А.И.Туркин. Кӧні тэ олан? — Абъячой (Объячево)

1620 вося приправочнӧй книгаысь лыддям: "...на реке городок Обячей", а "Книга Большому Чертежу" историческӧй документысь (1627) аддзам: "городок Объячеи, от Вятки от города от Слободы 50 верст: А ниже Объячево 60 верст, на Лузе, городок Спаскои" (ӧні Спаспоруб).

Ӧткымынъяс мӧвпалӧны, мый Абъячой — сійӧ ЬӀбъячой. Тайӧ мӧвпсӧ вынсьӧдӧны сійӧн, мый рочӧн ы вылас кывъяс оз заводитчыны, сы вӧсна пӧ и ЬӀбъячойсьыс артмӧма Абъячой.

Татшӧм сяма гӧгӧрвоӧдӧм миянлы озджык шогмы. И вот мыйла. Ыб кылыс роч сёрниын некор оз вудж аб-ӧ, а век артмӧ иб. Босьтам кӧть Сыктыв вожысь Ыб (рочӧн Иб), Емваысь Ыб (Иб), Удораысь Выльыб — Выльиб, улыс Эжваысь Кебырыб — Кебыриб. Сэсся и ыбыслӧн вежӧртасыс "вывтас места, гӧра вылын муяс" озджык ладмы чой дінас.

Кыдзи чой (кыр, нёзь) вылас вермасны лоны ыбъяс?

Абъячой нимысь медводз колӧ торйӧдны аб кыв. Тайӧ кывйыс паныдасьлӧ татшӧм места нимъясын: Абсерт (Шошка дорын), Абкӧдж (Сыктыв Ыб да Межадор гӧгӧръясын), Чердынса комияслӧн эм ю Абъя. Тайӧ топонимическӧй визяс и нырӧ Абъячой ним.

Кутшӧм жӧ аб кывйыслӧн вежӧртасыс? Удора сёрниысь аддзам абъясьны "кавъясьны, кавшасьны" кыв. Тайӧ чужтӧ мӧвп, мый коркӧ коми сёрниын вӧлӧма торъя кыв аб "крут кыр, нёзь, крут кӧдж" вежӧртасӧн. Ӧні лоины гӧгӧрвоанаӧсь вылын индӧм нимъясыс: Абсерт "крут сьӧрт", Абкӧдж "крут кӧдж", Абъя (ю) "крут, мылькъя местаті визувтысь ю" и Абъячой "крут чой". Сиктыс збыльысь пукалӧ джуджыд местаын.

Абъячой — коми ним, а рочӧн лоӧ Объячево. Войвывса роч сёрниын а-ыс регулярнӧя вуджӧ о-ӧ.

Сэсся село кывкӧд йитӧдын артмӧма Объячево формаыс. Ӧні Объячево Луздорса районлӧн центр.