Чуклöм: Му-видз вöдитöм

Чуклöм: вежаинъяс, ловъя нимъяс.— Сыктывкар, 2001, 113 л.б.
(сиктлы 400 во тыригкежлö) П.И.Сельков

книгакнига


Оз вун некор сиктса олöм,
Век син водзын гажа Чуклöм — чужанiнöй...
Ичöт Иван (И.И.Сажин), 1927 во.

Чуклöмын, кыдзи и мукöд коми сиктъясын, муяс абу вынаöсь. Переписьяс дырйи гижысьяс донъявлöмны найöс шöркодьöн да омöльöн. Дерт, Чуклöмö йöз овмöдчылiсны видз–му вöдитöм вылö надеяöн. Чуклöм йылысь медводдза гижöдын пасйöма: "земли паханые, середние, две чети в поле, а в дву по тому же". Тайö гöгöрвосьö, мый öти му (1,09 га) рудзöг улын, сымда жö ид да зöр улын и нöшта сымда шойччö (коськöм). Сiдзкö, олысьяслöн муыс вöлöма нин 3,27 га. Вöдитлöмны муяссö куимысь вежлавлöмöн. Но и тайö бура вынсьöдтöг бур урожай оз сет. Колi видзны тырмымöн скöт.

Чуклöмсалы пыр отсавлöмны весалöм "переложнöй" му да тыла вöчан системаяс. Важ йöз бура тöдлöмны, мый тыла вылын да гöрöм эжа вылын урожай быдмöджык. Тыла вылын, кыдзи пасйö коми учёнöй П.Г.Доронин, рудзöглöн урожайыс 30–40 сям, а вынсьöдтöм му вылын сöмын 3–4 сям. Шöркодь урожайöн крестьяналöн лыддьывсьöма 6–8 сям. Вöрысь (раскысь) весалöм местаын гöрлöмны эжа. Медводдза урожайыс сэн бура волöма. И мöд вонас сiйö муыс урожайсö сетлöма на, а сэсся вынсьöдтöг изгармö. Крестьяна эновтлöмны татшöминъяссö выльысь эжсьöдöм вылö. Чуклöмын татшöм муяс вöвлöмны Ключ да Протока костса шор бокъясын, Жуодбок да Старечьяг нöрыс бокъясын, Ёгул ю пöлöн. Öнi татшöм местаясыс вöрсялöмны, водзтiджык эновтöм муяс вылын быдмывлiсны ягвыв рыжик да масленник.

Чуклöмса крестьяна тадзи уджавлöмны видз–му вылын 200 воысь дырджык, вöлöсьтъяслы межаяс лöсьöдтöдз, да и бöрынджык на. Тыла да выль муяс вöчöмöн йöз кутöмны овны бурджыка, тшыгъявтöг. Позьö чайтны, мый Чуклöм заводитiс ёнджыкасö сöвмыны тайö 200 во бöрас. Йöз лыд сиктын содiс, содiс и видз–муöн паськöдчан коланлуныс. Генеральнöй межеваниесянь государство босьтöма аслас киö вöр–ва и му, лöсьöдöма на бöрся видзöдысь уна сикас учреждениеяс.

Видзъяс чуклöмса лöсьöдлöмны юяс да шоръяс кузя, кодъяс артмывлöмны тылаяссянь да весасъяссянь. Тайö тыдалö и видзъяслы пуктöм нимъясысь: "Йöнма тыла шор видз", "Шома тыла шор видз", мукöд татшöм сяма жö нимъясысь, кодъяс йитчöмны шоръяскöд, юяскöд, коджъяскöд, тылаяскöд, видз вöчысьяслöн нимъяскöд. водзтi
чуклöмса и межадорса крестьяна овлöмны гырысь семьяясöн: пöльяс, пиян, мунтöм нывъяс, внукъяс, племянникъяс (кувсьöм пилöн либö рекрутлöн челядь). Овмöсын медыджыд арлыда айсö и лыддьывлöмны переписьяслöн гижöдъясын овмöсса кöзяинöн. Овны и уджавны тадзсö вöвлöма кокниджык. Муяс да видзъяс паськöдан удж абу öткалы. Тасянь и петö сиктса общинаöн видз–му вöдитöмыс. Сэсся öд сиктъясын нöшта пыр эмöсь уджъяс, кодъяс вöчсьöны став олысьясöн.

Миян муяс вылын медбур урожай сетлöмны сю да ид. Шобдi 19 нэмын вöдитлöмны жö нин, но сiйö частöджык, кыдзи и зöр, абу артмылöма и ковмылöма вотöгыс ытшкыны. Шабдi да кöнтусь быд овмöсын вöдитлöмны сöмын аслыныс коланiнö. Картупель вöдитöм тыдовтчис 19 нэмлöн мöд джынйын. Нöшта вöдитлöмны лук, сёркни да капуста. А вот морков, свеклö да öгуреч быдтöм йылысь гижöдъясын медводзысь пасйöма сöмын 1901 воын.

Урожай артмытöмъяс корöмны быд вöлöсьтын лöсьöдавны нянь запас магазин (магазея), конi эськö мед видзсис крестьянаöн норма серти чукöртöм нянь. 1882 вося тöв шöрын (январын) межадорса магазеяын 685 лов вылö вöлöма 640 пуд сю да 370 пуд ид. Нöшта вöлöма 76 пуд крестьянаöн мынтытöм уджйöз. Таысь öтдор магазеяас видзлöмны 1870 вося "высочайшöй пожертвование" — 95 пуд сю да 48 пуд ид.

1882 воыс вöлöма урожайтöм и чуклöмса 21 овмöсысь кöзяинъяс шыöдчöмны магазеяысь уджйöзöн нянь сетöм могысь, босьтöмны дасöн. Мукöдъяс кыдзкö тырмöдчöмны.
Межадор магазеяысь земскöй управа тшöктома сетны — жертвуйтны 140 пуд нянь нювчимсалы.

1886 воын урожай вöлöма ёна бурджык. Правленньöлöн гижöдысь тыдалö, мый вöлöсьтын кöдзлöмаöсь 990 четверик кöйдыс, чукöртöма 6600 четверик. Став олысьыслы сёйны сёйöм вылö вонас колö 2710 четверик, кöйдыс вылö 990 четверик. Лишнöйыс кольö 2900 четверик. Кодсюрö лишнöй няньсö вузалас, но унджыкыс колясны урожайтöм вояс кежлö. Сiдзкö, нянь запас лöсьöдлiсны и крестьянскöй овмöсъясын. Но быд крестьянинлöн тадзсö эз артмыв.

Генеральнöй межевание серти (1784 вося) крестьяна пöльзуйтчывлöмны 251 десятина 2151 сажень гортдорса да гöрöм муöн, 290 десятина 2130 сажень виддзöн. Сё во мысьти — 660 десятина му да 500 десятина видз. Тайö вот мынтана лыдпасъяс. Видз–му вöдитöм да урожай бöрся Земство видзöдöма. Вöлöсьтса правленньöяслы тшöктылöма быд тöлысь сетны юöръяс нянь да турун быдмöм йылысь. Бöрынджык татшöм юöръяссö кутöмны корны тöлысьнас кыкысь да и унджыклаö.

1891 вося моз (август) толысьын Межадор вöлöсьтса правленньö юöртö, мый бöръя кык вежонас поводдя вöлi кöдзыд, нянь дугдiс быдмыны, зэръяс эз лэдзны пуктыны турун. Мöд юöрысь тыдалö, мый моз тöлысьын поводдя пыр вöлi кöдзыд, лун —космöсöн зэрис, пужъявлiс. Нянь идравны петöмны моз 17 лунö, но омöль поводдя вöсна абу на ставсö идралöма. Рудзöг воöма бурджык, сöмын тусьыс посни, вотöм на. Зöр да шобдi вотöмысла ковмис ытшкыны. Во помса юöрын пасйöма, мый сёйны и кöйдыс вылö нянь этша. Лыддьöдлöма 186 овмöс, кодъяслöн няньыс оз тырмы, на пиын чуклöмса 48 овмöс. 1892 вося рака (март) 21 лунö Земскöй управа тшöктöма сетавны магазеяысь водзöсöн 42 четверть 1 четверик сю сёйны да кöйдыс вылö 52 четверть 2 четверик сю да 100 четверть 4 четверик ид.

1894 воын чуклöмса 42 овмöсысь бара корöны удждывны 22 четверть 1 четверик рудзöг да 18 четверть ид. Урожайыс бара вöлöма омöль.

1896 воö вöлöсьтын няньöн кöдзлöмны 434 десятина му, картупель пуктылöмны 18 десятина. Быд десятинаö кöдзлöмны 8 четверик рудзöг, 12 четверик ид, 15 четверик зöр, 10 четверик шобдi и 24 четверик картупель. Урожайсö босьтöма: 1320 четверик рудзöг, 1097 — ид, 175 — зöр, 11 четверик 2 четвертак шобдi, 1296 четверик картупель. Таысь тыдалö, мый рудзöг воöма 6 сям, ид — 4, зöр — 2,5, шобдi — З, картупель — 3 сям. 64 десятина виддзысь турун волöм 35 пудйöн, ставсö пуктылöмны 176400 пуд турун. Локтан вонас виччысьöны бур урожай, правленньö юöртö уездö: рудзöг лоö 7 сямöдз, ид — 8 сямöдз, но турун урожай омöльджык.

1899 воын урожай бара ичöт. Поводдя вöлöма зэра, турун ытшкöма джынсö, 15 додь гöгöр нуöма ваöн. Скöт кутас тшыгъявны, ковмас лыдсö чинтыны.

Вöлöсьтса крестьяна тыла вöчлöмны лесничествокöд лöсьöдöм договöр серти. Доныс десятина тыла местаысь 1895 воын вöлöма 5 шайт 60 ур, и тайöс абу шулöмны донаöн. Сiйö вонас 10 морт босьтлöмны тыла улö 8 десятина. 1903 воын чуклöмса крестьяна тыла местаяс босьтлöмны Чик–чи шор бокысь 375 сажень, Пöтап шор бокысь 296 сажень, Гадь йылысь — 1376 сажень, Йöнма тыла шор бокысь — 180 сажень, Ёгул бокысь — 375 сажень, Старечьяг бокысь 528 сажень.

19 нэм помын Межадор вöлöсьтын вöлöмны 5 бöбыль семья, кодъяслöн абу вöвлöма видз ни му, скöт ни баля. Татшöмъясöн вöвлöмны дöваяс да чурка вайысь нывбабаяс, кодъяс овлöмны йöзлы уджалöмöн.

Видз–му вöдитöмкöд топыда йитчöмны семья костса юксьöмъяс, сиктса крестьяна костын видз–муöн выльысь юксьöмъяс (землеустройство), выль оланiнъясö да Сибырö мунöмъяс. Генеральнöй межеваниесянь сё во чöж семья костса и сиктын крестьяна костса юксьöмъяс абу вöвлöмны коланаöн. Сиктса обществоыс тайöс абу кöсйылöма сы вöсна, мый юксьöмъясыс быттьöкö вайöдасны омöльторйöдз.

1876 вося рака (март) 18 лунö петöма семья костын юксьöмъяс йылысь закон, код серти писарлы тшöктöма лöсьöдны выль посемейнöй список. 1888 воын уездсянь та йылысь воöма выль тöлкуйтöм, код серти вöлöсьтса правленньö тшöктытöг овмöсын муяс юкны оз позь, оз позь юкны му–видз и бать сöгластöг.

Но йöз олöм — век аслас кадся олöм, и сiйö корö ас кадся вежсьöмъяс. 1891 воын межадорса Микулинъяс кык вок костын юксьöм вöлöма зэв ыджыд зыка. Гижасьлöмны уездö, сэсянь выльысь тшöктылöмны видлавны юксьöмсö. Ковмöма овмöсысь ставсö гижавны да юкны став эмбурсö бекар — паньöдз. Чуклöмса крестьяна — вокъяс костса юксьöмъяс видлавлöмны жö вöлосьтса судын. Сэсся 1901 вося моз (август) 20 лунö вöлöсьтса скод шуöма законлы лöсяланаöн семья костса став юксьöмъяссö, кодъяс вöлöмны таöдз. Тайö петкöдлö, мый гырысь семьяясöн важся уджалöм вежсис. Выль семьялы колö видз–му, батьлысь сiйöс юкöмöн вотчинаыс чинö, лоöны унджык межаяс, чужöны венъяс, зыкъяс. Найö тшöктöны лöсьöдны сиктын выль землеустройство, либö мунны выль оланiнъясö, вöрзьыны Сибырö.

1870 воö на высочайшöя вынсьöдöм правилöяс серти государственнöй крестьяна му–видз тырмытöм вöсна вермылöмны корны казеннöй дачаысь муяс. Найö сетсьылöмны "владеннöй" гижöд да лöсьöдöм план серти. Выль местаö вуджысьяслы сетлöмны и кокньöдöмъяс: медводдза куим вонас вот оз мынтыссьы, мöд куим вонас колö мынтыны джын вот. План да "владеннöй" гижöдысь ковмылöма вештыны 2 шайт 50 ур. Крестьяналы тайö сэки вöлöма ыджыд сьöмöн, дай ылi сиктсянь корсьны татшöм кабалаяссö грамöтатöм крестьяналы вöлöма сьöкыд. Выль олан местаяс кокниджыка позьлöма босьтны вöлöсьтлöн межа пытшкысь.

Сибырö мунысь государственнöй крестьяналы сетлöмны жö кокньöдöмъяс: кöрт туй кузя мунö мыс вöлöма джын донысь, да и сэнi, места вылас, локтысьясöс примитлöмны бура.

1901 вося вöльгым (ноябрь) тöлысьын губерняса госимуществоöн веськодланiнö шыöдчöмны Фёдор Сельков (Петыр Педöр) да Алексей Сажин (Емель Миколай Öльöш).

Жуöдбокö вуджöм йылысь. Тшöктöмаöсь шыöдчыны уездö. Сэнi пö лоö лöсьöдöма выль оланiнъясö вуджан местаяс. Сiйö воас жö Лука Миколай, Парпоней Васька да Воньö Степан (Сельковъяс) шыöдчылöмны Вурк—кöджö (Яль—ягö) вуджöм йылысь. Вöлöсьтса скод шуöма, мый йöз содöм вöсна вотчинаяс чинöны и Вурк—кöджö вуджöмсö вынсьöдны. Тайö скод вылас жö лэдзöны овмöдчыны Фёдор Сельковлы да Алексей Сажинлы Жуöдбокö. 1903 вося ода кора (май) 28 лунö скод видлалöма Иван Митрофанов Лапшинлысь Джуджыд Нöрысö овмöдчöм йылысь шыöдчöм, нёль десятина торйöдöмöн. И, дерт, шыöдчöмсö лои могмöдöма. Татысь тыдалö, мый выль местаясö овмöдчöмсö бöръя кадö лои ёна кокньöдöма, шыöдчöмъяссö видлавлöма öдйöджык.

Революция бöрын выль местаö крестьяналöн вуджöмыс нöшта на лои кокньыдджыкöн. 1918 вося инструкцияын пасйöма: "установление расселения в каждом отдельном случае предоставляется волостным земским отделам, постановления которых утверждается уездными земскими отделами". Коми обласьтса Земскöй комитетысь коллегиялöн 1921 вося решениеын шуöма: "право на разработки новых распашках и расчистках имеет каждый гражданин на всех свободных пустолежащих и лесных пространствах...". Корöм серти местасö сетлöма вöлöсьтса земотдел, а вöр дачаын — лесничöй, обкомзем тшöктöм серти. Со и уськöдчисны война вылысь локтöм том йöз овмöдчыны выль местаясö. Регыдöн оланiнъяслöн лыдыс содiс матö кык пöв.

Кызьöд нэм заводитчигöн ёна содома и чуклöмсалöн Сибырö вöрзьöм–мунöм. 1900 вося кос му (апрель) толысьын Афанасий Фадеев Сельков (Падей Опонь) корö лэдзны Сибырö: вотчина ичöт, вит челядь, висьысь гöтыр. Уездса чиновник шыöдчöм вылас гижöма: "позьö лэдзны öтнассö места корсьны". Öшым (декабрь) толысьын сiйö жö вонас Алексей Мартынов Сажинлöн (Мартын Öльöш) шыöдчöм вылö Земскöй начальник гижöма: "переселенческое движение в Сибирь приостановлено".Тайö тöлысьнас жö Пётр Кириллов, Емельян Семенов да Алексей Мартынов Сажинъяс шыöдчöмны Бачанскöй вöлöсьтса правленньöö (Кузнецкöй уезд, Томск губерния) и корöны скодлысь Александровка сиктö найöс примитан приговöр. Сiйöс лöсьöдöм да ыстöм вылö мöдöдлöмны 15 шайт. Но Александровкаса общество öткажитöма и сьöмсö бöр бергöдöма. 1903 вося рака (март) 16 лунö Белоусовскöй вöлöсьтса правленньö сетöма сöглас примитны овны Евстафий Яковлев Сажинлысь семьясö. Сибырö мунан "гыыс" межадорсаöс и чуклöмсаöс нöшта дыр на гызьöдöма.

Кадыс вежсьö, государственнöй му вылын крестьяналöн уджыс эз кут мунны, сöвмысь капитализм писькöдö — корö вежны видз–му вылын уджаланногсö. И та кузя лоöны тшöктöмъяс. 1911 вося лöдаза — номъя (июнь) 19 лунö губерняса му—видз мурталан управление ыстö уездъясö тшöктöм, код серти сиктса обществоöн видз–му вöдитöмсö колö вежны öтка, торъя овмöсъясöн. Шуöма öдйö нуöдны му–видз мурталан уджъяс да отсавны йöзыслы торйöдчыны öтка овмöсъясö. Та могысь Чуклöм сиктö локтöма му–видз мурталысь Протопопов. Сiйö бура тöдмасьöма видз–муясöн да найöс выльысь юклан позянлунъясöн. И та йылысь сiйö вöчöма со кутшöм гижöд (вайöдсьö ставнас рочöн):

1. В Чухломскöй волости имеется 19 селений, по окладному же листу — одно селение "Чухломское". Домохозяйств в волости 230 и столько же дворов. Список наличного мужского населения на 1.1.1914 г. не составлялся.

2. Чухломская волость находится в даче села "Межадорское с деревнями" к западу от Межадорскöй волости в расстоянии 16 верст, до города Устьсысольска 98 верст, расположена по речке М.Визинга, впадающей в Реку Сысолу.

3. С юга, запада, севера и северо–востока к волости прилегает казенная лесная дача Сысольского лесничества, а с юго–востока — земли крестьян Межадорской волости.

4. Чересполосности с Межадорскöй волостью в пашне нет, а имеющаяся чересполосица сенокоса весьма незначительна и может быть уничтожена, как выяснилось из расспросов сторон, без особых затруднений.

5. Среди владений волости частно –владельческих дач нет, за исключением земель причта и церкви. Сведение пахотной земли причта к одному кусту возможно вполне. Сенокос причта находится в 11 участках, а покос церкви — в 36 участках. Здесь следует отметить, что значительная часть церковных участков пожертвована крестьянами из оброчных статей и находятся в казенной даче. Сведение причтовых и церковных покосов к одному куску, как выяснилось из переговоров на сходе крестьян со священником, будет затруднительно и даже вряд ли возможно.

6. Ознакомление с селениями волости в натуре и, принимая во внимание расположение их относительно друг другу, расстояние между ними, расположение пахотных и сенокосных земель, количество домохозяйств в них (есть селения, в коих 1–2 домохозяина), я полагал бы при земельном устройстве разбить все селения волости на 5 групп:
I группа — Керос, поч. Петыр Тыла, Семенчик, и Гадьчойул;
II группа — Кырул, Грезд, Гадь, поч. Джуджыд Нöрыс, Кузь тыла и Уличпон;
III группа — Ключ и Погост;
IV группа — д. Ягдор, п. Жуодбок и Велтас Дал;
V группа — д. Старый Чухлом, поч. Мыльк, Важ пушуп и Жуод.

7. Пашнею и сенокосом крестьяне владеют чересполосно, особых, отдельных участков пашни в одном селении не составится. Для обмена участков, расположенных чересполосно, установлены следующие разряды и размеры зачета одного разряда пашни и сенокоса другим: 3–й, 4 —й, 5 —й, б —й, 7 — й равны 1, 1½, 3, 4 саженям или воза.

8. Большинство сенокосов крестьян находится в казенной даче на оброчных статьях лесного ведомства по речкам Воли, Ёгула, Малой Визинге с притоками и др. По реке М.Визинга сенокосы, арендуемые крестьянами Чухломскöй волости, тянутся почти на 100 верст.

9. Дополнительные наделы крестьяне желали бы получить по смежеству с их фактическими владениями вверх по р. М.Визинге, захватив часть арендуемой ими оброчной статьи по р. Ёгулу, смежно же с имеющим быть отведенным дополнительным наделом крестьян Визинскöй волости. Лесные наделы так же я полагал бы применительно к желанию крестьян, отвести по реке Малой Визинги".

Тайо гижöд серти уджъяссö вöчöм могысь вöлöсьтса правленньö (старшина И.Л.Сельков, писар Воронцов) 1914 вося рака (март) 13 лунö нуöдома сиктса скод. Бöрйöмны му–видз донъялысьясöс. Вежласьöм могысь му–видзсö юклöмны вит пöлöс вылö: öти пöлöс бур, мöд — шоркöдьысь бурджык, коймöд — шöркодь, нёльöд — шоркöдьысь омольджык и витöд — омöль. Вежласигöн öти сажень (бур) му откодяссьö öти да джын мöд (шöркодься бурджык) сортакöд, кык сажень коймöд, куим сажень нёльöд да нёль сажень витöд сортакöд. Видзьясöн вежласигöн сы ногöн жö артавсьоны турун додь лыдöн.

Орчча вöлöсьтъяскöд межаяс лöсьöдöм могысь бöрйылöмны куим довереннöйöс: Ключысь — Михаил Степанов Сажинöс, Погостысь — Митрофан Прокопьев Зиновьевöс и Важ Чуклöмысь — Алексей Андреев Сельковöс. Вöлöсьтса крестьяналысь видз–му вежлалiгöн донъясьысьясöн бöрйылöмны Михаил Степанов Сажинöс (Гадьдьысь), Николай Васильев Сажинöс (Ключысь) и Егор Петров Сельковöс (Важ Чуклöмысь). Скод вылас шуöмны сiдз жö, мый öти десятина виддзысь шöркодя босьтсьö öти додь турун, десятина му вылö кöдзсьö 6 пуд сю, 9 пудйон ид да зор. Скод вылас бöрйылöмны и уполномоченнöйясöс: Александр Васильев да Тихон Никитин Сажинъясöс и Степан Семенов Лапшинöс, кодъяслы сетöмны гырысь правояс донъясигöн вензьöмъяс да норасьöмъяс видлалiгöн: "Куимсьыс кыкыс кö шуасны öтмоза, вензьыны ог кутöй, вöчам на шуöм серти". Сэсся та дiнö лöсьöдöма быд деревня да пöчинöк торйöдöмöн став 230 овмöс кутысьяслысь ним — овсö, кытысь тыдалö, кымын овмöсаöсь вöвлöмны сэки грездъясыс да пöчинöкъясыс и кодъяс кутлöмны овмöсъяссö.

Му–видз мурталöмлöн да выль ног юклöмлöн помыс архивын эз тыдовтчы. Та йылысь некутшöм документ (акт ли мый ли) абу. Колö чайтны, мый тайö ыджыд уджсö эз ло помалöма война пансьöм понда. Война вылö тышкасьны мунöмны и вöлöсьтса староста, и ставыс, кодъясöс скодъяс вылын бöрйылöмны став индöм уджсö вöчысьясöн: донъясьысьясöс, уполномоченнöйясöс, межа вöчысьясöс и, дерт жö, асьсö му–видз мурталысьсö.

Сиктса и вöлöсьтса крестьяналöн му—видз вöдитöмыс пыр топыда йитчылöма овмöсъясын скöт видзöмкöд. Му вынсьöдтöг нянь волöма лёка, та дiнö содтöд кынмавлöмъяс ёна майшöдлöмны йöзсö. А му вынсьöданторйöн вöвлöма сöмын куйöд. Куйöд тырмытöмла ковмылöма весавны тылаяс, горны эжаяс, кодъяс зэв регыдöн изгармывлöмны. Тайö уджыс вывтi сьöкыд, да и муыс и тылаыс гортсянь век ылыстчö. Коськöмъяс улын эськö пыр жö вöвлöмны муяслöн колана юкöнъяс, кöдзлывлöмны и му вынсьöдана турунъяс. Сöмын сьöкыдлунъяссö тайö абу бырöдлöма.

Скöт видзöмöн да муяс куйöдалöмöн урожайяс лоöны бурджыкöсь. Скöт колö нöшта уджалöм да сёян–юан бурмöдöм вылö. Вöвтöг видз–му удж бергöдны эз скодитчыв. Овмöсын скöт лыд йитчывлöма абу сöмын нянь урожайкöд да сёян–юанкöд, но и турун урожайкöд да семьялöн сiйöс заптан верманлункöд. Турун кö быдмас омöля, скöт лыд ковмылöма чинтыны и мöдарö — турун кö быдмис бура, скöт лыд содö.

Му вынсьöдан куйöд крестьяналы век абу тырмывлöма. 1895 вося юöрын вöлöсьтса правленньö пасйö, мый скöтлöн лыдыс овмöсъясын тырмана, а му вынсьöдöм вылö этша. Сэсся тайö жö гижöдас земствосянь юалöм вылö пасйöма со мый: öти лова овмöслы тырмö öти вöв, куканя — мöска, кык ыж; кык лова овмöслы — öти вöв, 4 мöс, 5 ыж; куим лова овмöслы — кык вöв, 5 мöс и 9 ыж; нёль лова овмöслы — кык вöв, 6 мöс да кукань, 9–10 ыж. Тайö, гашкö, тырмана скöт лыд семьялы, но куйöд вылö абу. Ыджыд семьялы колö и уна бурмöдöм му.

Скöтлы потшöм пöскöтинаяс вöлöсьтын ёна важöн абу вöвлöмны. Потшöса пöскöтинаяс сикт — деревня гöгöр лöсьöдлöмны сёрöнджык, скöт юр лыд содöмъяс бöрын. Скöтсö гожöмнас лэдзлывлöмны асьнысö, а турун пуктöм бöрын — видзъяс вылö. Скöтöс вöрö лэдзöмысь пуктылöмны гырысь штрапъяс. Та бöрын и ковмöма лöсьöдавны потшöса пöскöтинаяс. Сикт—деревняяс гöгöр потшлiсны суйöр коръя да лыска том пуяс пöрлöдлöмöн да быд во потшöссö содталöмöн. Видз–му вылö скöт эз веськавлы, сöмын арнас да водз тулысын йирсьöдлiсны видзъяс вылын.

1876 воын Межадор вöлöсьтын вöлöма 419 вöв, 1359 мöс да 2007 ыж. 1891 воын зверъяс cёйöмны 5 мöс, öти кукань, öти вöв, 220 ыж — ставсö 540 шайт дон. Травеж вылын кыйöмны öти ошкöс.

1899 воын вöлöма нин 560 вöв, 85 чань, 1800 мöс да 180 кукань, 2500 ыж и 10 порсь. Пасйöма, мый тайö вонас унаöн скöт лыдсö кык пöв содтöмны. 1901 воын вöлöcьт улын вöлöма 649 вöв да 70 чань, 1780 мöс да 187 кукань, 1925 ыж. На пиысь Чуклöмын 212 вöв да 25 чань, 520 мöс да 55 кукань и 650 ыж.

Дерт, шöркодя лыддьöмöн ставыслысь олöм донъявны оз позь. Вöвлöмны бурджыка и омöльджыка олысьяс. Пасйим нин, мый 1882 воын Егор Сельковöс овмöсö пыртiгöн Ведень овмöсын вöвлöма 1 вöв, 6 мöс, нёль ыж. 1907 воын Ерö Митрей кувсьöм бöрын овмöсас кольлöма 2 вöв да чань, 12 мöс да 2 кукань и 10 ыж. Тайö шöркодя и бура нин олысьяс. Вöвлöмны омöльджыка олысьяс и бöбыльяс.

Мырсьöмöн нэм олiгон крестьянинлы пыр ковмывлiсны тöварöн вежласьöмъяс. Совтöг, юмовтортöг, мичаджык новлантортöг, кöрта кöлуйтöг олöм эз артмыв. Да и ассьыс лишаланторсö (прöмыс ли, нянь ли) колö вöлi вежлавны–вузавны. Межадор вöлöсьтын вузасьöм ёна нин паськавлöма. Водзтi сэтчö ю кузя и мир туй кузя волывлöмны ылi каръясса вузасьысь–ньöбасьысьяс. А 19 нэмлöн мöд джынсянь танi аслас магазинъясын вузасьлöма роч винаöн да мукöд тöварöн мöд гильдияа карса купеч Латкин.

Вузасьны мöдöма и межадорса крестьянин, отставнöй писар Александр Гурнев Морозов (Гурей Öльöксан), кодi бöрынджык лоöма тодчана купечöн. 1894 воын вöлöсьтса скод сетлöма сылы позянлун вузасьны роч винаöн кык сюрс шайт дон да кыксё шайт доходöн. Вузасьöмсö сiйö бура нин паськöдлöма. Тöварсö вайлывлöма абу сöмын Устьсысольскысь да Вяткаысь, но и европаса каръясысь.

1894 восянь вöлöсьтын вöлöма нöшта посни тöварöн вузасян вит лавка, кыкыс на пиысь Чуклöмын. Дыркодь вузасьлöмны чуклöмса крестьяна Логин Иван Степö, вöлöсьтса скод тшöктöм серти, да Öльöш Прокö (Сажинъяс), уездса управасянь тшöктöм серти. Вузасян оборотыс кыкнаныслöн вöлöма ветымын шайт дон, а доходыс вит шайт вонас. Тöварсö вайлöмны Устьсысольскысь да Вяткаысь. Сöмын купечъясöдз найö абу волöмны.

Революция бöрын вузасьöм–ньöбасьöмсö котыртöма потребительскöй обществоöн. Асшöр вузасьöм помасис.