Пермь... кодлӧн тайӧ нимыс?

А.И.Туркин. "Кӧні тэ олан?", л.б. 66—69.

*   *   *


Роч летописьясын пермь гаравсьӧ XI нэм помсянь. Тайӧ ним улас гӧгӧрвосьӧны кутшӧмкӧ войвывса йӧз, кодъяс мынтӧны дань рочьяслы. 1095 вося Начальнӧй летописьысь ми лыддям: "В Афетово же части седять Русь, Чудь и вси языци: Меря, Мурома, Весь, Мордъва, Заволочьская Чудь, Пермь, Печера, Ямь, Угра" и "...народы от колена Афета, живущие в странах Севера".

Тайӧ кадсяньыс пермь паныдасьлӧ зэв тшӧкыда письменнӧй источникъясын.

Ӧткымын учёнӧйяс лыддьӧны, мый пермь кывлысь вежӧртассӧ ӧнӧдз на абу тӧдмалӧма. Мыйла чужис татшӧм мӧвпыс? Медсясӧ сы вӧсна, мый пермь кыв улын ӧти источникъясын гӧгӧрвосьӧ йӧз чукӧр, а мӧдъясын — места, му, страна. "Житие Стефана Пермского" нима книгаысь лыддям: "Всякому же хотящему шествовати в Пермьскую землю, удобезден путь от града от Устюга рекою Вычегдою в верх, дондеже внидет в самую Пермь". Сэні жӧ индӧма Пермьлысь границаяссӧ. Сэтчӧ пырӧны Емва да шӧр Эжва бокса муяс. Сыктыв да Луза тӧд вылӧ оз босьтчыны. Но тайӧ жӧ "Житиеас" гаравсьӧ Кама вылын "Пермь Великая, глаголемая Чусовая", кӧні олӧны эжватасса кодь жӧ "пермяна".

Мӧдлаын, "Вычегодско-Вымскӧй лесописьын" (1389), гаравсьӧ Удораын да Пинегаын пу енъяслы эскысь пермяна — "пермяни идолопоклонницы", а 1485 вося грамотаын пасйыссьӧ лузаса да виледьса пермяна йылысь: "А что пермяки Луские и Вилегодские, до них сысоленом и ужговцом дела нет, но тому тое пермяки присуду устюжским".

Ӧткымын учёнӧйяс зілисны йитны пермь кывсӧ легендарнӧй страна Биармиякӧд, а петан туйсӧ корсисны коми кывйысь. Сідз, М.Михайлов лыддис, мый Биармия сійӧ "биа ур му". Скандинавияса мореплавательяс тайӧ муас волісны пӧ гожӧмын, кор уръяс гӧрдӧсь.

Коми учёнӧй Г.С.Лыткин йитліс пермь кывсӧ пармакӧд. Дерт, Коми муад мича вӧра вывтас местаыд уна, но пермь кыв оз вермы артмыны парма кывйысь. Вӧліны и мукӧд сикас зільӧмъяс, но найӧ дыр эз кутсьыны сы вӧсна, мый сулалісны ылын наукаысь.

Кольӧм нэмса роч академикъяс А.М.Шегрен да Я.К.Грот воисны ӧти мӧвпӧ, мый пермь финскӧй кыв перямаа и сылӧн вежӧртасыс "ылысса, бокыса му". Бӧрынджык тайӧ интереснӧй мӧвпсӧ водзӧ нуӧдіс сӧветскӧй учёнӧй профессор Д.В.Бубрих.

XI—XII нэмъясіӧ Новгород восьталіс Войвылын Двина бассейнын выль муяс, сідз шусяна Заволочье. Тайӧ территория вылас, а сідз жӧ Ладога да Онега тыяс дорын оліс йӧз котыр весь (ӧнія вепсъяслӧн пӧчӧ-пӧльӧяс). Весь ногӧн ылысса бокыса муяс сідз жӧ шуисны Перямаа "бокыса му, вӧлӧксайса му" либӧ Заволочье. Збыль вылас тадзи и вӧлі. Двина бокса да Белӧй моредорса муяс весьлы вӧліны ылысса муясӧн. Рочьяс тӧдмасисны Перямаа кывйӧн да шуисны ас ногыс — первой Перемьӧн, а сэсся Пермьӧн. Скандинавияса мореплавательяс сідз жӧ тӧдісны тайӧ кывсӧ. Найӧ вӧчисны ас ногыс Бярмаланд. Коми Перим, Перым, Перем артмӧма важ роч Перемь формаысь.

Роч колонизациялы воча Кама бассейнысь локтісны комияс ӧнія Котлас гӧгӧрӧ да паськӧдчисны Эжва вожъяс кузя. Перемь, пермь кывйӧн рочьяс кутісны шуны и комиясӧс. Тадзи чужисны Пермь Старая либӧ Пермь Вычегодская, Вилегодская Пермца, Лузская Пермца, Пермь Великая.

"Пермь Великая, глаголемая Чусовая", кыдзи ми тӧдам нин, медводдзаысь гаравсьӧ Епифаний Премудрый гижӧдын и паныдасьлӧ XVIII нэмӧдз. 1708 воын чужӧ Пермскӧй губерния, кодысь Октябрьскӧй революция бӧрын нин 1923 воӧ артмис Пермскӧй область. 1781 воын Егошиха ю дорын сулалысь ыргӧн сывдан заводса посёлоклы вӧлі сетӧма Пермь ним. Ӧні тайӧ ыджыд кар, областнӧй центр. Карса да областьса олысьясӧс шуӧны пермякъясӧн, а Кама дорса комиясӧс — коми-пермякъясӧн.

Татшӧм пермь кывлӧн историяыс. Сійӧ абу коми и абу роч, а вужъяснас пырӧ летописнӧй весьӧ, чудь котырӧ.