Чуклöм: Палявтöм шог

Чуклöм: вежаинъяс, ловъя нимъяс.— Сыктывкар, 2001, 113 л.б.
(сиктлы 400 во тыригкежлö) П.И.Сельков

книгакнига


Оз вун некор сиктса олöм,
Век син водзын гажа Чуклöм — чужанiнöй...
Ичöт Иван (И.И.Сажин), 1927 во.

Чуклöмсалы, кыдзи и став странаса йöзлы, шылявлытöм тшуподöн коли Великöй Öтечественнöй война. Войнаводзвывса призывайтöм да война кадö мобилизуйтöм–призывайтöм 420 чуклöмса олысь пиысь усьöма, вошöма, кулöма ранитчöм бöрын госпитальясын да пленын 283 морт, кык коймöд юкöныс война вылö став ветлысь пöвстысь. Пöгибнитiсны уджач, колана да шань йöзыс. Арлыд сертиыс найö юксьöны со кыдзи: 18 арöсаяс — 15 морт, 19–20 арöсаяс
— 39, 21–25 арöсаяс — 64, 26–30 арöсаяс — 50, 31–40 арöсаяс — 94, 41–50 арöсаяс — 20 и сыысь пöрысьджык — 1 морт.

Унджыкыс усьöмны и вошöмны война первойя вояснас: 1941–42 воясын — 170 морт, 1943 воын нöшта 71, 1944 воын — 36 и 6 морт 1945 воын. 21 морт сиктö вöлiсны ранитчылöм бöрын калекаясöн, уна ранитчылöмъяс лечитчöм бöрас бара на воюйтiсны.

Чужан му дорйöм век вöвлi медся сьöкыд ратнöй уджöн, а бöръя Победа шедiс вывтi сьöкыда. Воштöмъяссö некутшöм мераöн мерайтны оз позь и некутшöм вескиöн сьöктасö он весиг, став киссьöм вирсö он чукöрт, да и мамъяслысь, гöтыръяслысь, челядьлысь, невестаяслысь синвасö он курав. Ставыс визувтiс да шорöн лэччис. Чуклöмын кольлi 169 дöва да 322 батьтöм челядь. А кымын невеста воштiс жöникпуяссö? Öнi тайöс некод нин лыддьыны оз вермы.

Уна семьяысь усины эз öти мортöн. Ерö Ёгорлöн эз локны кык пи — Иван да Николай; Карпö Агнилöн куим пи — Виттор, Митрей да Пантиль; Доментей Миколайлöн кык пи; Степö Иван ачыс и Василь пиыс; Спира Микальлöн нёль асшöр олысь пи; Епим Миколайлöн куим пи; Капит Öльöксанлöн куим пи; Мишка Öльöксанлöн вит пи; Део Миколайлöн куим пи; Петыр Ёгорлöн куим пи (Павел, Иван да Кöсьта); Савö Миколайлöн куим пи (Мишка, Степан да Öльöксан); Лука Иван Сергейлöн куим пи (Мишка, Öльöксан да Митрей); Кöсьта Павеллöн куим пи (Öльöксан, Ласей да Василь); Петыр Иванлöн куим пи (Василь, Петыр да Мишка); Тикöн Сергей Öльöксан ачыс да Мишка пиыс; Васька Öньö ачыс да Иван пиыс и тадзи водзö. Ветымын томиник морт юрсö пуктiсны олöмсö аддзывтöг, налы муртса тыри 18, 19, 20 арöс. Да и комын арöсöдз усьöм — вошöм йöз олöмсö эз на жö ёна аддзывны, унджыкыс вöлiны семьятöмöсь на.

Уна и шог шогалiсны сиктö кольысь йоз, олiсны тшыг нисьö пöтöн, мамъяслы содтöд ковмис майшасьны и челядьöс вердöм– быдтöм вöсна.

Сиктса йöз пиысь унаöн усьöмны–вошöмны Ленинградскöй областьын, Прибалтикаын, Карелияын, Мурманскын, Украинаын да мукöдлаын. Конi сöмын оз куйлы налöн лысьöмыс! Коми войтырöс, на пиын и чуклöмсаöс, кыдзи войвывса олысьясöс, тышкасьны мöдöдлöмны ёнджыкасö татшöм сяма жö местаясö. Ленинград дорйигон да сiйöс блокадаысь мездiгöн усьöмъяс пöвстын тöдса нимыс 22 чуклöмсалöн, а сэнi вошöмъясыслöн лыдыс абу тöдса, и тöдмавны öнi он нин вермы. Позьö чайтны, мый 1941–42 воясö вошöмъяс пиысь унджыкыс вошины сэнi жö.

Кыдзи тышкасисны чуклöмсаяс, висьталöны ловйöн бергöдчысьяслöн наградаясыс. Старшöй лейтенант Андрей Степанович Сельковöс наградитöма мöд степеня "Öтечественнöй война", куим Краснöй Звезда орденъясöн, уна медальон. Куимысь ранитчылöма, кантузитчылöма. Младшöй сержант Петр Александрович Сельковöс наградитлöмаöсь мöд степеня "Öтечественнöй война" да Краснöй Звезда орденъясöн, "За отвагу", "За боевыс заслуги" да мукöд медальясöн. Ёльбазаса олысьяс сылы зэв стöча сетлöмны Орден Петыр прöзвище. Василий Арсентьевич Сельковöс наградитлöмаöсь куим "За отвагу" медальöн, "За боевыс заслуги", "За взятие Кенигсöсрга" да мукöд медальясöн. Жаль, мый фронтовикъяслöн наградаяс йылысь абу тöдмавлöмны водзджык. Некодлы сiйö абу ковмылöма. Öнi фронтовикъяс кувсисны, и налöн наградаяс йылысь внукъясыс тöдöны этша.

Кöть первойсяньыс война мунiс сьöкыда, йöзлöн усьöм — вошöм лыдыс пыр содiс, чуклöмса том йöз война вылö нуöмысь эз пышъявны. 15–16 арöссянь велöдчисны военнöй делöö, призывайтлiсны 17 арöсöн — ёнмытöм на детинкаясöн. И некод эз корсьлы помка, медым кольччыны гортö призывысь мынтöдчöмöн. Оз кö босьтны армияö, тайö вöлi йöзсянь яндысянаöн.

Войнаöдз на чуклöмса том йöз пиысь öткымынöн аслыныс профессияöн босьтлöмны военнöй служба. Кадровöй офицеръясöн вöлiны: Александр Дмитриевич Сельков (Васька Митрей Öльöксан), кодi войнасö помавлiс капитан чинöн; Михаил Иванович Сельков (Петыр Иван Микаль), служитлiс Ленинградын и ловсö пуктiс сэн жö. Алексей Михайлович, Александр Иванович да Степан Николаевич (Део Миколай Степан) Сажинъяс усины лейтенантъясöн. Офицеръясöн тышкасисны война вылын Андрей Степанович Сельков (Степ Öньö), Степан Михайлович Сельков (Миколай Микаль Степан), Павел Дмитриевич Сельков (Савö Митрей Павел), Иван Дмитриевич Сажин (Део Иван). Командуйтiсны взводъясöн, батареяясöн, танкöвöй экипажъясöн.

Колö пасйыны, мый война вылö Чуклöмысь призывайтлiсны и том нывкаясöс– комсомолкаясöс. 1943 воын мунiсны Александра Дмитриевна Селькова (Педул Саньö), Евдокия Ивановна Лапшина (Степан Иван Дуня), Александра Ивановна да Валентина Михайловна Сажинаяс, Парасковья Ефимовна Зиновьева. Служитöмны зенитнöй артиллерияын.

Война йылысь гижöма уна небöг, лöсьöдöма бур кинофильмъяс, сьывсьöны лов вöрзьöдана сьыланкывъяс, кодъяс кыпöдлiсны солдатъяслысь и став йöзлысь вынсö. Республикаын лöсьöдöма Казьтылан Книга, кöнi лыддьöдлöма война вылын усьöм да вошöм став йöзсö, и ловйöн бергöдчöмаяссö. Юркарын, сиктъясын и Чуклöмын тшöтш, лöсьöдöма усьöмаясöс жö казьтылан Мемориал, мед эськö на йылысь эз вöв вунö дöма, мед том поколениеяслы йиджас вежöрас Чужан му вöсна кывкутöмыс.