Легенда Чухлöмсаяс происхождение йылысь

Корко ёна нин важöн, Иван Грознöй царь дырйи, роч крестьяналöн олöмыс вöлi вывтi омöль. Крестьяна эз имеитны право мунны асланыс помещикъяс дiнысь. Царь лöсьöдiс опричнина. Опричникъяс виалiсны бояраöс, кодъяс вöлi мунöны царлы паныд. Эз жалитны и крестьянаöс да налысь овмöсъяссö. Гырысь налогъяс рöзöритiсны крестьянаöс. Крестьяна кутiсны пышъявны помещикъясысь да бояраысь окраннаясö, а мукöдъяс кутiсны овны рöзбойöн.

Öти рöзöритчöм роч крестьянин, прозвище сертиыс Дур, чукöртiс ассьыс другъяссö да петiс разбойничайтны. Дурлöн шайка дiнö öтлаасисны и мукöд пышъялысь крестьяна. Найö кутiсны грабитны ыджыд туйяс вылын. Сувтасны пемыд вöрö да виччысьöны кор кутас мунны сэтi озыр боярин либö помещик. Сiйöс кутасны, мырддясны эмбурсö да ас костаныс ставсö и юкасны.

А гöль крестьянаöс Дур эз тшöктыв вöрзьöдны. Сiдз найö регыд кадöн грабитiсны уна эмбур. Овны кутiсны туй дорын матын, му чомъясыв.

Помещикъяс, бояра да князьяс кутiсны частö ыставны царьлы юöръяс Дурлöн разбойничöй шайка йылысь. Царь мöдöдiс рöзбоялысь крестьяналы паныд кыксё морта военнöй отряд.

Öти рытö Дурлöн шайка грабитiс вина обоз. Найö коддзытöдз юисны да вой кежлö чорыда унмовсисны. Царьлöн отряд найöс кытшалiс да ставнысö босьтiс пленö.

Дурлысь шайкасö судитiс боярскöй суд. Ставнысö нойтiсны розгаöн кучик потласьтöдзныс, а некымынлысь палачьяс керавлiсны чуньяссö. Сы бöрын найöc юкисны куим пельö да куимнан юкöнсö царь тшöктöм серти мöдöдалiсны разнöй местаö. Öти юкöн на пиысь вöлi мöдöдöма войвылö, кöнi олiсны зыряна (сiдз шулiсны сэки комиясöс) да самоядь (ненецъяс). Накöд тшöтш воис и дзикöдз палачьясöн мучвтöм Дур.

Тайö местаас олысь коми йöз сэки уджавлöмны ёнлжыкасö видзму дорын, вöчавлöмны тылаяс, пашняяс. Татшöм удж вылад найö частö вöлöм ветлöны сьöдöсь, саöсь чужöмъясöн да киясöн. Найöс воысь йöз нимтiсны Сажинъясöн, кодi артмö "сажа" (са) кывйысь. А Сажинъяс Дуркöд локтысьясöc мыйлакö кутасны шуны Сельковъясöн. Öнiя Чухлöмын кызвыннас тайö фамилиеясыс и öнöдз на колисны.

Сельковьяслöн нинöм эз вöв: ни гöрöм му, ни мöс, ни вöв. Найö корисны озырджык коми семьяяслысь сетны налы öти мöскöн либö вöлöн водзöсöн бурджыка овмöдчытöдз. Та вылö озыр крестьяна эз сöгласитчыны, думайтiсны, мый найöс ылöдасны, да панiсны кось Сельковъяскöд. Кось заводитчис öти шор дорыи. Сельковъяс вöлiны этшаöнöсь, но збойöсь. А гöль Сажинъяс эз кутны косясьны Сельковъяскöд. Лунтыр пурсисны пос дорын. Сёр рытын сöмын дугöдчисны. Озыръяс сiдз нинöм эз и сетны.

А гöль Сажинъяс сетiсны Сельковъяслы некымын мöс да вöв неыджыд дон вылö.

Сэсся ставöн шуисны: Сельковъяслы овмöдчыны войвывланьджык сiйö шорсяньыс, кöнi косясисны, а Сажинъяслы лунвывладорас кольччыны. А став сэтчöс местасö кутiсны шуны Чухлöмöн.

Сы бöрын колисны вояс, дасъяс, сёяс...

Сажинъяс да Сельковъяс сорласисны öта-мöдныскöд, кутiсны сёрнитны коми кыв вылын. А олiсны гöля. Найöс бара кутiсны нартитны царьяс да налöн чиновникъяс, кодъяслöн кабыръясыс недыр мысти суисyы тшöтш и Коми муö.

... Но колисны нöшта вояс, и лоис Октябрьскöй Социалистическöй революция. Лои шыбытöма медбöръя царöс, а сiдзжö бырöдöма и сылысь став слугаяссö, чиновникъяссö.Курыд шогöн тырöм уна вояс бöрын, вöлисти кокниа лолыштiсны коми крестьяна.

Шудаа да гажаа öнi олöны да уджалöны Чухлöмын Сажинъяс да Сельковъяс. Найö котыртчисны квайт колхозö, стрöиталiсны школаяс, клубъяс.

Ёна важ йывсьыс колины сöмын казьтылöмъяс да нöшта сохранитчыс шор, кöнi коркö вöлöм Сельковъяс да Сажинъяс костын кось. Тайö шорсö öнi шуöны Сельков-шорöн.

Прöст кадö дедъяс частö висьтавлöны сохранитчöм легенда Дур йылысь, кодöс налы висьтавлöмаöсь асланыс дедъясыс жö нин. Дур йылысь öнi лöсьöдлöны весиг мойдъяс, кöнi сiйöс, тöдöмысь, ёна искажайтöны, но кöнi эм и уна правильнöйыс.

Н. Е. СЕЛЬКОВ, Пединститут бердса учительскöй курсъяс вылын велöдчысь.

газ. "Коми Комсомолец", 31 мая 1948.

Водзö небöг: П.Сельков ЧУКЛÖМ: вежаинъяс, ловъя нимъяс