пи сылöн вöвлi учёнöйöн, мöд — журналистöн, нылыс — педучилищеса велöдысьöн.

Районсянь эскöдöмъяс серти чуклöмса сизим мужик, артельö öтувтчöмöн, ас ки помсьыс вöчлöмны сир да дьöгöдь вийöдан завод. Артельсаяс уджавлöмны сюся, сир да дьöгöдь инасьлöмны бура и сетлöмны доход. Но артельяс вылö вежсьöма видзöдласыс, найöс нимтöмны нэпманъясöн, кодъясöс колö пö бырöдны. Некымын артельщикöс кулакалöмны, овмöссö мырдаьöмöн. Асьнысö семьяяснас мöдöдлöмны мырдöна удж вылö. Татшöмöн вöвлöма и Василий Прокопьевич Сажин (Öльöш Прокö Василь), кодi принуд вылысь локтöм бöрас овмöдчылöма Ужбурысь грездö, бура уджавлöма ичöтик колхозын, а Михаил пиыс сэнi вöвлöма сюсь председательöн.

Партячейка Чуклöмын дыр абу вöвлöма, а сиктса öтка коммунистъяс пыравлöмны Визинса партячейкаö. Вöлöсьтса вöвлöм военком, гöльяс комитетöн медводдза юралысь и вöлöсьт исполкомса медводдза председатель коммунист Сажин Алексей Петрович (Карпö Öльöш) партияысь петавлöма 1922 воын, крестьянскöй овмöсын удж вылö ыстысьöмöн. Позьö чайтны, мый сiйö эз окотит кыдзсюрö гартны олöмсö сиктса йöзлысь. Партячейкаса медводдза секретарöн райкомсянь индылöмны Николай Васильевич Даниловöс, кодi сиктын уджавлöма избачöн. 1929—1930 воясö сиктса ячейкаöн веськöдлöма бара жö избач Горчакова, и ёнакодь гудыртлöма сиктса олöмсö. Бöрас сiйöс партияысь вöтлöмны. Кодлöн вöлöм вурсян машина да самовар, найöс сiйö сюйлöма кулакъяс лыдö. Заводитлома кулакавны и Вишерский попöс, кодлöн видз ни му абу вöлöма. 1931 воын партячейкаса секретарöн вöлöма Митюшов П. Г.  Ас сиктса коммунистъяс татшöм уджсö абу нуöдлöмны, а гашкö и районсянь налы эз эскыны. Партия эськö пыр ставсö быттьö вöчлöма йöзлы бур вылö, крестьяналысь уджсö кокньöдöм могысь. Сöмын тайö вöчсьылöма лёк ногöн и гöгöрвотöма мырдöналöмöн.

1930 воын колхозъясö öтувтöмны уджалан кöлуй да кöйдыс. 1931 во помын öтувтöмны скöт, кодъясöс видзлöмны крестьяналöн картаясын. Мöдлапöвса "Клевер" колхоз да Погостса "Водзлань" öтувтчöмны. Колхозъяслы ёна коланаöсь вöлöм сяммысь юралысьяс, бур тшöтöводъяс. Сэсся колхозъяслы тшöктöмаöсь унджык вöдитны шабдi. Няръявтöм шабдicö нуны Кунибö — сэнi лöсьöдöм заводö, кодöс районын стрöитлöмны промышленность кыпöдöм могысь. Шабдi вöдитöмыс корлiс ыджыд тöждлун: ас кадö кöдзны, нетшкыны, чулльыны, кöтöдны... уджыс тырмылiс пöрысьяслы и челядьлы. Колхозъяс босьтчисны вöдитны уна выль культураяс: морков, мöс сёркни, вика, подсолнух. Колхозъясö воалiсны машинаяс: ытшкан да куртан, кöдзан да вундан, кöйдыс тöлöдан, нянь вартан. МТС–лöн тракторъяс гöрисны му, весалiсны выль местаяс, лэптiсны эжа. Йöз аддзисны сьöкыд уджъяслысь кокняммöмсö. Ёнмис олöмлöн подувыс.

Но таöдз вöлöмны на йöзöс шызьöдана уна вöвлöмторъяс. На пиын медводз вöр лэдзöм паськöдöм. Тайö уджыс сиктса йöзлы эз вöвлы выльторйöн. Сьöм нажöвитны важысянь ветлывлöмны сортöвöй вöр пöрöдан да кылöдан уджъяс вылö купечъяскöд да промышленникъяскöд сёрнитчöмъяс серти. Сöмын став тайö уджыс вöчсьылöма ас вöляысь. Гражданскöй война помасьöм бöрын страналы ковмылiс лэптыны киссьöм овмöс, а та вылö колö вöлi уна сьöм. И медводз сiйöс корсьлiсны граница сайö вöр вузалöм весьтö, мый понда вöрсö ним–пены весиг "веж зарниöн". Сиктса йöз вöр лэдзан удж вылö абу долыда мунöмны — этша дон мынтöмла да омöль олан условиеяс вöсна. Вöлöсьтса исполкомын уджалысьяслы ковмылöма ветлыны керкаысь керкаö да корсьны вöрын уджавны кöсйысьясöс. Быд чукöртчылiгöн мунлöма та йылысь сёрни. А 1929 восянь, кор пансис медводдза пятилетка, вöр пöрöдöмыс комиын лоöма медыджыд могöн. Чуклöмын вöлi лöсьöдöма обросовскöй (бöрынджык лои Чухломскöй) вöрпункт. Вöр участокъяс воссисны улдор и велдор лобöсын, улдор и велдор Ёльын, Волльын и Обросовын. Карсянь и районсянь волывлöмны удж йöткысь утюлномоченнöйяс. Ковмывлöма мöдöдны вöрö уна колхозникöс (весиг семьяясöн) да вовъясос колхозлöн жö кöрымöн. Вöрын йоз олiсны баракъясын, вöвъясöс видзисны понö льöн тупкалöм гидняясын.

Такöд тшöтш 1929 воын Чуклöмса вöрпунктын вöлöма нин 30 кадраö пырöм уджалысь. И налöн лыдыс век содöма колхозникъяслöн ворса кадраö пырöмöн. 1936 воын вöр участокъясö вайисны лучковöй пила, кодi кокньöдiс вöр пöрöдöмсö. Но кылöдчан да пуръясян уджъяс вылö век на тшöктöмöн мöдöдлiсны сиктса йöзöс.

Война воясö вöр заптан—кыскан да пуръялан планъяс абу чинтывлöмны, сiйö вуджис нывбабаяслöн, том зонкаяслöн да нывъяслöн пельпом вылö. Сöмын война бöрын, 1953 восянь став тайö уджыс лои промышленнöй подув вылын, бурджык олан условиеясöн да кадровöй уджалысьясöн. Корöм — медалöмöн уна йöз воалiсны Ёльбаза вöр посёлокö страна пасьталаысь. Вöр пöрöданiнъясын уджалiсны и война бöрын мыждöмаяс. Унаöн на пиысь сэтчö и кольччисны овны.

1925–27 воясö мунлöма сiдз шусяна "зырянизация", кодыр ковмылöма сёрнитны комиöн и документъяс гижны коми кыв вылын. Архивысь татшöм гижöдъясыс сюрöны жö. Бур, мый тайö регыдöн помасьлöма. Рочысь комиö вуджöдöмыс корлöма кык мында кад, да и литературнöй кыв бура тöдысьяс сэки эз на и вöвны. 1934 воын районын "эрдöдöма" троцкистскöй организация, кытчö веськавлöмны и чуклöмсаяс. Сиктын чужлöм, быдмöм, этша на велöдчылöм Степан Иванович Зиновьевöс, кодi партияö пыралöма армияын служитiгöн 1928 воын да сиктсöветса уджалыссянь быдмылöма райкомса мöд секретарöдз, удж вывсьыс и партияысь вöтлылöмны и судитлöмны 5 во кежлö. 1958 воын сiйöс реабилитируйтöма да бöр примитöма партияö важся стажнас. Cыкöд тшöтш пуксьöдлöмны куим во кежлö Василий Александрович Малыгинöс, кодi уджавлöма МТС–ын. Пукалiгас нин сiйöс мöдысь судитлöмны да лыйлöмны. Пуксьöдлöмны и С.И.Зиновьевлысь Василий воксö. Öнi ставнысö найöс мыжысь мездöма.

1933 воын Старечъяг пöчинöкын сотчылöма ичöтик рудзöг сёрöм, "Ударник" колхозлöн амбарын тшыксьылöма 61 пуд сю. Та бöрын сиктысь корсьöмны "врагъясöс". Районын и сиктъясын мунлöма уна сёрниа кампания: власьт бердысь, партия да комсомол радъясысь ковтöм йöзöс вöтлöм могысь. 1937 воын выль олöмлы паныд сёрниясысь сиктысь нулöмны да судитлöмны вöвлöм манак–манашкаясöс да юсьöм нин Восток Öльöксейöс. Татшöм олан серыс сиктса йöзлы долыдлун, дерт, эз вайлы.