Чуклöм: Стрелец, ратник, боец...

Чуклöм: вежаинъяс, ловъя нимъяс.— Сыктывкар, 2001, 113 л.б.
(сиктлы 400 во тыригкежлö) П.И.Сельков

книгакнига


Оз вун некор сиктса олöм,
Век син водзын гажа Чуклöм — чужанiнöй...
Ичöт Иван (И.И.Сажин), 1927 во.

Роч государство водзö ёнмис, и сылöн ыджыдалöмыс пыр лои кыланаöнджык. 1502 воын князь–наместникъяс пыдди лоины воеводаяс, а 1707 воын Пётр Первый лöсьöдiс губерняяс. Вежсьöны и государство водзын крестьяналöн могъяс. XV нэмын на комиын гаравсьылöма вот (налог) — "соболики Сысольские". Коми вöралысьяс вот мынтöм ради корсьлöмны прöмыссö Из (Урал) сайысь. Бöрынджык прöмыса вот вежсьöма сьöмöн мынтöм вылö.

Межадöрса да чуклöмса лоины Вологда губерняса "черносошнöй" государственнöй крестьянаöн, кодъяслы ковмылiс вöчны, нуны уна сикас могъяс (повиннöстьяс).

Быд государстволöн пыр эм кык ыджыд мог. Öти — пытшкöсса, мöдыс — ортсыса. На серти и государство лöсьöдö ассьыс армия, полиция, суд, тюрьмаяс да мукöдтор, медым кутны йöз костын колана пöрадок, видзны границаяс либö паськöдны территорияяс. А та вылö колö сьöм, кодi локтö казнаö вотъяс мынтöмöн. Государственнöй крестьяна уджавлiсны государственнöй муяс вылын и мынтынiсны государственнöй да местнöй вотъяс, нуöдiсны мукöд могъяс.

Переписьяс дырйи Россияын лöсьöдлöмны мужичöйяслысь список (ревизскöй сказка), код серти и артавлöмны "подушнöй подать" да рекрутскöй повинность. Тайö списокас шедöм быд мужичöй шусьылöма ревизскöй душаöн (ловöн). Татшöм артасьöмыс Россияын вöлöма 1718 восянь 1887 воöдз, а кöнсюрö и дырджык. Миян вöлöсьтъясын ревизскöй лов лыднас пöльзуйтчöмны революцияöдз. Буретш та серти мынтылiсны вотъяс да нуöдлiсны рекрутскöй повинность.

Бöръяыс лоö армиялöн подулöн, кодöс Россияын пыртöма Пётр I ещö 1699 воын на. Таöдз вöвлöма стрелецкöй служба. И колö пасйыны, мый сэтчö нулöмны и миянысь. И.Жеребцовлöн справочник серти, 1678 воын визинса С.Игнатьев "взят со всею семьею к Москве в стрельцы". Стрелецъяслöн сарлы паныд вöвлöм бунт бöрын Пётр I и вежöма тайö службасö рекрутскöй вылö.

Рекрутъясöс первой босьтлöмны служитны пыр кежлö. Татшöм служба вылас Чуклöмысь нулöмны кык том мортöс: Данила Климентьев Сажинöс нуöма рекрутö 1719 воын да Федор Шубуневöс нуöма 1715 воын. Некоднаныс бöрсö абу волöмны.

1793 восянь рекрутскöй служба вылö нулöмны нин 25 во кежлö, а 1834 восянь — 20 во кежлö. Армиялы тайö сетлöма бура велöдöм солдатъясöс, но тайö службаыс йöзлы вöлöма медся сьöкыдторйöн.

Рекрутö сетлöмны пудъясьöмöн. Пудсö вермылöма кыскыны ачыс рекрутпуыс, батьыс, вокыс либö вöлöстнöй старшина. Кодлы усьлöма пудйыс, семьяыс сылöн вермылöма вежсьыны мöдкöд, сьöм мынтöмöн. Чуклöмын гатшöмыс абу вöвлöма. Гаралöм нин рекрутö нуöмъяс бöрын чуклöмсалы дыркодь сэсся абу веськавлöма пудйыс. И сöмын 1795 воын рекрутö мöдöдöмны Леонтий Сажинлысь Иван воксö. Тайö тыдовтчис 1811 вося ревизскöй сказкаысь. Сэнi жö пасйöма, мый и Василий Игнатьев Сажинлöн Сидöр пиыс рекрутын (кутшöм кадсянь, абу пасйöма). Чуклöмса тайö кык Сажиныс служитны мунiсны тöдöмöн 25 во кежлö. Сiдзкö, найöс суис 1812 вося Öтечественнöй война, кытчö найö, дерт, веськалiсны. Служба бöрас гортас бöр локтöмыс некоднаныслöн оз тыдовтчы. Вермисны война вылас пуктыны юрнысö.

Та бöрын рекрутö мöдöдöм век содö. Григорий Алексеев Сажинлысь Егор писö нулöмны 1811 воын, сiйö бара жö вермис веськавны сэкся Öтечественнöй война вылö, бöрсö локтöмыс эз тыдовтчы. Архип Иванов Сажинöс рекрутö нуломны 1813 воын, бöрсö абу жö локылöма. Позьö лыддьöдлыны водзö. Ставсö, 1858 вося выль ревизскöй сказка лöсьöдтöдз, рекрутö Чуклöмысь мöдöдлöмны 36 том мортöс.

Крымскöй война, кодi нуöдсьылöма нёль державакöд (Турция, Англия, Франция да Сардиния), вöлöма вир кисьтана. Сэки жö мунлiс и Кавказскöй война, конi бара киссис вир. Чуклöмса рекрутьяс веськавлiсны тайö войнаяс вылас, унаöн сэнi пуктiсны ассьыныс юрнысö. 18 чуклöмсалöн гортас бöр локтöмыс гижöдъясысь эз тыдовтчы, и налöн рöдыс водзö оз мун.

Уездса рекрутьяс чукöртчылöмны Устьсысольскö. Быд рекрут сэтчö локылöма аслас тшöт вылö и аслас позянлунöн (подöн ли вöлöн ли) урчитöм кад кежлö. Рекрутскöй присутствиеын (öнiя военкоматын моз) выльысь видлавлöмны быдöнлысь туянлунсö да пасъявлöмны на йылысь ставторсö: сиктлысь ним, гöтыръяссö и челядьсö, грамöта, кужöмлун, роч кыв тöдöм, вöлöма–ö суд улын. Тайö петкöдлö, мый рекрутö мöдöдöм абу вöвлöма дзик прöстöйöн.

1874 вося военнöй реформа рекрутскöй службасö вежöма всеобщöй воинскöй повинностьöн да службаыслысь сроксö чинтöма 6 воöдз (флотын — 7 во). Ревизскöй сказка, код серти водзтi мöдöдласны рекрутö, вежöма посемейнöй списокöн. Чуклöмса служивöй войтырлöн лыдыс ёна содiс. Вичко гижöдъясын кутiсны пасъявны служивой йöзлысь торъя сословие, кöть найö и воддза моз крестьянствуйтiсны. Венчайтчигöн, челядьöс пыртiгöн и кулiгöн татшöм йöзыслöн медводз гижсьö служба вывса чиныс. Шуам, 1882 воын первой статьяа матрос, витöд флотса экипажысь мöд разряда комендор Сажин Егор Емельянович венчайтчöма Евдокия Михайлова Сажинакöд да св.

Колö пасйыны, мый уна чуклöмсаöс босьтлöмны флотö. Гаралöм нин Егор Емельянов Сажин 1878,1879,1880 да 1881 воясö "Минин" крейсер вылын вöлöма му шар гöгöрса плаваниеын. Уволитöмаöсь флотысь 1881 вося вöльгым (ноябрь) 2 лунö. Сылöн тшöтшъя первой статьяа матрос Павел Алексеев Сажин 1876–77 воясö служитöма "Воевода" корвет вылын, сэсся "Минин" крейсер вылын вöлöма жö му шар гöгöр кытшовтöмын. Первой статьяа матрос Егор Васильев Сельков служитлöма нёльöд флотса экипажын "Первенец" батарея вылын, сэсся "Аскольд" корвет, крейсер "Забияка" да "Адмирал Чичагов" фрегат вылын. Жалöванньöыс вонас вöлöма 14 шайт 40 ур — тадзи донъявсьылöма корабельнöй кочегарлöн сьöкыд службаыс. Чуклöмса морякъясöс служба дырйиыс некодöс абу накажитлöмны.

1899 воын армияын служба бара вежсьöма. Выль закон серти армияын кутöмны формируйтны дружинаяс да ополчениелысь частьяс. Служивöй сословиелöн вичкоса гижöдъясын лоины запаснöй ратникъяс, дружинникъяс да ополченецъяс. Службаыслысь сроксö чинтöма нёль воöдз, флотын — вит воöдз.

Русско — Японскöй война дырйи Межадорса вöлöсьтысь нулöмны 23 мортöс, на пиысь дасыс — чуклöмса. Сöмын тайö мобилизуйтöм йöзыс фронт вылас абу нин веськавлöмны, война помасьöм бöрас найöс бöр демобилизуйтöмны.

Первой мирöвöй война вылö медводдза мобилизация йылысь вöлi юöртöма полицейскöй урядникъяс пыр 1914 вося сора (июль) 17 лунö сиктъясö мобилизационнöй пакетъяс мöдöдöмöн. Чуклöм вöлöсьтса старшина В.Сажин кöч (сентябрь) 24 лунö юöртö, мый запаснöй нижньöй чинъяс пиысь сборнöй пунктö мöдöдöма 34 мортöс да нöшта 22 ратникöс. Вöлöмны и война вылö мунысь доброволечьяс, на пиын Иван Лукич Сельков — вöлöстнöй старшина, кодöс служба вылö пыртöдöмны 88 пехотнöй батальонö; Никита Иванович Сельков, Михаил Степанович, Василий Васильевич, Егор Егорович да Александр Андреевич Сажинъяс.

Унаöн сюрлöмны пленö. Уездысь пленын вöлöмны 1140 морт, на пиысь 35 чуклöмса. Гриша Лука Сажин, пленö шедлöм жö, висьтавлывлöма, мый окопъясын салдатъяс тшыгъявлöмны да сеян корсьны петавлöмны окопъяссьыс, сэки медсясö и сюрлöмны пленö.

Империалистическöй война вылын усьöмъяс йылысь архив петкöдлiс этша. Адазысисны сöмын со кутшöм юöръяс: Сельков Алексей Павлович вошöма 1915 вося лöддзя — номъя (июнь) 17 лунö, Тихон Сергеевич Сажин усьöма кось дырйи 1917 вося сора (июль) 6 лунö, Алексей Канидиевич Сельков усьöма кось дырйи 1917 вося лöддзя — номъя (июнь) 16 лунö, Степан Иванович да Артемий Егорович Сажинъяс кувсьöмны 1917 вося рака (март) тöлысьын тифöн висьöмысь.

Петр Власиев Сажин (Ласей Петыр) кувсьöма 1916 вося öшым (декабрь) 19 лунö 10 –од Хирургическöй отрядын. Башкладарскöй полкын бура воюйтöмысь сiйöс наградитлöмны Георгий нёльöд степеня медальöн (#785223), кодöс мöдöдлöмны кувсьöм бöрас батьыслы. Чуклöмса олöма йöзлöн лыддьöдлöм серти, сiйö война вывсьыс абу локылöмны 17 морт. Унаöн воöмны калекаясöн.

Гражданскöй война вылын усьöмъяслöн лыдыс архивын бара жö абу. Вöлöсьтса военкоматлöн архивыс абу (буракö, сотчöма 1929 воын), а уездса военкоматлöн архивын эмöсь со кутшöм юöръяс: 1919 вося августын белогвардеецъяскöд тышын усисны да вошины 212 красноармееч, на лыдын Чуклöмысь — 8. 1920 вося февраль 26 лунö военкоматö воöма юöр, мый карантиннöй пунктын кувсьöма Сажин Николай (Чуклöмса). 1920 вося октябрь 15 лунö юöртсьö, мый Минскöй гуöсрняын врагкöд тышын веськалiсны пленö Лапшин Александр Яковлевич да Малыгин Василий Александрович. Красноармеец Лапшин Василий воши белогвардеецъяскöд косьын. Красноармеец Лапшин Степан Леонтьевич кынмöма слабысла да омöля пасьтасьöмла.

Тайö войнаяс вылын вöлöма нин чуклöмса пöвстысь офицер и гöрд командир. Водзтiджык татшöмъясыс грамöтатöм на сиктса йöз пиысь эз вермыны лоны. Роч армияса медводдза офицерöн Чуклöмысь вöлöма Александр Васильевич Сажин (Евсей Васька Öльöксан), кодi чужлöма 1890 воын, помавлöма гортас церковно–приходскöй да Поёлын мöд ступеня школаяс, а сэсся прапорщикъяслысь училище. Первой мирöвöй война дырйи вöлöма нин офицерöн, а гражданскöй война вылын — Гöрд Армияса командирöн да батальоннöй командирöн. Некымынысь ранитчылöма. Бура воюйтöмысь наградитлöмны шашкаöн да револьверöн. Кувсьылöма томöн на Шойнаты сиктын.