Чуклöм: Вöлöсьт да сиктса котыр

Чуклöм: вежаинъяс, ловъя нимъяс.— Сыктывкар, 2001, 113 л.б.
(сиктлы 400 во тыригкежлö) П.И.Сельков

книгакнига


Оз вун некор сиктса олöм,
Век син водзын гажа Чуклöм — чужанiнöй...
Ичöт Иван (И.И.Сажин), 1927 во.

Пасйöма нин, мый Волся (Вотча), кыдзи важся сикт, вöвлöма "сысоличъяслöн" шöринöн. Сэсся 1837—38 воясын Россияын вöлöма сiдз шусяна Киселевскöй реформа. Сы серти Межадор и Чуклöм пыравлöмны Визин–Троицкöй вöлöсьтö, кытысь бöрынджык торъялöма Межадор вöлöсьт. Та могысь 1867 вося ода кора (май) 22 лунö Межадорса да Чуклöмса ревизскöй ловъяс нимсянь чукöртлöмны ыджыд юксян скод (собранньö). Тайö скодыс тшöктöма (приговоритöма) юксьыны Визин вöлöсьтысь да лöсьöдны Межадор вöлöсьт. Скод вылас вöлöмны Чуклöмын олысь крестьяна: Иван Зиновьев, Андрей Лапшин, Тимофей да Михей Сажинъяс.

Скод вылын бöрйылöмны правленньö, кодi кывкутöма скод водзын жö, да и уезд водзын. Йöзлöн тайö медматыса власьт, и сылöн могъясыс вöлöмны зэв гырысьöсь и водзö содысьöсь. На пиын и видз–му лючки вöдитöм, и выль овмöсъяс лöсьöдöм, и ревизскöй ловъяс арталöм да сы серти вотъяс юклöм, рекрутö том йöзöс мöдöдöм, сиктъясын пöрадок кутöм, йöз костын кöртымъяс лöсьöдöм да сiдз водзö. Став тайö могъяссö олöмö пöртны скод вылын куим во кежлö бöрйылöмны вöлöсьтса старшинаöс, сiйöс вежысьöс, писарöс, вот чукöртысьöс, вöлöсьтса суд, нянь запас (магазея) дöзьöритысьöс, полицейскöй сотскöйясöс да десятскöйясöс, пожарнöй старöстаясöс.

Чуклöм первойсяньыс пыравлöма Межадор сиктса обществоö, и сылысь водзджыкся 300 во олöмсö Межадоркöд юкны оз позь. Сэнi межадорса вöравлiсны, XVII нэм заводитчигöн лöсьöдлiсны пöчинöк, примитлiсны медводдзаясöн овмöдчысь Сельковöс да Сажинöс, сэтчö жö овмöдчисны межадорса йöз. Мый вöчсьылiс Межадорын, сiйö жö вöчсис и Чуклöмын. И ставыс вöчсис сиктса община да вöлöсьтса правленньö отсöгöн. Межадор сöвмöдiс Чуклöмöс и ачыс тшöтш сöвмис. Чуклöмса том йöз пыравлöмны межадорса гöтырпуяслöн овмöсъясö и мöдарö — межадорса Лапшинъяс, Зиновьевъяс, Раевскийяс, Кутькинъяс и Полькановъяс овмöдчылöмны Чуклöмö. Да и видз–муыс и вöрыс 1784 воын мурталöм серти пырлöма öти лыдпас улö, та вöсна и вотъяс чуклöмса да межадорса крестьяналöн вöвлöмны öткодьöсь.

Медым государство вермис бурджыка видзöдны казеннöй муяс вылын да вöрын уджалöм бöрся, 1784—86 воясö Сыктыв кузя нуöдсьылöма ыджыд удж — вöлöсьтъяс косттi лöсьöдлöмны межаяс, сiдз шусяна "Генеральнöй межевание". Эм нöшта межеваниелöн карта — "Геометрическöй план", кодöс лöсьöдлöма штурман Пётр Захаров 1803 воын. Тайö документъясыс власьтъяслы (уездын и вöлöсьтын) пыр вöлöмаöсь вотъяс кузя ыстысянаöн.

Межадорса крестьяна пöвстын грамöтаа йöз, дерт жö, вöвлiны унджыкöн и правленньöö бöрйывлiсны сэтысьджык. Но и чуклöмсаöс та кузя скодъяс вылын абу жö бокö кольлöмны. 1873 воын вöлöсьтса старшинаöн бöрйылöмны Венедикт Лапшинöс, 1882 и 1887 воясын — Петр Миронов Сельковöс (Мирон Петыр). Сiйö абу тöдлöма грамота да кырымпас пыдди пуктывлöма "вöлöстнöй старшина" гижöда гöгрöс печать. Сiйöс вежысьöн вöлöма Яков Андреев Сажин, а нянь магазея бöрся видзöдысьöн — Андрей Григорьев Сажин.

Тайö каднас писаралöма Флор Максимов Мальцев, а сiйöс вежöма 24 арöса Василий Яковлев Морозов, кодi велöдчылöма Тотьмаса учительскöй семинарияын да сiйöс помавтöг локылöма гортас — Межадорö. Бöрынджык сiйöс бöрйылöмны земскöй да губернскöй гласнöйöн (депутатöн). В.Я.Морозовлы вештывлöмны медыджыд удждон — вонас 276 шайт. Ас тшöт вылас видзлöма сiйö писарлы отсасьысьöс. Ачыс нуöдлöма и крестьянскöй овмöс. Дерт, писаръяс вöчлiсны став колана уджсö.

Вот чукöртысьöн Межадор вöлöсьтын бöрйылöмны грамöтатöм чуклöмса Евдоким Васильев Сельковöс (Васька Öлдöк). Лоö шензьыны, мый татшöм уджсö вермылöмны бергöдны грамöтатöм йöз и кужлöмны торкасьтöг да лючки висьтасьны скодъяс вылын во гöгöрся удж йылысь. Чуклöмса крестьянаöс бöрйылöмны вöлöстнöй судьяясöн, полицейскöй сотскöйясöн и десятскöйясöн.

Вöлöсьтса скодлöн вöвлöма ыджыд власьт. Сiйö видлавлöма став могъяссö, кодъяс кыптывлöмны сиктса олöмын. Скодъяс нуöдсьывлöмны став ревизскöй лов нимсянь и сэтчö чукöртчывлöмны овмöсъясын гöлöс кутысь кöзяинъяс. Найö жö и вермылöмны кырымавны скодлысь шуöмъяссö. Сöмын грамöта тöдтöмъяс нимсянь кырымасьлöмны грамöта тöдысь крестьяна да ачыс гижысь писарыс. Кырымпасъяссö пуктытöдз лыддьöдлöмны гижöмöн скод вылö став чукöртчылысьсö овöн, нимöн и вичöн. И тшöкыда артмывлöма сiдзи, мый шуöмыс ичöтик, а чукöртчысьяссö лыддьöдлöма уна лист бок вылын. Ёна колана сёрни кузя скод вылö ковмылöма чукöртны гöлöс кутысь йöзлысь кык коймöд юкöнсö. Сытöг шуöмсö оз ло вынсьöдöма.

Шуöмъяссö (приговоръяссö) лöсьöдлöмны рочöн и грамотнöя. Быд во заводитчигöн скод вылын видлавлöмны вотъяс, вынсьöдлöмны армияö призывайтчысьясöс, кывзывлöмны да вынсьöдлöмны вот чукöртысьлысь висьтасьöм.

Скод вылын видлавлöмны и рöдвуж костса венъяс. Со öти на пиысь: 1882 вося тöв шор (январь) 22 лунö Межадор вöлöсьтса скод видлалöма кык шыöдчöм: Митрей вок кувсьöм бöрас Матвей Пиля корö сылысь ыджыд овмöссö (вöв, 10 мöc, 10 ыж да 300 пуд нянь) босьтны ас видзöм улö сы вöсна, мый кулысьлöн эмöсь нöшта вокъяс — Павел, кодi манастырын, и Семен, рекрутскöй служба вылын. Кулысьлöн Евгения Васильева гöтырыс воча шыöдчöмын норасьö, мый кувсьöм верöсыслöн вокъясыс кöсйöны мырдаьыны овмöссö и корö дорйыны наысь. Скодыс шуöма со кыдзи: мед дöва аддзас мöд верöсöс венеч улö сувтлöмöн да лючки олöм вылö, и сiйö босьтчас кутны овмöссö, вештыны вотъяс, вöчны öтувъя уджъяс да быдтыны кольöм сирота нывъяссö. Но овмöсса кöзяйкаöн кольöмны и асьсö дöвасö (вöв, 7 мос, 5 ыж, нянь, уджалан кöлуй, му—видз), мед сiйö ачыс ставсö нуöдас, кувсьöм верöсыслысь пöрысь мамсö бура видзас кувтöдзыс да верöс вокыслöн салдатысь локтöм бöрын юксяс сыкöд джын эмбурнас. Шуöмсö кырымалöмны 193 морт.

Вöлöсьтса скод пыр сюся видзöдöма öтувъя нянь магазея бöрся, мед эськö видзан няньыс эз тшык, ас кадö вежлавсис выль урожайысь. А урожайтöм сьöкыд воясö видлавлöма видзан няньсö крестьяналы водзöсöн сетöм йылысь. Сiдз, 1884 вося öшым (декабрь) 26 лунö шуöма крестьяналы уджйöзöн сетны 3 во кежлö 460 пуд сю да 1138 пуд ид. Пасйöма, мый воддза воясö урожай вöлöма лёк, крестьяна гöльмöны, сёйны нянь оз тырмы и корöны водзосöн öтувъя магазинысь. Но та вылö ковмылöма нöшта уездса крестьянскöй ведомстволöн тшöктöм. 1885 вося сора (июль) 23 лунö скод бара корö сетавны крестьяналы выль урожайöдз 63 четверть сю.

Чуклöмсалы эз ло кивыв кыскавны нянь запассö Межадорö, а колiгъясöн — мöдарö. Вöлöсьтса скод 1887 вося урасьöм (февраль) 6 лунö шуöма Чуклöмын магазея вöчöм бöрын öтувъя нянь запассö юкны. Та могысь бара жö ковмылöма земствосянь индöд, кытчö и ыстöмны скодлысь шуöмсö. Ревизскöй лов лыд серти выль магазеяын колiс видзны запасын 214 четверть сю да 107 четверть ид. Видзöдысьнас скод вылын жö бöрйылöмны Герасим Авдеев Сажинöс, и Рогов поп сылысь примитöма присяга.

1890–öд воясö сиктъясса йöзлöн ветлöм–мунöм–бергöдчöм бара содöма. Олысь содö, му наделъяс чинöны, чинöны и доходъяс. А сьöм колö вот мынтöм вылö, стрöитчыны, челядьлы бурджык паськöм лöсьöдны. Тайö и тшöктывлöма йöзсö нажöткала ветлывлыны Сибырö да мукöдлаö. 1891 воын вöлöсьтса правленньö Межадорса да Чуклöмса олысьяслы сетлöма 159 пашпорт. 1892 воын Василий Сельков Перм губерняса Кунгур уездсянь корö во джын кежлö пашпорт, Артемий Сажин Ирöит карсянь корö татшöм жö пашпорт, Дмитрий Фролов Сажин Архангельск губернясянь корö во гöгöрся пашпорт. Тайö висьталö, мый йöз сэтчö мунлiсны дженьыд кад кежлö босьтöм пашпортöн и водзö на кöсйöны нажöвитчыны. Вöлöсьтса правленньö пашпортъяссö ыстывлöма. 1897 воын вöлöсьтысь нажöтка 36 вылö ветлöмны 30 морт. Тайö вонас правленньö сетöма во кежлö 9 пашпорт, во джын кежлö 24, куим тöлысь кежлö 223 и вит во кежлö 3 пашпорт. И тадзи позьö лыддьöдлыны воысь воö.

Вöлöсьтса скод вылын видлавлöмны и вичкоса уджалысьяслы — поплы, дьякöнлы выль керкаяс кыпöдан могъяс. Стрöитны ковмылöма и öтувъя стрöйбаяс. Межадорын медавлöмны патера урядниклы, а Чуклöмын локывлысь чиновникъяслы да правленньöын уджалысьяслы оланiн. Та вылö бара жö ковмылöма скодлöн индöд.

Ыджыд удж правленньö нуöдöма кöртымъяс лöсьöдöм кузя, мый öнi вöчöны нотариальнöй контораяс.

Вöлöмны и со кутшöм сёрнитчöмъяс. Öтиöс, коми вылö вуджöдöмöн, вайöда ставнас, кыдзи аслыспöлöс да быд боксянь зэв грамöтаа гижöд! Сiйö петкöдлö олöмын вöвлöмтор и йöзлысь оланногсö. 1882 вося тöв шöр (январь) 24 лунö запасса матрос Егор Васильев Сельков да дöва Мария Федотова Лапшина лöсьöдöмны гижöда татшöм сёрнитчöм:

1. Ме, воддзаыс — Лапшина, коли овмöс кутысьтöг да вотъяс мынтысьтöг, посни челядьöн (вит арöса Иван да 8 арöса Дарья ныв). Примита овмöсö Сельковöс пи пыдди дöва Евдокия Венедиктова (первой мужик сертиыс Старцева) ныв вылö гöтралöмöн, кодлы и сета став эмбурöс: кык юкöна керка — карта, амбар, кöбрег, кык вöв, квайт мöс, нёль ыж, кöрта –чугуна да пу кöлуй, кык лов вылö меным кольöм видз–му, сур пуан пöрт, медым Иван пи быдмöм бöрын, кöсъяс кö сiйö, тайöс ставсö юкны шöри, а Дарья нылöс сетны верöс сайö öтувъя овмöссянь.

2. Ме, мöдыс — Сельков, пыра Лапшина овмöсö да Евдокия ныв вылас гöтрасьöм бöрын кöсйыся лоны кыдзи и мамлысь кывзысьысьöн, кута веськöдлыны овмöсöн, вештыны вотъяс уджйöзтöг, вердны Лапшинаöс челядьыскöд, а сэсся Иван пиыс кö тыр арлыдöн кöсъяс торйöдчыны джын овмöс юкöмöн, ме, Сельков, ог кут торкавны, а сiдз жö Дарья нывcö жöник аддзысьöм бöрын сетны верöс сайö тырмана (места серти) приданнöйöн.

3.. Ми, Лапшина и Сельков, овмöсöн öтлаасьöм бöрын кутам овны лючки öти сёян–юанöн, а лоö кö миян костын кутшöмкö нелючки, Лапшиналы челядьыскöд овны асыв — войвывса керка юкöнын и Сельковсянь босьтны челядь быдмытöдз няньлысь джын урожайсö, яй, чери, пес, а сiдзжö öти вöв, 4 мöс, 2 ыж, нöшта сетны быдöнлы во кежлö кучик кöтi, кык во кежлö пара гын сапöг, тöвся да гожся пыр новлан да праздничнöй паськöм. Челядь быдмöм бöрын юкны став овмöссö и сэки няньсö и мукöдтор сетöмсö дугöдны и Сельков вермас овны аскежся овмöсöн.

4. Öтлаын олiгöн кö менамсянь, Лапшина дорсянь, Сельковöс лоö водзджык вöтлöм, ме, Лапшина, кöсйыся сылы, Сельковлы гöтырыскöд, мынтыны быд во 50 шайт эзысьöн.

5. Тайö сёрнитчöмсö пуктiм торкавтöг да вежа видзöм вылö. Мария Федотова Лапшина пыдди сёрнитчöмсö кырымалöма крестьянин Михей Щебенев, матрос Егор Сельков корöм серти — крестьянин Раевский. Сёрнитчöмсö вöчигöн вöлöмны Иона да Василий Лапшинъяс.

Йöз костын татшöм сёрнитчöмъясыс, кöртымасьöм Межадорын и Чуклöмын вöлöма абу этша.

Татшöм сямöн жö лöсьöдлöмны кулом бöр кежлö гижöдъяс, кодъяс заводитчылöмны татшöм кывъясöн: "Во имя отца и Сына и Святого духа в здравом уме и полной памяти заблагорассудил ранее, т.е. при жизни своей дать..." да сiдз водзö, кодлы мый олöмсьыс кольö кувсьöм бöрын. Нöшта кöсйысьлöмны кулом бöрын сетны вичкоö казьтылöм могысь медбур мöс.

Чуклöмса крестьяна лöсьöдлöмны и удж кузя, видз–муöн вöдитчöм йылысь гижöда сёрнитчöмъяс. 1898 вося арын чуклöмса öткымын крестьяна лöсьöдчöмны мунны Сибырö и ассьыныс видз–мусö сёрнитчöмöн кольöны вöдитчöм вылö либö вузалöны. Сiдз, Федор Кириллов Сажин семьянас мунö Сибырö овны вылö и аcсьыс видз–му пайсö сетö Егор да Григорий Сажинъяслы. Оз кö бöрсö лок, 10 во бöрын му–виддзыс кольö налы (обществоыс кö сöгласитчас). Му-виддзöн вöдитчöмысь сылы мынтöны 53 шайт. Бöр кö семьянас локтас — ставыс бöр бергöдчас.

Иван чурка Сажин кольö Василий Алексеев Сажинлы видзъяс: "Чик–чи" 7 додьув, "Гадь видз" 2 додьув, "Тыдiн
видз" 2 додьув; муяс: "Гадьвидзбок", "Гадьчой" Терень му", гортдiнса градъяс, "Гадьтуй выл", "Гадьчойул лог" — 25 шайтысь сэтшöм жö условиеясöн. Видзъясыслысь да муясыслысь нимъяссö лои пасйöма сы могысь, мед том йöзлы лоö тöдсаöн, мый быд видз–мулы важ йöз сетлöмны аслыспöлöс нимъяс, кодъяс ловтö быттьöкö личöдыштöны.

1899 вося кос муын (апрельын) вöлöсьтса правленньöö воöма земскöй управаысь крестьянскöй делöяс кузя чиновниксянь чорыд гижöд, кодöн дугодсьö Сибырö мунiгöн видз–муöн вузасьöм: кодi пö лэдзö тайöс вöчны, сiйö отсалö крестьяналы рöзöритчыны. Ветлiсны–ö сэсся Сибырас чуклöмса, эз ло тöдмалöма.

Ичöтик на Чуклöм деревнялöн йöзöс öтувтан общинаыс дыр абу вöвлöма тöдчанаöн. Межадорса община, кытчö пыравлöма и Чуклöм, вöлöма тöдчана. Сэнi правленньö, нуöдöны скодъяс, кытчö волöмаöсь и чуклöмса крестьяна. Но и чуклöмсалöн öтувъя видзöдласöн лыддьысьлöмны жö. 1867 вося öшым (декабрь) 1 лунö Чуклöмын вöлöма Межадор обществолöн скод, конi видлалöмны Чуклöмын винаöн вузасян магазин восьтöм йылысь. Скодыс шуöма: Визин–Троицкöй вöлöсьтувса Чукаыб обществоö пырысь крестьянин Иван Яковлев Головинлы восьтыны Чуклöмын магазин, кöнi кутас вузавсьыны роч вина — сэнi юöм и сьöрысь нуöм вылö. Нöшта шуöма, мый йöзыс кö кутасны норасьны, сиктса общество вермас губерняса чина йöз пыр вузасьöмсö бöр тупкыны. Шуöмсö кырымалöмны 26 овмöсса кöзяин. Грамöта тöдтöмъяс пыдди кырымасьöма Александр Сажин. Кутшöм лои магазиныслöн водзö уджыс (вузасьлiс ли эз), архивысь эз тыдовтчы. Да сiйö абу нин сэтшöм и колана. Коланаджык сиктса обществолöн видзöдласыс.

1886 вося сора (июль) 6 лунö вöлöсьтса старшина Куликов Чуклöмын чукöртлöма сиктса скод, конi мунöма сёрни крестьяналы муяс да видзъяс тырмытöм йылысь. Шуöмаöсь корны казеннöй дачаысь содтöд юкны муяс "Гадь мöдар дал", "Жуöд бок" — 300 гöгöр десятина. Пöскöтина да муяс улö жö мукöд матысаинъяс: "Шома туйсянь Ёгулöдз" — 150 десятина гöгöр. Сэсся видзъяс улö 85 десятина. А став колана содтöдыс казеннöй дачаысь 535 десятина. Воча кывйыс архивысь эз сюр. Позьö чайтны, мый корöминъяссö сетiсны. Крестьяналöн уджъясыс сэнi мунлöмаöсь.

1892 вося урасьöм (февраль) 29 лунö Чуклöмса скод вылын мунöма сёрни вотъяс мынтöм йылысь. Пасйöмаöсь, мый вотъяс крестьяна мынтöны вöдитан муяс серти. Но семьяясöн юксьöмъяс вöлiны 12 во сайын нин. Тайö каднас муясыс вежсисны: öтияс вöдитöны этшаджык, а вот мынтöны ыджыдджыкöс, мöдъяс — мöдарö. Скод шуöма: воан тулыссянь видлавны видз–му вотчинасö быдöнлысь, и тайöс олöмö пöртöм могысь бöрйöмаöсь 12 понятöйöс. Вöлi–ö тайöс вöчöма — эз тыдовтчы.

1886 воö медводдзаысь кыптöма сёрни, медым Чуклöм торйöдчас межадорсаысь ас котырö. Öшым (декабрь) 2 лунö вöлöсьтса старшина Куликов чукöртöма скод, конi вöлöмны 111 овмöсысь кöзяин (130 пытшкысь). Пасйöмаöсь, мый Чуклöм сикт вöлöсьтса правленньöсянь 15 верст сайын, видз–му Межадоркöд торъя. И шуöмаöсь корны, мед лöсьöдны Чуклöмын сиктса асшöр котыр (общество).

Юксьöмыс кыссьöма дыр. Матö квайт во мысти, 1892 вося ода кора (май) 23 лунö, крестьяна делöяс кузя уездса чиновник бара корö та кузя скодлысь выль приговöр. Сiйöс сылы мöдöдöмаöсь йирым (октябрь) 26 лунö. Воча кыв регыд и локтас. Чуклöмын асшöр котыр (общество) лöсьöдöмын öткажитöма, кыдзи олöмын ковтöмтор. Кык во мысти губернясянь письмööн татшöм корöм вылас бара жö öткажитöма.

1901 вося рака (март) 27 лунö Межадор вöлöсьтса скод вылын нин видлалöны Чуклöмöс торйöдöм йылысь. Пасйöны, мый торйöдчöмыс кокньöдас вотъяс мынтöм, бырöдас вензьöмъяс. Чуклöмын 176 овмöс 1057 олысьöн, эм вичко аслас причтöн, церковно–приходскöй школа. Кык во мысти, 1903 вося урасьöм (февраль) 9 лунö, вöлöсьтса скод шуöма торйöдны Чуклöмлы видз–му, а Визин ю кузя видзъяс вылын лöсьöдны "Гöн—чойтi" межа. Скод шуöма юкны Чуклöмлы и мирскöй капитал 214 лов вылö — 457 шайт. Ставыс тайö петкöдлö, мый Чуклöмын асшöр общество лöсьöдöм йылысь сёрни да гижасьöмъяс мунöмны 17 во чöж.

Позьö чайтны, мый и ас вöлöсьт лöсьöдöмöн эз вöв кокниджык. Тöдöмысь, Чуклöмын вöлöсьт лöсьöдöм кузя скодъяс вöвлiны и Межадорын, и Чуклöмын. Вöлöсьт сувтöмлöн кадыс сюри жö: 1909 вося öшым (декабрь) 15 лунся письмööн Чуклöм вöлöсьтса старшина Сажин корö Межадор вöлöсьтса правленньöысь мобилизация юöртан вит пакет. Тайö письмöас и пасйöма, мый тавося лöддза — номъя (июнь) 1 лунсянь Чуклöмын лöсьöдöма асшöр вöлöсьт. Но эз ло тöдмалöма, кодъясöс скод вылын бöрйылöмны вöлöсьтса правленньöö.

Öткымын гижöдъясысь тыдовтчис, мый 1912 вося сора (июль) 12 лунö вöлöсьтса скод вылын бöрйöма öтувъя нянь магазея дöзьöритысьöн куим во кежло Александр Дмитриев Сажинöс (надёжнöй, абу юысь). 1913 во кежло вöлöсьтса старшиналы отсасьысьясöн бöрйöмны 28 арöса Виктор Петров да Михаил Егоров Сажинъясöс, вот чукöртысьöн — Степан Вонифатьев да Николай Саватиев Сельковъясöс, полицейскöй десятскöйясöн — Иван Степанов Сажинöс (Керöс), Алексей Трофимов Лапшинöс (Гадь), Марк Филиппов Кутькинöс (Важ Чуклöм), Александр Осипов Сажинö с (Ягдор), Семён Игнатьев Сажинö с (Грезд), Иван Алексеев Сажинöс (Погост) и десятскöйяслы отсасьысьясöс — Семён Иванов Сажинöс (Погост), Григорий Васильев Лапшинöс (Ягдор), Николай Парфениев Сельковöс (Важ Чуклöм) и Павел Алексеев Сажинöс (Керöс). 1914 во кежлö вот чукöртысьöн бöрйöма Николай Иванов Сажинöс.

Чуклöм сиктса старöстаöн 1904 воын вöлöма Никита Титов Сажин, 1906 воын — сiйö жö, 1907 вося рака (март) тöлысьын нин Иван Лукич Сельков (Лука Иван). Вöлöсьт лöсьöдöм бöрын старшинаöн лоöма сiйö жо. Уджалöма война вылö добровольнöя мунтöдз. 1915 воын старшинаöн вöлöма Тихон Анисимов Лапшин (Öнись Тикöн), 1916 воын — 58 арöса Степан Иванов Сажин, а Тихон Лапшиныс — сiйöс вежысьöн. 1913 восянь писарöн вöлöма Алексей Павлов Воронцов, сы бöрын — Братинков.

Революция бöрын правленньö пыдди лои вöлöсьтса исполком. Исполкомса председательяс ёна вежласьлöмны, регыдъя и дырджык кадъясöн председательöн уджавлöмны: Алексей Петрович Сажин, Даниил Михайлович Сажин, Евграф Михайлович Сажин, Александр Степанович Сельков, Петр Викторович Сажин, Соломония Тихоновна Лапшина, Михаил Александрович Сажин, Парасковья Михайловна Сажина, Степан Михайлович Сельков, Александр Семенович Сажин, Иван Михайлович Лапшин, Григорий Иванович Сажин, Иван Михайлович Сельков, Людмила Степановна Приезжева, Александр Михайлович Беляев.

Вöлöсьтъясын медся кывкутана уджыс вöлöма писарлöн. Та вöсна и мынтывлöмны сылы медыджыд во гöгöрся удждон: Межадорын — 286 шайт, Чуклöмын первой — 200, сэсся — 252 шайт. Вöлöсьтса старшиналöн во гöгöрся удждоныс — 48 шайт, сiйöс вежысьлöн — 12. Писаръяслы ковмылöма лоны быд боксянь зэв грамотнöйöн: кужöмöн нуöдны бухгалтерия да сьöмлысь тшöт, бура вежöртöмöн тöдны законъяс, вотъяс чукöртöм йылысь гижöдъяс. Такöд тшöтш тöдны и гöгöрвоны крестьянскöй удж, прöмысъяс, вузасьöм, кужны рочöн грамотнöя гижöмöн бура да мичаа лöсьöдавны документъяс, сёрнитчöмъяс, тöдны пашпорт сеталан пöрадок да лöсьöдавны ветлысь–мунысьяслы пашпортъяс, бура нуöдны став сикас колана книгаяс да учётъяс. Вöлöсьтса писаръясöс велöдлöмны уездса писарскöй школаын и вöлöсьтъясö найöс индывлöмны да вежлавлöмны уездсянь жö. Но вöвлöмны и ас кежысь велöдчöм писаръяс. Бур писартöг грамöтатöм старöстаяс эз эськö вермыны нуöдны правленньöлысь уджсö.